Read Tayta Diosninchi Isquirbichishan Ezequiel 19 Bible Online

Ezequiel 19 - Tayta Diosninchi Isquirbichishan bible

Ezequiel 19

¹«Israelpa raynincunapaj gamga wañupacuycho cantanata cantay. Cayno cantay:

²«Mamayquega liyuncunapa chaupinchömi tiyasha. Chaychömi wawancunatapis uywasha.

³Juc wawallantami mas alli gueshpichisha jatun canancama. Cäsata chariyta yachacuycuran. Chaypitanaga runata micuytana gallaycuran.

⁴Chayno ruraycashantami juc-lä nasyuncuna mayaran. Chaymi uchcuman garpuycur chariran. Nircorga aushiwan Egipto nasyuncama apasha.

⁵Chaura maman liyonga shuyarayta yamacarna, yarpashanno mana captin jucaj wawantana ruquin churasha.

⁶Chay liyunpis jatunna carga waquin liyuncunawan iwalna aywaj y cutimoj. Chayno puriycashancho quiquillan cäsacuyta yachacuycuran. Runata micuytapis yachacuycuran.

⁷Palasyucunachöpis llapanta illgächiran. Siudäcunachöpis tucuy mana allita ruraran. Gaparashpanga pï-maytapis mancharachej.

⁸Chaura bisïnun marcacunacho tiyajcunaga paypa contranna jatariran. Chaymi trampata churaparan. Chaynöpami uchcuman garpuycur chariran.

⁹Aushiwan aparcur jaulaman wichgaycusha. Nircorga Babiloniapa rayninmanna apapasha. Babiloniachönami carsilman wichgasha Israel jircacunacho gaparar purejta pipis manana wiyananpaj.

¹⁰«Mamayquega casha yacu aywaycajpa läduncho übas lanta alli wayunanpaj, rämasapa caycajnömi. Payga caycaran übaspa sapinta achca yacu ushmashannömi.

¹¹Rämancuna alli wiñar sinchi caran. Chaymi waquin rämancunaga raypa bäranpäraj caranpis. Fiyupa wiñaycällar pucutaycama chayaran. Pï-maypis rejsiran jatun cayninpa, cupösu rämayoj cayninpa.

¹²Ichanga rabyawan achuriycärir pampaman jitariran. Inti yagamunan caj lädupita wayra shamojna chaquirachiran. Chauraga wayuyninpis shicwacuranna. Sinchi rämancunapis chaquicäcuran. Chaura ninamanna waycuycäriran.

¹³Cananga chunyaj chaqui parti yacu mana cashanchömi yacunaypita lantaraycan.

¹⁴Rämancunapitana nina ratataycaj llojshiycan. Chay ninanami rupaycan chillguipancunatawan, wayuynintaga. Raypa bäranpäno sinchi rämancunaga manami cannachu. «Cayga caycan wañupacuycho cantanami. Chaymi llapan cumliptenga cay cantanata cantangapaj.»