Read Tayta Diosninchi Isquirbichishan Ezequiel 21 Bible Online

Ezequiel 21 - Tayta Diosninchi Isquirbichishan bible

Ezequiel 21

¹Chaura TAYTA DIOS nimaran:

²«Runa, Jerusalenmanna ricäriy. Nircur chaycho caj Templu imano cananpäpis rimay. Israel nasyun imano cananpäpis rimay.

³Cayno niy: ‹TAYTA DIOS caynömi nin: Gamcunapaga contrayquimi ricacö. Sablëta jorgurir llapantami wañuchishaj alli cajcunatapis juchasapacunatapis.

⁴Rasunpami sablëta jorgushaj alli cajtapis juchasapa cajtapis, norte caj-lächo tiyajpita sur caj-lächo tiyajcama llapanta wañuchinäpaj.

⁵Chaynöpami noga sablëta jorgushäta llapan runacuna musyangapaj. Chay jorgushätaga llapanta cumlinäcama manami cutichishächu.›

⁶«Runa, fiyupa llaquicushpayqui wagay. Llapan runacunapa ñaupancho wagay.

⁷‹¿Imapitataj wagaycanqui?› nishuptiquega gam ninqui cay nasyunman mana alli chayamunanpaj cajta mayaycur wagaycashayquita. Ninqui, chay junäga llapan callpaynajno ricacunanpaj cashanta, pipapis manana balurnin cananpaj cashanta, manchariyllawan chaquincunapis sicsicyananpaj cashanta. Chayno cananpaj caj öraga chayaycämunnami. Manapis aycällatanami canga. Noga TAYTA DIOSMI chayno në.»

⁸TAYTA DIOS nimaran:

⁹«Runa, imano cananpaj cashantapis nogapa jutëcho willacuy. Chaymi ninqui: ‹Tayta Diosga caynömi nin: « ‹¡Sabli, sabli! Fiyupa afilashanami, achicyänanpaj llushwachashanami caycan.

¹⁰Wañuchinanpämi afilasha caycan. Achicyaycachänanpämi llushwachasha caycan. Chayno caycaptenga ¿wamrä Judäpa bastunninman yäracushwanchuraj? Sabliga ima guerutapis manami cäsunchu.

¹¹Chay sablitaga afilasha, llushwachasha caycächin wañuchicojta aptaparcunanpämi.

¹²Runa, gamga gaparaypa gayacuy. Acrashä runacunataga chay sabliwan wañuchinanpämi caycan. Israelpa mandajnincunatapis llapanta wañuchinanpämi caycan. Paycunapis acrashä runacunawan iwal wañunanpämi caycan. Chaymi gamga llaquicushpayqui pëchuyquita tacacuy.

¹³Ñacayga chayamonganami. Ichanga ¿sablita bastun mana ichipaptenga imaraj canga? Noga TAYTA DIOSMI chayno në.

¹⁴« ‹Runa, gamga imano cananpaj cajtapis willacuy. Maquiquitapis jitayraj. Chay sabliga ishcay quimsa cutirämi chayamonga. Aypalla runacunata wañuchinanpämi chayamonga. Llapantami fiyupa manchaycächin.

¹⁵Chayno manchachiptinmi runacunapaga balurninpis mana canganachu. Chaymi aypallanpa wañuycachenga. Llapanpa wasincunamanmi wañuchicoj sablita churashcä. Chay sabliga achicyaycachänanpämi llushwachasha caycan. Wañuchinanpämi sumaj afilasha caycan.

¹⁶Sabli, ishcan-läman cuchuy. Jucaj-läman ticrarpis jucaj-läman ticrarpis cuchuy.

¹⁷Nogapis maquëta jitashämi rabyasha caycashä pascacänancama. Noga TAYTA DIOSMI chayno nishcä.› »

¹⁸TAYTA DIOSGA yapay nimaran:

¹⁹«Runa, ishcay nänita señalay Babiloniapa raynin sablinwan chaypa aywananpaj. Ishcan näni yarguranga juc nasyunllapita. Nircur näni raquejchöga letrëruta churanqui maygan siudäman chay näni aywaycashantapis musyananpaj.

²⁰Chay nänicunataga señalanqui Amón runacuna tiyashan Rabá siudäman chayananpaj, Judächo caycaj intërunpa curalasha Jerusalén siudäman chayananpaj.

²¹Babiloniapa raynenga ichicuycusha ishcan-läman näni raquiycajchömi. Chaychömi surtita gatir lëchacunata chuncaycan; ïduluncunata tapucuycan; uywacunapa ñatinnincunata ricaycan.

²²Surtita gatishanga llojshisha derëchu caj-läman. Chay caj-lächöga Jerusalenmi caycan. Chaura chay caj-läpäga ray niran: ‹Pillyaj yaycuy, perga jananpa yaycunata ruray, intërunpa curalapaycuy, wañuchiy, magaj yaycur gaparpay, puncuncunata amiriy› nir.

²³Chayno cananpaj cashanta Jerusalén runacunaga manami riguinchu. Chaynöga paycuna mana riguinchu Babiloniapa rayninwan alli parlacusha cashpanmi. Ichanga mana allita rurashanpitami paycunataga prësu apaconga.

²⁴Chaypitami noga TAYTA DIOSGA në: Gamcuna mana allita rurashayquicuna, wañuchicushayquicunaga mayacashanami. Juchata rurashayquicunaga ricacaycanmi. Chaypitami prësu aywanquipaj.

²⁵Israelpa fiyu raynin, gammanga castïgu chayaycämunnami. Llapan juchayquipitami castïgu chayashunayquipäna caycan.

²⁶Noga TAYTA DIOSMI cayno në: Umayquicho caj vinchata y corönayquitapis illajpitami guechushunquipaj. Chauraga llapanpis mas jucnönami cangapaj. Manacajman churasha cajcuna allicho canga. Allicho caycajcunanami manacajman churasha canga.

²⁷Llapantapis cachaycushäpaj pasaypa juchusha ragällantami. Chaynöga canga noga cachamushä chayamur jusgaptinmi. Chaypitaga paypa munayninchönami canga.

²⁸«Runa, gamga Israelcunata ashllej Amón runacunata cayno niy: ‹Tayta Dios nin: « ‹Sabliga churaränanpita jorgushanami caycan. Wañuchiyta gallaycunanpaj listunami caycan. Achicyaypa achicyar ushajpaj illgächinanpaj llushwachashami caycan.

²⁹Gamcuna ricapacushayquega manami rasun cajchu. Musyacojniquicunapis llullacuyllapami willaycäshunqui. Gamcunaga wañuchicoj runacunami canqui. Chaypitami örayqui chayamushana. Sabliga cuchongapaj gamcunapa cuncayquitami.

³⁰« ‹¡Sabli, churaränayquimanna cutiy! Nogaga jusgashayquipaj maychöpis gueshpichishächömi, yurishayqui nasyunchömi.

³¹Rabyashä nina ratariycajno caycajtaga gamchömi päsachishaj. Chaymi gamcunataga cachaycushayquipaj fiyu runacunapa, illgächicojcunapa maquinman.

³²Rupachisha, illgächishami canquipaj. Yawarniquipis nasyun intëruchömi mashtaranga. Chaura gamcunataga pipis manami yarpäshunquipänachu. Noga TAYTA DIOSMI chayno nishcä.› »