Read Tayta Diosninchi Isquirbichishan Ezequiel 24 Bible Online

Ezequiel 24 - Tayta Diosninchi Isquirbichishan bible

Ezequiel 24

¹Isgun wata chunca quilla chunca junajninna caran Babiloniaman apamashancunaga. Chay junajmi TAYTA DIOS cayno nimaran:

²«Runa, canan junajta apuntay imay junaj caycashantapis. Canan junajmi Babiloniapa raynenga Jerusalenman yaycunanpaj magayta gallaycusha.

³Chaymi mana wiyacoj runacunataga yarparänanpaj tincuchiypa willapay cayno nir: «Jatun mancata churcushun. Nircur yacuta wiñashun.

⁴Chaymanna wiñashun cuchusha caycaj aychacunata. Wiñashun chancanpita, matancanpita aycha cuchushata, tulluncunatapis allinnin cajta.

⁵Werannin uyshatapis pishtarcur chayman wiñashun. Nircur junta waycupaycushun sumaj timpunanpaj, tulluncunapis sumaj chayananpaj.»

⁶TAYTA DIOS tantiyachishpan caynömi nin: «¡Ay imanöraj canqui wañuchicoj Jerusalén siudä! Oxidasha caycaj mancanömi caycanqui. Oxidashanga imaypis mana llojshejnömi caycanqui. Juc-juclla jorguy cuchusha caycaj aychacunata. Mancachöga jucpis ama quëdachunnachu.

⁷Oxidasha mancanöga caycanqui siudächo pasaypa wañuchinacuylla captinmi. Wañuchicushan yawarpis manami allpachöchu mashtaraycan allpawan tacucäcunanpäga. Chaypa ruquenga allpaynaj gaga jananchömi mashtaraycan.

⁸Allpaynaj gagallacho yawar cacunanpämi camacächishaj. Chaytaga manami imawanpis chapangapächu. Chay yawarta ricarmi fiyupa rabyacurcushaj. Chaymi rurashanmanno Jerusalentaga castigashaj.»

⁹Caynömi TAYTA DIOS nin: «¡Ay imanöraj canqui wañuchicoj Jerusalén siudä! Noga quiquëmi ninata ratachishaj.

¹⁰Aypalla yantatami sumaj waycushaj. Timpuchir aychata sumaj chayachishaj. Yacun chaquinancama, tulluncunapis rupanancama yanushaj.

¹¹Nircur wiñayniynaj caycaj mancatana churcushaj nina rataycajman. Chaura chay mancaga wayllaycällar ushajpaj pucayanga llapan ganran wayllayllawan llojshinancama, oxidashanpis illgänancama.

¹²Ichanga yangami chayno ninawanpis wayllachishcä. Oxidashanga ninawanpis manami illgashachu.

¹³«Jerusalén, nogaga chaynömi mana pengacuypa pï-maywanpis cacur ganracushayquipita limyuyächiyta munashcä. Chayno ruraptëpis manami limyuyashcanquichu. Limyuyanquipäga rabyasha caycashäta gamcho pascacächiptërämi.

¹⁴Noga TAYTA DIOSMI chayno nishcä. Nishäga chaynömi canga. Quiquëmi chayno cananpaj camacächishäpis. Chaytaga manami cutiricushächu. Simrimi cumlishaj. Manami cuyapäshächu, ni pësacushäpischu. Imanöpis rurashayquipitami, imanöpis cashayquipitami castigashayquipaj. Noga TAYTA DIOSMI chayno në.»

¹⁵TAYTA DIOS nogata cayno nimaran:

¹⁶«Runa, gamtaga fiyupa cuyashayqui warmiquita illajpitami shuntacushaj. Chayno shuntacuptë ama llaquicunquichu ni waganquipischu.

¹⁷Mana musyacaylla llaquicuy. Wañupacojcuna lütushannöga ama lütuychu. Ama puriychu gala umallaga, ni gala chaquillapis. Cärayquitapis ama chapacuychu. Wañupacushancho micunan micuycunatapis ama micuychu.»

¹⁸Tutapaga runacunawan parlaycarä. Tardinaga warmë wañucuran. Warannenga Tayta Dios nimashannölla rurarä.

¹⁹Chaura runacunaga tapumaran: «Chay ruraycashayquega nogacuna ¿imano canäpätaj? Mä willapämay.»

²⁰Chaura nogana nirä: «TAYTA DIOSMI nogata nimasha

²¹Israelcunata cayno ninäpaj: ‹Caynömi TAYTA DIOS nin: Gamcunaga Templöta amatarmi cuyanqui; amatarmi almiranquipis. Chay Templuwanmi gamcunaga alli-tucuycanqui, munayniyoj-tucuycanqui. Ichanga chay Templuta noga ganrachishämi. Jerusalencho quëdamoj wamrayquicuna warmipis ollgupis runa wañuchiypami wañonga.

²²Gamcunapis Ezequiel rurashannöllami ruranayqui: Manami gagllayquitapis chapacunquipächu. Wañupacushancho micunan micuycunatapis manami micunquipächu.

²³Gala umalla, ni gala chaquillapis manami purinquipächu. Manami llaquicunquicunapächu. Ni waganquicunapäpischu. Juchayquicunapitami callpaynajnöna ricacunquipaj. Chayrämi jucniqui-jucniquipis shongullayquicho llaquicunquipaj.

²⁴Chaynömi gamcunapäga Ezequiel canga tantiyacunayquipaj. Pay rurashannöllami gamcunapis ruranquipaj. Chayrämi gamcunaga musyanquipaj noga rasunpa TAYTA DIOS cashäta.›

²⁵«Runa, Israelcuna yäracuycashan Templutami illgarachishaj. Templu cuyayllapaj captinmi paycunaga fiyupa cushicuycan. Templunta amatar cuyan, amatar almiranpis. Chaynöllami wamrancunatapis ollguta warmita wañuchishaj.

²⁶Chayno päsashan junajmi juc runa gueshpiycamur willashunayquipaj chayamongapaj.

²⁷Chay junajmi upa caycashayquipita shimiqui pashtangapaj. Chaura chay gueshpimojwan parlanquipaj. Chaynöpami gamga canquipaj llapan runacuna musyananpaj señal. Chayrämi paycuna musyanga noga TAYTA DIOSNIN cashäta.»