Read Tayta Diosninchi Isquirbichishan Ezequiel 27 Bible Online

Ezequiel 27 - Tayta Diosninchi Isquirbichishan bible

Ezequiel 27

¹TAYTA DIOS cayno nimaran:

²«Runa, Tiro siudäpaj cantay wañushapaj llaquicur cantanata. Chay siudämi caycan lamar cantuncho. Chay siudämanmi chayan may nasyunpita aywarpis, lamar cantuncho tiyajcunapis. Chaychömi ranticunacurcaycan ima nigusyuncunatapis. Noga TAYTA DIOS nishäta cayno ninqui: « ‹Tiro, gamga yarpanqui «Llapanpitapis mas cuyayllapaj büquimi cä» nir.

⁴Gam mandashayquega lamarpa chaupincamami chayaraycan. Arojcunami mas cuyayllapajta rurashurayqui.

⁵Senir jircapita pïno gueruta apaycamurmi cantuyquicunatapis intablasha. Tëla shucullpiqui warcuränanpaj ichiraj guerupäna apamusha Líbano jircacho caj sedrucunata.

⁶Yacupa purichishunayquipaj bäticunayquitanami rurasha Basancho caj encina guerucunapita. Chipre lamar cantunpita sipresta apaycamurna intëru janayquita chapar intablasha. Chaymanga marfilcunawanpis cañichiypa adurnasha.

⁷Wayra tangar apananpaj shucullpipis casha Egiptucho burdashan lïnupitami. Chay tëlanami bandërayquino caycaran. Tolduyquicuna caran murädu tëlacunapita, puca tëlacunapitapis. Chay tëlacunataga Elisa partipa lädun lamar cantunpitami apamuran.

⁸Yacupa tangachishojcunaga caran Sidonpita, Arvadpitami. Lamarpa manijashojcunaga caran gamcho tiyajcunami, fiyupa yachaj runacunami.

⁹Guebalpita caj rispitädu carpintërucunaga, yachaj runacunaga jinan örami allcharej imapis pirdicäcuptenga. Intërupita büquicunawan shamojcunaga gamwanmi ranticunacoj ima-aycata apamushantapis.

¹⁰Pillyapaj caycaj suldäruyquicunaga caycaran Persia, Lidia, Libia runacunami. Adurnashushpayqui waguirgärej chapacuna escüduncunata, fyërru cascuncunata. Chaycunawanmi camarächishoj-cashunqui.

¹¹« ‹Arvad runacunawan suldäruyquicunami curral pergayqui jananpaga intëru tumarejcho carcaycaran. Ricchacuna törricunachöna caycaran Gamad runacuna. Paycunapa chapacuna escüduncunana curral pergayquicunacho intëru tumarej waguiraycaran. Chaycunawanmi sumaj camarächishoj-cashunqui.

¹²Gampaga ima-aycayquipis fiyupa aypallami caran. Chaymi Tarsispita shamojcunapis gampita rantej. Imatapis goshayquipitana paycuna pägashoj-cashunqui guellayta, fyërruta, estañota, plömuta.

¹³Chayno, Greciapita, Tubalpita, Mesecpita shamojcunapis gampitami rantej. Paycunaga pägashoj-cashunqui rantisha runacunata, runsipita caj cösacunata.

¹⁴Bet-togarma runacunana pägashoj-cashunqui cargapaj muntapaj cawallucunata, mülacunata.

¹⁵Rodaspita shamoj runacunapis gampita rantej. Lamar cantunpa tiyajcunataga achca nasyuncunatami ranticoj-canqui. Paycuna pägashoj-cashunqui marfilta, ébano guerucunata.

¹⁶Ima-aycayquipis ranticunayquipaj aypalla captinmi Edom runacunapis gampita rantej. Gam goshayquipa ruquin apapämushoj-cashunqui achicyaj granate rumicunata, muräduman tiñisha tëlacunata, burdasha tëlacunata, lïnu tëlacunata, cuestaj coral y rubí rumicunatapis.

¹⁷Gamcunapitami rantej Judá, Israel runacunapis. Paycuna pägashoj-cashunqui Minit particho wayoj rïgucunata, pastilcunata, abëjapa mishquincunata, asëtita y balsamuta.

¹⁸Damasco runacunanami rantishoj-cashunqui micuycunata, ima-aycata charashayquicunatapis. Paycuna pägashoj-cashunqui Helbonpita apamushan bïnuta, Saharpita apamushan yuraj millwacunata.

¹⁹Uzalpita-pacha apapämushoj-cashunqui bïnuta, arucunapaj listu tacasha fyërrucunata, canëlata, alli asyaj cäñacunata. Chaycunataga goshoj-cashunqui ranticushayquicunapita pägarmi.

²⁰Dedanpita shamojcunaga gamman apamoj sillacunata.

²¹Arabia runacunawan Quebarcho mandajcunapis gamcunawan ranticanacoj. Paycuna pägashoj-cashunqui manta uyshacunata, carnicunata, chïbucunatapis.

²²Sabächo, Raamacho tiyaj nigusyanticunaga gampitami rantej. Paycuna pägashoj-cashunqui mas allinnin caj perfümicunata, cuestaj cuyayllapaj rumicunata, goritapis.

²³Gamwanmi ranticunacoj Harán, Cane, Edén runacuna, chayno Sabächo, Asiriacho, Mediacho tiyaj llapan nigusyanticunapis.

²⁴Ranticoj-cashunqui fïnu tëlacunata, murädu röpacunata, burdashacunata, tucuy culur alfombracunata, mana rachej rinsasha wascacunatapis.

²⁵Tarsispitana büquicuna gatinayllanpa chayamoj llapan casta nigusyucunata apamushpan. « ‹Gamga ima-ayca riquësatapis cargacurcurmi lamar jananpa aywaj canqui.

²⁶Lamarpa tangashojcunami apashurayqui jundunnin yacu jananpa. Jundu lamarcho caycaptiqui inti yagamunan caj-läpita shamoj fiyu wayranami ichic-ichiclla rurarishurayqui.

²⁷Chaura lamarman tallpucashayqui junäga riquësayquicuna, ranticunayquipaj cajcunapis, llapan casta micuyniquicunapis, lamarpa apashojcunapis, manijajniquicunapis, uchcu chapapäshoj carpintërucunapis, nigusyantiquicunapis, pillyay yachajcunapis, llapan gamcho caycajcunapis lamarmanmi yaganga.

²⁸Manijajcuna gaparpaptin lamar cuchuncunapis chucchongarämi.

²⁹Chaura juc büquicunata tangachejcunapis llojshicurenga. Manijajcunapis allpaman pinticarpärenga.

³⁰Paycunaga fiyupa callpaypami gaparpanga. Rabyawan fiyupa llaquicushpanmi gampaj waganga. Umancunaman allpata wiñaconga. Uchpachöpis gochpanga.

³¹Gampaj llaquicushpanmi ajchanta rutuconga. Lütu röpatapis jaticonga. Fiyupa llaquicushpanmi wagangapis.

³²Chaymi gampäga wañushacunapaj cantanata cantanga. Gampaj llaquicushpan nenga: «¿Lamarcho caycaj Tiro siudämanga maygan siudällaraj tincunman caran?» nir.

³³Lamar cantun nasyuncunapita imatapis chayachimuptin achca nasyuncho tiyajcunapämi aypächej-canqui. Ima-aycayqui, micuyniquicunapis aypalla captinmi cay pachacho caj raycunataga rïcuyächej-canqui.

³⁴Cananga lamarmi illgächisha-cashunqui. Lamarman tallpucashami caycanqui. Llapan cösayquicuna y gamcho caj runacunapis gamwan iwalmi ruricama yagacarpusha.

³⁵Imano päsashushayquitapis ricar lamar cantun nasyuncunacho tiyajcunaga llapanmi mancharisha carcaycan. Raynincunapis llaquishami carcaycan. Llaquicuycashanga alayrimi rejsicaycan.

³⁶Imano caycajtapis ricashushpayqui fiyupami mancharircaycan juc-lä nasyun nigusyanticunaga. Fiyupa manchariypajmanmi ticrashcanqui. Para-simrinami illgashcanqui.› »