Read Tayta Diosninchi Isquirbichishan Ezequiel 28 Bible Online

Ezequiel 28 - Tayta Diosninchi Isquirbichishan bible

Ezequiel 28

¹TAYTA DIOS cayno nimaran:

²«Runa, gamga Tiropa rayninta cayno niy: ‹TAYTA DIOSMI cayno nin: « ‹Gamga pasaypami alli-tucurayqui. Mana Dios caycar, runalla caycashpayqui nishcanqui: «Nogaga diosmi cä. Jamaraycäpis dioscuna jamaränanchömi; lamarpa chaupinchömi caycäpis» nir. «Juc dios yarpashannömi yarpäpis» nir yarpashcanqui.

³¿Gamga Danielpita mas musyaj yachajchuraj canqui? ¿Sasa tantiyana cajtapis llapantachuraj musyanqui?

⁴Musyaj, yachaj cayniquiwanmi rïcuyänayquiyaj ima-aycatapis aypallata tarishcanqui. Babulniquicunamanpis guellayta, gorita juntachishcanqui.

⁵Nigusyanti canayquipaj sumaj yachaj cashpayquimi rïcuyänayquicama ima-aycayquitapis mirachishcanqui. Ima-aycayquipis aypalla captinmi pasaypa alli-tucuycanqui.

⁶« ‹Chayno captiquimi TAYTA DIOSGA nin: « ‹Gamga ninqui «juc diospa yarpayninno yarpayniyojmi cä» nir.

⁷Chaypitami camacächishaj gampa contrayqui mas fiyu jäpa runacuna shamunanpaj. Chaycunami sablinta jorgonga cuyayllapaj sumaj yachaj caycajta wañuchishunayquipaj. Chauraga allicho caycajtapis pasaypa manacajmanmi churashunquipaj.

⁸Ruri uchcumanmi gaycurishunquipaj. Lamarpa mas jundunninchömi rätu wañurinquipaj.

⁹Wañuchishunayquipaj caycajpa ñaupanchöpis gamga ¿jinallachuraj niycanquipaj «nogaga diosmi cä» nir? ¡Wañuchishojcunapa maquincho gamga manacaj runallami caycanquipaj!

¹⁰Mana aduramajcuna wañushannömi juc-lä jäpa runacunapa maquinwan wañunquipaj. Noga TAYTA DIOSMI chayno rimashcä. Nogami nishcä chayno cananpaj.› »

¹¹TAYTA DIOS cayno nimaran:

¹²«Runa, gamga Tiropa rayninpaj llaquicushpayqui, runa wañuycho cantanata cantashpayqui cayno ninqui: ‹TAYTA DIOSMI cayno nin: « ‹Gamga alli cuyayllapämi carayqui waquincuna ricacunanpaj. Gamga fiyupa yachajmi, cuyayllapämi carayqui.

¹³Edén wertachömi caycarayqui. Röpayquipis caycaran tucuy-niraj achicyaj rumicunawan burdashami. Chay achicyaj rumicunapa jutenga caynömi caran: Rubí, crisólito, jade, topacio, cornalina, jaspe, zafiro, granate, esmeralda. Aläjayquicuna, arëtiquicuna gorillapita caran. Chaycunaga gam yurishayquipita-pacha camarishanami caycaran.

¹⁴Juc querubín anjiltami churarä gamta täpashunayquipaj. Acrashä rispitädu jircachömi caycarayqui. Achicyaycachaycaj rumicunapa chaupinchömi purej canqui.

¹⁵Camasha cashayqui junajpita-pacha ima rurashayquicunapis allillami caran. Ichanga mana allita ruraytana gallaycurayqui.

¹⁶Achca nigusyuta arurmi mana alli ruraycunallaman, jucha rurayllamanna ticrashcanqui. Chaypitami ñaupäpita gargushcä; «Diospa jircan» nishayquicunapitapis jitarishcä. Querubín anjil täpaycäshojmi achicyaycachaycaj rumicunapa ñaupancho puriycajta jorgushurayqui.

¹⁷Cuyayllapaj carmi alli-tucurayqui. Allicho carmi yachaj cayniquitapis mana alliman ticrachishcanqui. Nogami gamta pampaman jitarishcä. Llapan raycunapa ñaupanman churashcä paycuna manacajman churar asipäshunayquipaj.

¹⁸Fiyupa aypallami juchayqui. Nigusyuta arur achcatami suwapashcanqui. Chayno rurarmi templuyquicunatapis ganrachishcanqui. Chaypitami, ninata ratarachishcä rupar ushacurcushunayquipaj. Llapanmi ricashunquipaj allpacho uchpayasha caycajta.

¹⁹Llapan rejsishojcunaga chaynöta ricashushpayqui fiyupami mancharisha caycan. Fiyupa manchariypaj ruracashami caycanqui. ¡Manami imaypis cutimunquipänachu!› »

²⁰TAYTA DIOS cayno nimaran:

²¹«Runa, gamga Sidón caj-läman ricärir

²²cayno ninqui: ‹Caynömi TAYTA DIOS nin: « ‹Sidón, nogami gampa contrayqui ricacö. Imano canayquipäpis nishä öra, santo cashäta musyacächishä öra, rejsicanga noga TAYTA DIOS cashä. Chauraga gampa ñaupayquichömi alabasha cashaj.

²³Gammanga tucuy-niraj gueshyatami chayachimushaj. Intëru cälliquicunachömi yawar mashtaranga. Wacpita caypita yaycur sabliwan cuchuypa wañuchiptinmi gamcho tiyaycajcunaga wañonga. Chaura noga TAYTA DIOS cashä musyacangami.

²⁴Israelga yapay mananami ñacanganachu. Bisïnun nasyun runacunaga casha tucshejno, shira rachejnöpis mananami manacajman churanganachu. Chaura noga TAYTA DIOS cashä musyacangami.

²⁵« ‹Noga TAYTA DIOSMI cayno në: Nasyuncunacho machicasha caycaj Israelcunata shuntamushämi. Nircorga santo cashäta musyachishaj llapan nasyun runacuna ricaycaptin. Chaura sirbimaj Jacobta goycushä nasyunchömi paypita mirajcunaga tiyacaycärenga.

²⁶Chaychöga allillanami goyangapaj. Wasicunata jatarachenga. Übascunata lantapaconga. Nogami castigashäpaj Israelcunata manacajman churaj bisïnun nasyun runacunataga. Chauraga Israelcunapa noga TAYTA DIOSNIN cashä musyacangami.› »