Read Tayta Diosninchi Isquirbichishan Oseas 10 Bible Online

Oseas 10 - Tayta Diosninchi Isquirbichishan bible

Oseas 10

¹Israelga caycan übas achcata wayuraycajnömi. Mas achca wayuynin captin mas achcatami capillancunatapis ruraran. Mas cuyayllapaj micuynincuna wayuptin mas cuyayllapätami ïduluncunatapis ruraran.

²Israelga ishcay shongumi. Cananmi ichanga llapan juchanpita castigasha canga. Tayta Diosmi capillancunata juchurgärachenga. Rispitädu ïduluncunatapis sajtargärenga.

³Cananga cay runacuna cayno nenga: «TAYTA DIOSTA mana rispitashanchïpitami rayninchïpis mana cannachu. Ichanga rayninchi carpis ¿imachöraj yanapämashwan?» nir.

⁴Chay raycunaga parlashpanpis llullacuyllatami parlan. Jurashpanpis manacajllapämi juran. Chaypitami amatar pillyallana, mana alli goyayllana caycan chacracunacho wañuchicoj jacha wiñamojnöpis.

⁵Samaria runacunaga chulluchiypa rurashan törutami Bet-avén siudächo aduran. Ichanga chay törupaj fiyupami llaquicongapaj runacunapis, cüracunapis. Chaynöga llaquiconga chay törunta apacuptinmi.

⁶Chay törutaga Asiriamanmi apanga munayniyoj rayta goycunanpaj. Chaynöpami Efraín runacunaga pengaycho ricaconga. Israelcunaga pengaconga ïduluncunata adurashanpitami.

⁷Samariataga illgächengami. Raynintapis apaconga cashpita yacu apacojnömi.

⁸Mana bälej ïduluncunata adurashan capillancunapis ushacangami. Chaychöga Israelcuna juchatami ruraran. Capillancunachöga cashacunawan shiracunallami wiñamonga. Chayrämi runacunapis puntacunata nenga: «¡Juchumur chapacarcamay!» nir. Jircacunatapis nenga: «¡Nogacunapa janäman tunimur ñiticarcamay!» nir.

⁹Tayta Diosmi nin: «Israelcuna, gamcunaga Gabaa particho juchata rurayta gallaycushayquipita-pacha manami jucha rurayta cachaycunquichu. Chaypitami gamcunaga Gabaacho guërrawan wañunquipaj.

¹⁰Gamcunataga imaypis munashä örami castigashayqui. Fiyupa mana allita rurashayquipita gamcunata castigaptëmi gamcunawan pillyananpaj achca nasyun runacuna shamonga.

¹¹«Efraín runacunaga manshu wäca rïgu ëraycho yachacasha cacojnömi caran. Chaymi yüguta churapaytaga mana yarparächu. Cananmi ichanga cuyayllapaj matancanman yüguta churapäshaj. Judá runacunami yapyajnin canga. Jacobpita mirajcunami cuspiyajnin canga.

¹²Noga unay nirä: ‹Murupacojnöpis alli cajllata ruray. Chauraga cuyanacurmi goyanquipaj micuyta alli shuntajnöpis. Chucru chacrata yapyajnöpis chucru shonguyquita pascacächiy. Cananmi noga TAYTA DIOSMAN yäracamunayqui. Chayrämi shamushpä gamcunaman bindisyunnëta churamushaj.›

¹³Ichanga alli cajta ruranayquipa ruquin mana alli rurayllachömi cashcanqui. Cuyanacur alli goyänayquipa ruquin wañuchinacuyllachömi cashcanqui. Nogaman yäracamunayquipa ruquin llullacullar goyashcanqui. Chaynöga goyashcanqui pillyapaj caj carrëtayquicunaman yäracushpayquimi, pillyäshishoj piyunniqui aypalla caycajman yäracushpayquimi.

¹⁴Chaypitami cananga nasyunniquicho guërrallana canga. Siudäniquicunapis llapanmi ushacanga. Bet-arbel particho pillya cashan öra ray Salmán illgächishanno, warmicunata wamracunata wañuchishanno llapanta wañuchenga.

¹⁵Betel runacuna, mana allita rurashayquipita gamcunatapis chaynömi rurashunquipaj. Israelcunapa raynenga guërra gallaycushan öra rimir junajllanami wañongapaj.»