Read Tayta Diosninchi Isquirbichishan Oseas 11 Bible Online

Oseas 11 - Tayta Diosninchi Isquirbichishan bible

Oseas 11

¹Israelcunata Tayta Dios niran: «Israel runacuna wamrallaraj captin noga cuyaj cä. Pay wamrä captinmi Egiptupita shacamunanpaj gayarä.

²Chayno gayaycaptëpis nogapitaga masmi witicoj. Paycunaga mana dios caycaptin ‹diosnë› nishanpämi garayninta churapaj. Ïdulucunatami insinsuwanpis saumachej.

³Imano captinpis, nogami Efraín runacunataga puriyta yachachirä. Chayno purichirmi imano goyänanpäpis yachachirä. Chaypis paycunaga manami tantiyacushachu noga paycunata imapitapis chapaycashäta.

⁴Paycunataga fiyupa cuyashpämi pushamurä. Paycunataga iti wamranta margarcur cäranman töpachejnömi cachirä. Chayno rurarmi paycunataga micuytapis tarichirä.

⁵Chaypis paycunaga manami nogaman yäracamuyta munashachu. Chaypis Egiptumanga mananami cutenganachu. Asiria nasyunpa munayninchömi goyanga.

⁶Siudächo tiyajcunataga sabliwanmi wañuchenga. Llapan runacunatami illgächir ushanga. Yarpashancunatapis manami camacächenganachu.

⁷Noga nishätaga acrashä runacuna manami wiyacunnachu. Juc dioscunamannami gayacuycan. Chay dioscuna nogapita mas munayniyoj cashanta yarpaptinpis manami yanapangapächu.

⁸«¿Imanöpataj gamtaga gongaycöman Efraín? ¿Imanöpataj gamtaga jaguiriycöman Israel? ¿Imanöparäshi ruraycöman Adma siudäta illgächishänöga? ¿Imanöparäshi ruraycöman Seboim siudäta rurashänöga? Gamta cuyapar fiyupa llaquicuptëmi shongöpis nananraj.

⁹Manami fiyupa rabyasha caycashämannöchu rurashaj. Efraintaga yapay manami illgächishänachu. Nogaga Diosmi cä, manami runachu. Noga gamcunacho caycäga Santumi cä. Manami gamcunata illgächejchu shamushaj.

¹⁰«Gamcunaga nogatami wiyacamanquipaj. Noganami liyun gaparajno parlamushaj. Liyun gaparajno parlaptëmi nogapa cajcunaga inti yaganan caj-läpita sicsicyaycar shamongapaj.

¹¹Äbicunanömi Egiptupitapis cutimonga. Palumacunanömi Asiriapitapis cutimonga. Chaura camacächishäpaj wasincunacho yapay tiyananpaj.» TAYTA DIOSMI chayno nisha.

¹²Tayta Dios nin: «Efraín runacunaga tucuynöpami llullapämasha. Israel runacunaga tucuynöpami manacajcunata nimasha. Judá runacunaga noga Tayta Diosninta gongaycamashami. Cananga ïdulucunatana mana cachaypa adurarcaycan.