Read Tayta Diosninchi Isquirbichishan Oseas 13 Bible Online

Oseas 13 - Tayta Diosninchi Isquirbichishan bible

Oseas 13

¹Efraín runacuna parlaptenga llapanmi manchacoj. Chaymi waquin caj Israel runacunaga rispitashpan upällacoj. Chayno caycashanpita Efraín runacunaga Baalta adurashpanmi fiyupa juchayoj ricacuran. Chaynöpami paycunaga ushacasha.

²Cananpis jinallami juchata rurarcaycan. Guellaynincunata chullurcachir ïdulucunata rurachicurcun. Chay ïdulucunataga guellay tacajmi yachashanman-tupu rurapan. Nircorga nin: «Paypaj garayniquita churay-llapa» nir. Chaura runacunaga jundiypa rurashan töruta rispitashpan muchan.

³Chaymi paycunaga canga pacha warayman pucutay juntarcojnölla, tutapa shullay warämushpan inti ratarcamuptin illgacäcojnölla, ogshata wayra apacushannölla, jurnupa uchcunpa goshtay llojshir aywacojnölla.

⁴TAYTA DIOSMI acrashan runacunata nin: «Nogami Egiptucho cashayquipita-pachapis Diosniqui cä. Nogapita mas juctaga ama pitapis ‹Diosnë› niychu. Nogallami cä gamcunata salbäga.

⁵Gamcunataga nogallami yanapaycarä chunyaj jircacho captiqui.

⁶Nogami micuyta tarichirä. Micuyniqui puchu-puchu captinnaga waquinpita mas alli-tucushpayqui nogata gongaycäramarayqui.

⁷Chaypitami gamcunapäga liyunno cashaj, juc tinri nänicho pacacuycur rachir-usharinanpaj shuyaraycajno.

⁸Ösu wawanta ograycur fiyupa rabyasha ashejnömi gamcunamanga shamushaj. Chaychömi pëchupita charir rachirgärishayqui. Liyun micucurcojnömi jinancho usharishayqui. Micucoj jirca animalnömi rachir-usharishayquipaj.

⁹«Israelcuna, gamcunataga illgächejmi-aywä. Chayno ruraptë pipis manami nogata michämangachu.

¹⁰Cananga ¿maytaj chay llapan siudäniquicho salbashoj rayniqui? ¿Maychötaj caycan mandajniquicuna: ‹rayta, mandajcunata churapämay› nishayquicuna?

¹¹Gamcuna fiyupa rabyachimaptiquimi rayta churaparä. Nircur fiyupa rabyashpämi rayniquicunatapis illgarachishcä.

¹²«Efraín runacuna mana allita rurashanga apuntaraycannami. Juchata rurashancunaga musyacashanami caycan.

¹³Israelcuna, upami canqui. Yuriy-aypa caycaj wamra ticshu caycajnömi caycanqui. Yurinanpaj mana camacajnömi caycanqui.

¹⁴Chayno caycarpis ¿wañunayquipita salbanätachuraj munarcaycanqui? ¿Wañunayquipita salbashayquichuraj? Wañuy ¿maytaj wañuchicoj gueshyayqui? Sepultüra ¿maytaj ushacächicoj munayniqui? Shamuyna ari. Canan mananami cuyapäshänachu cay runacunataga.»

¹⁵Jacha waytaraycajno Israelcuna captinpis TAYTA DIOSMI chunyaj chaqui jircapita fiyu wayrata wayrächimonga. Chay wayrami chaquirachenga. Wallcaycällarmi yacu aywajcuna, pucyuncunapis chaquicäconga. Chiquejcunanami ima-aycancunatapis guechur apaconga.

¹⁶Tayta Diosninpa contran ricacushanpitami Samaria runacunaga castigasha canga. Sabliwan tucsiypami wañonga. Wamrancunatapis pampaman pajshirgärenga. Gueshyaj caycaj warmicunapa pachantapis gashargärengami.