Read Tayta Diosninchi Isquirbichishan Oseas 2 Bible Online

Oseas 2 - Tayta Diosninchi Isquirbichishan bible

Oseas 2

¹Chaura gamcunaga ollgu cajcunata ninquipaj: «Diospa wamrancunami caycanqui» nir, warmi cajcunatana «Dios cuyapashancunami caycanqui» nir. Tayta Dios nin:

²«Israel nasyonga majänömi casha. Chaymi wamräcuna mamayquita niy ‹Gammi juchayoj canqui.› Cananpitaga pay manami nogapa warmënachu. Ni nogapis manami runannachu cä. Amana mañösa car pintacushancunawanpis pintacuchunnachu. Mañösa car wallgarashancunatapis cachaycuchunna.

³Mana chayno ruraptenga quiquëmi pengaypaj garapachashaj. Yurishantano galallatami cachaycushaj. Chunyajmanmi ticrarachishaj. Chayno rurar yacunaypitami wañuchishaj.

⁴Wamrancunatapis manami cuyapäshäpächu. Chay wamrancunaga caycan jucwan-jucwan cacushanpitami.

⁵Mamanga jucwan-jucwanmi cacusha. Alli warmi cashantapis pirdichisha cayno nishpanmi: ‹Aywashaj cuyashäcunata ashej. Paycunaga goman micuyta, yacuta, millwata, lïnuta, perfümitapis, upyanäpaj cajcunatapis› nir.

⁶«Chayno cashanpitami purinan caminucunatapis chaparcushaj cashacunawan. Intërupami guencharcushaj caminuta ashirpis manana tarinanpaj.

⁷Chaura cuyashancunapa guepanta aywarpis mananami taripanganachu. Ashirpis manami tarenganachu. Chayrämi nenga: ‹Cutishaj rimir caj runäman. Paywan goyashpäga canan caycashäpita mas allimi carä› nir.

⁸«Ichanga pay manami cuentata gocuyta munashachu rïguta, bïnuta, asëtitapis noga tarichishäta. Nogami guellayta goritapis aypallata tarichirä. Chaycunapitami Baal dios-niraj ïdulucunata ruracarcärisha.

⁹Chaypitami cananga cutichicamushaj rïgöta, bïnöta. Cusichaycashan örami apacamushaj. Röpancunata rurananpaj tarichishä millwäta, lïnutapis shuntacurcushämi.

¹⁰Cuyashancuna ricapaycaptinmi garapächullata cachaycushaj. Maquëpitaga manami pipis salbangachu.

¹¹Cushicur goyashancunapis ushacangami. Manami canganachu fistancuna, llullu quillacho rurashan fistacuna, säbadu jamay junajcuna, waquin fistacunapis.

¹²Cuchurachishämi übas yörancunata, ïgus yörancunatapis. Chaycunapämi payga nej: ‹Cuyashäcuna pägamashpanmi caycunataga goycamasha› nir. Chay chacrancunataga ushajpaj shatamanmi ticrarachishaj. Chay chacran wayuptenga jirca animalcunanami micucurcongapaj.

¹³Castigashaj ayca watapis Baal dios-niraj ïdulucunapaj saumachishanpitami. Nogata cachaycamashpanmi wallgacunata, surtïjacunata jaticurcur cuyashancunapa guepanta aywacuran.» TAYTA DIOSMI chayno nisha.

¹⁴«Chaypitarämi, nogaga yapay cuyacurcushaj. Chunyajman pushaycurmi alli shimëpa parlapäshaj yapay cuyacarcamänanpaj.

¹⁵Chaycho gayaptë pay wiyamanga jipash cashpan wiyamashanno, Egiptupita llojshimushan öra imanömi caran, chayno. Chaypitaga yapaymi cutichishaj übas chacrancunata. Disigrasya päsashan Acor guechwatanami[3] ticrachishaj bindisyunyoj cananpaj.»

¹⁶TAYTA DIOSMI cayno nin: «Chay wichanga ‹Tayta Baal› ninanpa ruquin ‹Gammi majä canqui› nimangami.

¹⁷Baal dios-niraj ïdulucunapa jutinta Israel rimanantaga yarpayninpitapis ushajpämi gongaycachishaj. Chay juticunataga manami imaypis parlangapänachu.

¹⁸Chay wichanga Israelcuna jauca goyänanpämi parlashaj jirca animalcunawan, pärej äbicunawan, culebracunawan. Cay nasyunpitaga lëchatapis, sablitapis illgächishämi. Guërrapis manami canganachu. Chayrämi acrashä runacunaga jauca goyäcongapaj.

¹⁹Chaypitaga nogapanami imaycamapis canquipaj. Maquëcho captiquimi imaypis gamcunata cuyashayqui. Manami yapapacuyllä warmichu canquipaj, sinöga lijïtimu caj warmëmi.

²⁰Nogaga mana cachaypanami chararäshayquipaj. Chaymi nogapis gampana cashäpaj. Nogatanami ‹TAYTA DIOSNË› nimanquipaj.

²¹Chay wichanga nogami syëlupita allpaman tamyachimushaj.

²²Chaura allpanami alli wayuchenga rïguta, bïnuta, asëtita. Chaycunawanmi Jezreelga alli cawanga.

²³Acrashä runacunaga quiquilläpänami canga. Lo-ruhamatami cuyapäshäpaj. Lo-amïtanami nishaj: ‹Gamga acrashämi canqui› nir. Paynami nimanga ‹Gammi Diosnë canqui› nir.»