Read Tayta Diosninchi Isquirbichishan Oseas 6 Bible Online

Oseas 6 - Tayta Diosninchi Isquirbichishan bible

Oseas 6

¹Llapanchi shuntacäshun. Nircur TAYTA DIOSNINCHÏMANNA cutishun. Paymi rachir-usharamaranchi. Chaymannömi allchacächimäshunpis. Yawar-yawar ruramashcanchi. Chaymannömi jampimäshunpis.

²Ishcay junaj cajchöga cawananchïpaj jämaytami cutichimäshun. Quimsa junaj cajchönami jatarachimäshun ñaupanchöna goyänanchïpaj.

³TAYTA DIOSMAN cutishun ari. Cutiptinchëga Tayta Diosmi noganchïman shamongapaj. Inti waran-waran yagamushannöpis Payga rasunpami shamonga. Jachacuna chillguinan wichan, waytanan wichan imaypis tamya tamyashanno rasunpami shamonga.

⁴Tayta Dios nin: «¿Imataraj gamta ruraycömanpis Efraín? ¿Imataraj gamta ruraycömanpis Judá? Gamcuna cuyamashayquega caycan tutapa pucutaraycar warämojno, tutapa shullay warämur intiwan rätu illgacäcojnömi.

⁵Chayno captiquimi willacuynë achquino caycajwan nogaga gamcunata tantiyachishcä juchayoj caycashayquita. Chaymi profëtäcunawan willacarcachir gamcunata wañuchishcä.

⁶Nogaga munä gamcuna rasunpa cuyamänayquitami. Manami munächu imatapis nogata garamänayquitaga. Nogaga munä ‹Diosnë› nimänayquitami. Manami munächu sacrifisyupaj uywacunata nogapaj apamunayquita.

⁷«Acrashä runacunaga Adannömi parlashäcunata mana cumlishachu. Nogataga ticrapamashami.

⁸Galaad siudäga caycan mana allita rurajcunapa tiyananmi. Chaychöga llapanpis carcaycan wañuchicuptin yawar pillchipashallami.

⁹Cüracunaga carcaycan juc röpa suwacunanömi. Paycunaga asaltanticuna pacarpaycajnömi carcaycan. Shequemman näni aywajcunachömi mana allicunata rurarcaycan.

¹⁰Israelcunachöga ricashcä fiyupa melanaypaj mana allicunatami: Efrainga jucwan-jucwanmi aywacusha. Israelcunapis fiyupa ganrayasha.

¹¹Judá, gampäpis maynami nishcä imay junaj castigasha canayquipaj cashantapis. Acrashä runacunapa surtinta ticrachiptë,