Read Tayta Diosninchi Isquirbichishan Oseas 8 Bible Online

Oseas 8 - Tayta Diosninchi Isquirbichishan bible

Oseas 8

¹«¡Ricachacoj, trompëtata tucay! Acrashä runacuna cajmanmi juc anca aywaycämun. Aywaycämun acrashä runacuna conträtuta rurar parlashäta mana cumlishanpitami, yachachishäcunata mana wiyacushanpitami.

²Chayno caycarpis gaparpashpan nogata mañacaycäman yanapänäpaj, ‹¡Gamga canqui Tayta Diosnëmi!› nir.

³Ichanga Israelcuna manami munashachu alli cajta. Chaypitami chiquinacushancunaga gaticachanga.

⁴Paycunaga nogata mana tapucamayllapami raynincunata churacarcärisha. Noga mana auniycaptëmi mandajnincunatapis churacarcärisha. Guellaynincunatawan gorincunata shuntarcur ïduluncunata ruracarcärisha. Chaynöpami paycunaga mana alliman chayanga.

⁵¡Samaria, gam adurashayqui törutaga fiyupami melanäcö! Chaytaga fiyupami rabyapaycä. Israelcuna ¿imaycamaraj jucha rurayta mana cachanquichu?

⁶¡Samariacho caycaj töruga manami dioschu! Chaytaga ruray yachajllami rurasha. Chay törutaga acapa-acapami paquirengapaj.

⁷«Paycunaga wayratami murusha, löcu wayratana shuntangapis. Rïguncuna manami wayonganachu. Mana wayuptin jarinapis manami canganachu. Ichiclla cajllantapis juc-lä jäpa runacunami micucarcärenga.

⁸Israelga ushacaypanami aywaycan. Juc-lä nasyun runacunaga manacajtanöllanami rican,

⁹mana tantiyaj chucaru bürruno Asiriaman aywashanpita. Efraín runacunaga aunisha Asiriacuna yanapaptin pägananpämi.

¹⁰Chayno pägar alli parlacusha caycaptinpis castiganäpaj may-chaypitapis cutichimushämi. Chaymi munayniyoj raypa maquincho ñacar goyanga.

¹¹«Efraín runacunaga achca altarcunatami rurasha juchanta raquinanpaj. Ichanga chay altarnincuna casha masta juchata ruranallanpämi.

¹²Paycunapaj laycunata isquirbisha captëpis paycunaga manami cäsushachu.

¹³Paycunaga amatarmi munan uywacunata pishtapämayta. Nircur pishtashan uywacunapa aychantaga micucarcärin. Noga TAYTA DIOSGA manami cushicöchu chayno rurashanpita. Mana allita rurashancunatami yarpäshaj. Juchanpita castigashpämi Egiptuman cutichishaj.

¹⁴Israelcunaga gongaycärishami paycunata pï camashantapis. Chaymi paycunaga capillacunallatana arurcaycan. Judá runacunana achca siudäcunata arur jatariycächin. Chay siudänincunamanmi nogaga ninata sindipaycoj-aywä. Chauraga llapan arushantapis ruparmi ushacurcongapaj.»