Read Tayta Diosninchi Isquirbichishan Joel 1 Bible Online

Joel 1 - Tayta Diosninchi Isquirbichishan bible

Joel 1

¹Petuelpa wamran Joeltami TAYTA DIOS ribilaran. Chay ribilashancunaga caynömi caycan:

²¡Mayur auquincuna sumaj wiyay-llapa! Cay nasyuncho tiyaycajcunaga llapaniqui yarpachacuy. ¿Gamcuna imayllaga caynöta ricarayquichuraj? ¿Taytayquicuna, awiluyquicuna cashan wichanpis canan caycashannöga caranchuraj?

³Cayno cashantaga wamrayquicunata willapanqui. Wamrayquicunana wamrancunata willapanga. Paycunana willapanga mas guepata yurejcunata.

⁴Tucuy casta chüpacacunami juntaycusha llapanta micur ushacurcunanpaj. Jatusaj chüpacacuna catushantaga acapa chucluscunami ushacurcusha. Acapa chucluscunapita gueshpejllantapis malunyacunami micucurcusha. Chaypita puchojllantapis shiuricunami ushacurcusha.

⁵Machasha puñuycajcuna ricchay. Bïnu upojcuna wagayna. Bïnuga manami cangapänachu.

⁶Chüpacacunaga munayniyoj aypalla suldärucunanömi nasyunnëman juntacaycamusha. Chaycunapaga quiruncunapis agärancunapis liyuncunapanömi.

⁷Übascunatapis ushajpämi ushacurcusha. Ïgus yöräcunatapis pasaypami ushasha. Pasaypa tullullantami ruraycusha. Rämancunatapis yur'gashatami cachaycusha.

⁸Runacunaga wagarcaycan majachacänanpaj caycaj mösu wañucäcuptin jipash wagaycashannömi.

⁹Cüracunapis wagarcaycan Templuman ofrendacuna manana chayaptinmi. Chaqui micuy ni bïnupis manana captinmi TAYTA DIOSPAJ ofrendacunapis mana cannachu.

¹⁰Chacracunapis gallpallanami caycan. Llapan chacrami llaquisha caycan. Rïgupis shuntananpaj manami cashanachu. Übas yöra chaquiptin bïnupis manami cannachu. Olivo yöracuna chaquiptin asëtipis manami cannachu.

¹¹Gamcuna, chacracho arojcuna, übasta cusichajcuna, llaquicushpayqui wagay-llapa. Cananga llapan murushayquicunapis yangallapämi casha. Manami wayushachu rïgupis ni sebädapis.

¹²Übascunapis chaquicäcushami. Ïguscunapis manami wayushachu. Granadacunapis, palmacunapis, mansänacunapis, jircacho caj yöracunapis ushajpämi chaquisha. Chaynöpami runacunapis mana cushicunnachu.

¹³Tayta Diospaj ofrendata churanayquipaj chaqui micuypis ni bïnupis manami cannachu. Chaymi Tayta Diosta sirbir altarcho aroj cüracuna, llaquicushpayqui wagay, lütu car jaticunan röpacunata jaticuy.

¹⁴Llapan runacunata gayachir willay ayunananpaj. TAYTA DIOSPA Templunman shuntay mayurcunata, chay nasyuncho cajtaga llapan runacunatapis llapayqui TAYTA DIOSTA mañacunayquipaj.

¹⁵¡Ay imanöraj canga chay junaj! TAYTA DIOS jusganan junäga chayaycämunnami. Chay junäga canga fiyupa manchariypämi munayniyoj Tayta Dios castigaptin.

¹⁶Ricapaycaptinchïmi micuyninchïtapis ushacurcusha. Diosninchïpa Templuncho cushicuypis manami cannachu.

¹⁷Llapan murushanchïpis illgashami. Rïgupis ushajpämi illgasha. Cananga micuy churacunanchïpis wanwaraycanmi.

¹⁸Imanöshi wäcacunapis gaparpaycan. Wäcacuna guewata ashirpis manami tarinchu. Uyshacunapis yargaywanmi wañurcaycan.

¹⁹TAYTA DIOS, gammanmi gayacamö. Ninami rupar ushacurcusha chunyajcho caj jachacunata, jircacho caj guerucunatapis.

²⁰Ragracunapa yacu aywajcuna chaquicäcuptin, guewata nina rupacurcuptin asta chucaru animalcunapis gammanmi gayacaycämun.