Read Tayta Diosninchi Isquirbichishan Joel 3 Bible Online

Joel 3 - Tayta Diosninchi Isquirbichishan bible

Joel 3

¹Tayta Diosmi nin: «Chay junaj chayamuptinmi camacächishäpaj Judäwan Jerusalén runacuna yapay allina goyänanpaj.

²Llapan nasyun runacunata shuntarcurnami apashaj Josafat guechwa pampaman. Chaychönami chay runacunataga jusgashaj acrashä Israelcunata imanöpis rurashanpita. Chay runacunami intëru mundupa mashtacächiran Israelcunataga. Nircur acrashä nasyuntaga raquipänacuran.

³Acrashä runacunataga raquipänacusha surtita jitarcur jitarcurmi. Wamracunata ollguta warmitapis ranticusha. Ranticur chasquishan guellaytanami ushasha upyananpaj bïnuta rantir, guellaypaj cacoj warmicunawan cacushpan.

⁴«Tiro, Sidón, Filistea parti runacuna ¿imatataj gamcuna nogawan munanqui? ¿Ayñita cutichimaytachu munanqui? ¿Imatapis ruramaytachu yarpanqui? Chayno captenga rurashayquimannömi castigashayqui.

⁵Gamcunami suwashcanqui guellaynëta, gorëta. Nogapa imäpis alli cajtaga templuyquicunamanmi apacushcanqui.

⁶Judá runacunata, Jerusalencho tiyajcunataga fiyupa carumanmi apashcanqui. Chayno aparcurnami uyway cananpaj ranticushcanqui Griego runacunaman.

⁷Ichanga nogami jorgamoj-aywä maymanpis ranticushayquipita. Nircurmi camacächishaj paycuna ñacashanno gamcunana ñacanayquipaj.

⁸Judá runacunamanmi ranticushaj ollgu warmi wamrayquicunata. Paycunanami ranticonga Sabá runacunaman. Chay runacunaga musyashayquinöpis fiyupa caruchömi tiyarcaycan. Noga TAYTA DIOSMI nishcä chayno cananpaj.» Sercacho caycaj nasyuncunapaj Joel niran:

⁹«¡Nasyuncuna, wiyay-llapa! ¡Guërrapaj camaricuyna-llapa! ¡Jinyu suldärucunata shuntay-llapa! ¡Pillyajcunaga shuntacarcur aywachunna!

¹⁰Rëjancunapita rurachun sablincunata. Ösinpitana rurachun lansata. Callpaynajcunapis ‹¡Callpayojmi cä!› nichun.

¹¹Sercacho caycaj nasyun runacuna, llapayqui juclla shamuy waquin cajwan shuntacänayquipaj. TAYTA DIOS, paycunawan pillyananpaj callpayojcunata cachamuy ari.

¹²Llapan nasyuncho tiyaj runacuna llapayqui camaricuy. Nircorga ayway Josafat guechwa pampaman. Chaychömi Tayta Dios jusgaj-aywan Israelpa bisïnun nasyun runacunata.

¹³Paycuna fiyu runacuna cashanga pasaypanami pogupaycan. Chaymi paycunataga Tayta Dios castiganga ösita aptacurcur rïguta runa rutushanno. Tayta Diosmi usharenga übasta bïnupaj runa lluchcajno.

¹⁴Chay Jusgana Pampachöga aypallami shuntacasha carcaycan. Chaynöga shuntacasha carcaycan TAYTA DIOS jusganan junaj chayamunanpaj wallcana pishiptinmi.

¹⁵Chay junäga intipis quillapis chacacäcongami. Goyllarcunapis manami achicyanganachu.

¹⁶Sión lömapita-pacha TAYTA DIOS gayacamonga. Jerusalenpita-pachami räyuno busninta wiyacächimonga. Syëluwan cay pachapis sicsicyangami. Acrashan Israel runacunatami ichanga TAYTA DIOS ima-aycapitapis washashpan chapanga.»

¹⁷Acrashan runacunata TAYTA DIOS niran: «Chay junaj chayamuptin gamcuna tantiyacunquipaj noga Tayta Diosniqui cashätami. Nogaga tiyashaj Templö caycashan Sión lömachömi. Chay Jerusalén siudäga cangapaj acracushä siudämi. Jäpa runacuna yapayga chay siudäta manami imaypis munaynincho chararanganachu.

¹⁸Chay wichanga intëru jircacunacho, intëru lömacunachöpis bïnuwan lëchi canga yacu-jina aypallami. Judächo caj ragracunapapis aypalla yacumi aywanga. Templöpitanami yacu pashtaycangapaj. Chaynami parguycangapaj Sitim guechwa pampata.

¹⁹Egiptoga pasaypa ushacashami quëdangapaj. Edomnami chunyajman ticrangapaj. Chaynöga cangapaj Judá runacunata magashanpitami, mana juchan caycaptin nasyunnincho Judá runacunata wañuchishanpitami.

²⁰Judächöwan Jerusalenchömi ichanga imaypis runacuna tiyarcaycangapaj.

²¹Nogaga llapantami ayñita cutichishaj. Juchata rurajcunataga manami perdunashächu. «Noga TAYTA DIOSNAMI Sión lömacho tiyaycäshaj.»