Read Tayta Diosninchi Isquirbichishan Amós 2 Bible Online

Amós 2 - Tayta Diosninchi Isquirbichishan bible

Amós 2

¹TAYTA DIOSGA caynömi nin: «Moab nasyuncho tiyajcunaga aypallatanami mana allita rurasha. Paycunaga uchpayänanyajmi rupachiran Edompa rayninpa tulluncunata. Chaypitami castigänillataga mana cachaycushächu.

²Moab nasyunmanmi ninata sindipaycushaj. Chay ninami rupar ushacurconga Queriot siudächo caycaj palasyucunata. Pillyacho gaparpaycaptin, trompëtacunata tucarcaycaptinmi Moab runacunataga wañuchir ushacächenga.

³Chay nasyunpa raynintapis mandäshejnincunatapis wañuchishämi.» TAYTA DIOSMI chayno nisha.

⁴TAYTA DIOSGA caynömi nin: «Judá nasyun runacunaga aypallatanami mana allita rurasha. Paycunaga manami wiyacushachu yachachicuynëcunata. Laynëcunacho niycashancunatapis manami cäsushachu. Chaypa ruquenga papänincuna adurashan ïdulucunallatami adurasha. Chaypitami castigänillataga mana cachaycushächu.

⁵Judá nasyunmanmi ninata sindipaycushaj. Chaynami rupar illgarachenga Jerusalencho caycaj palasyucunata.»

⁶TAYTA DIOSGA caynömi nin: «Israel nasyun runacunaga aypallatanami mana allita rurasha. Chaypitami castigänillataga mana cachaycushächu. Paycunaga juchaynaj alli runacunatami uyway cananpaj ranticun. Pobricunatanami ishcay llanguillawan rucan.

⁷Pengaypaj ñacachin. Umildicunataga arriglarpis jananpanmi. Taytanpis, wamranpis chay jipashllawan cacun. Chayno rurashpanmi juchaynaj caycaptë pengayman churaman.

⁸Israelcunaga rindata chararashan röpacunata mashtaycärirmi wegurpan ïdulucunapa ñaupancho rispitar micunanpaj. Multata pägachishan guellaywanmi bïnuta rantin. Nircurmi chayta upyan ‹diosnë› nishancunapa templuncunacho.

⁹Ichanga chayno carcaycaptinpis nogami paycunata päsachimunäpaj Amorreo runacunata ushajpaj illgächirä. Ushajpämi wañuchirä sedru guerucunano jatun caycajta, roble guerucunano sinchi caycajtapis.

¹⁰Israelcuna, gamcunatami ichanga Egiptupita jorgamurä. Amorreo runacuna tiyashan nasyunta gamcunata goycunäpaj chuscu chunca (40) watatarämi chunyajpa pushamur chayachimurä.

¹¹Gamcunachöga waquinta churashcä profëtä cananpaj. Waquintanami acrarä nazareo cananpaj. Israelcuna, ¿manachu chayno camacächirä?» TAYTA DIOSMI chayno nisha.

¹²Mastapis Tayta Diosga nin: «Chayno caycaptinpis gamcunaga nazareo runacunata firsapita bïnuta upuchishcanqui. Profëtacunatapis michashcanqui nogapa jutëcho mana willacunanpaj.

¹³Chayno cashayquipitami aypallata cargasha aywaycaj carrëta pampata ñitirishannöpis gamcunataga ñitirishayqui.

¹⁴May-jina cörrishpayquicunapis manami gueshpinquipächu. Fiyupa callpayoj captiquipis manami callpayqui canganachu. Ni jinyunnin cajpis manami salbacongapänachu.

¹⁵Lëchawan illapayta yachajpis manami illapayta camäpacongapänachu. Fiyupa cörriyta yachajpis manami gueshpengapänachu. Ni cawallunwan muntädu gueshpejpis manami salbacongapänachu.

¹⁶Chay junäga fiyupa pillyay yachaj jinyunninpis galallami gueshpir aywaconga.» TAYTA DIOSMI chayno nisha.