Read Tayta Diosninchi Isquirbichishan Amós 4 Bible Online

Amós 4 - Tayta Diosninchi Isquirbichishan bible

Amós 4

¹Sumaj wiyay Samaria warmicuna. Basán particho wäcacunano caycaj warmicuna wiyay cayno nishäta: Gamcunaga pobricunatami ñacaycächinqui. Pishëpacojcunatapis magar-ushaycanqui. Runayquicunatana «Bïnuta apamuy upyanäpaj» nircaycanqui.

²Rispitädu jutincho jurashpanmi TAYTA DIOS cayno nin: «Juc junajmi liyacurcur gamcunata apacushunquipaj. Wamrayquicunatami aushicunawan janchacurcongapaj.

³Chauraga gatinayllanpami perga uchcucunapa llojshinquipaj. Hermonmanmi gargurishunquipaj.» TAYTA DIOSMI chayno nisha.

⁴«¡Betelcho caycaj capillaman mä ayway ä jucha ruraj! ¡Gilgalcho caycaj capillaman mä ayway ä masta jucha ruraj! Uywata pishtarcur tutacunapa apay ä. Cada quimsa junaj diesmuyquita apay ä.

⁵Agradësicushpayqui lebadürayoj tantacunata rupachiy ä. Nircur, chay goycushayquitaga pï-maytapis willapay ä. Chayno ruraymi gamcunataga gustashunqui.» TAYTA DIOSMI chayno nisha.

⁶«Nogami camacächirä gamcuna yargaycho canayquipaj. Nogami camacächirä tiyashayquicunacho micuy pishëshunayquipaj. ¡Chaypis gamcunaga manami nogaman yapay yäracamushcanquichu!» TAYTA DIOSMI chayno nisha.

⁷«Chaynöpis nogami camacächirä, micuycuna pogunanpaj quimsa quilla pishiycaptillan usyacurcunanpaj. Nogami camacächirä waquin siudächo tamyananpaj, waquin siudächöna mana tamyananpaj. Waquin chacramanga tamyaran. Mana tamyashan caj partichönami micuycuna chaquiran.

⁸Siudänin-siudänin runacunaga yacuta ashishpan puriran. Chayno ashirpis manami tariranchu yacunaycashanta chawächinanpäga. ¡Chaypis gamcuna manami nogaman yapayga yäracamushcanquichu!» TAYTA DIOSMI chayno nisha.

⁹«Nogami gamcunata castigarä acaj wayrawan, micuyta ushaj curucunawanpis. Camacächirä wertayquicunacho lantayquicuna, übas yörayquicuna garwashtacäcunanpäpis. Chüpacacuna micur ushacurcuran ïgus yörayquicunata, olivocunatapis. ¡Chaypis gamcunaga manami nogaman yapay yäracamushcanquichu!» TAYTA DIOSMI chayno nisha.

¹⁰«Egiptuman yurichishäno castïgutami gamcunamanpis chayachimurä. Nogami camacächishcä gamcunacho caycaj mösucuna guërracho wañunanpaj. Camacächirä cawalluyquicunata chiquishojcuna guechurishushpayqui apacunanpaj. Nogami camacächirä pillyacho wañoj runacuna ismushan asyaytapis tiyarcaycashayquicho mayanayquipaj. ¡Chaypis gamcunaga manami nogaman yapay yäracamushcanquichu!» TAYTA DIOSMI chayno nisha.

¹¹«Nogami gamcunata castigarä Sodomatawan Gomorrata castigashäno. Chaymi gamcunaga caycarayqui ninapita jorgurisha tisunno. ¡Chaypis gamcunaga manami nogaman yapay yäracamushcanquichu!» TAYTA DIOSMI chayno nisha.

¹²«Chaypitami cananga Israelcuna sumaj camaricuy tapuptë imata willamänayquipäpis. Gamcunataga mas piyur-rämi castigashayquipaj.»

¹³Rasunpa chaynömi ruranga. Tayta Diosga caycan puntacunatapis camajmi, wayratapis yurichimojmi. Paymi runacunata musyachin imata pay yarpaycashantapis. Paymi achicyajtapis ticrachin chacayman. Paymi purin cay pachachöga intërupa. Paypaga jutinpis munayniyoj TAYTA DIOSMI.