Read Tayta Diosninchi Isquirbichishan Amós 6 Bible Online

Amós 6 - Tayta Diosninchi Isquirbichishan bible

Amós 6

¹¡Ay imanöraj canqui Sioncho goyaj autoridäcuna! ¡Ay imanöraj canqui Samariacho tiyaj mandajcuna! Gamcunaga charashayquiman yäracurmi munayniyoj-tucurcushcanqui. Gamcunamanmi Israelcunaga «yanapämay» nir aywarcaycämun.

²Calne siudäta aywar mä ricamunqui. Chaypitaga päsar chayanqui Hamat jatun siudäman. Chaypitana uranqui Filisteacho caycaj Gat siudäman. ¿Chay nasyuncunacho tiyaj runacunapita mas bälejchuraj gamcunaga canqui? ¿Gamcunapa nasyunniquega chay nasyuncunapita mas allichuraj?

³Gamcunaga fiyupa ñacay junaj chayamunanpaj caycajta manami yarpayllapis yarpanquichu. Chaypis mana allita rurar masmi gayaycanqui chay ñacay junajta.

⁴Cuyayllapaj llagllaypa adurnasha jamanacho wegurpaycanqui. Fistata rurar cushicushpayqui goyaycanqui. Carni-mallwacunata, werannin töru-mallwacunata micur jamarpaycanqui.

⁵Arpacunatapis wagay-wagayllataraj tucarmi birsucunatapis mushojcunallata jorguycanqui. Instrumentucunatapis Davidnörämi tucuy-nirajta ruraycanqui.

⁶Jatusaj cöpacunawan bïnuta upyarcaycanqui. Cuerpuyquicunamanpis allinnin perfümicunataraj pichucuycanqui. Nasyunniqui mana alliman chayaycashanpäga manami imapis gocushunquichu.

⁷Chayno cashayquipitami gamcunataraj ñaupa-puntataga juc-läman prësu apashunquipaj. Fistata rurar gaparpashayquicunapis manami musyacangapänachu.

⁸TAYTA DIOSGA quiquinpa jutinchömi jurasha. Munayniyoj TAYTA DIOSGA caynömi nin: «Jacobpita mirar-aywajcuna alli-tucushanga fiyupami rabyachiman. Palasyuncunatapis melanäcömi. Chaypitami paycunataga siudänintinta cachapaycushaj chiquejcunapa munayninman.»

⁹Chay öraga juc wasicho chunca runacunalla cawaycar quëdasha cashpanpis llapanmi wañonga.

¹⁰Chaura juc famillyan ayata pampananpaj wasiman chayanga. Wasi ruricho caycajtana taponga: «¿Pillaga gamwan chaycho caycanrächu?» nir. Chaura ruripita nimonga «Manami pipis cashachu» nir. Mastapis ruripitaga nimonga: «Upälla. TAYTA DIOSPA jutinta rimarpis rimaycunquimanchari. Chauraga castigarpis castigaycamashwanchari» nir.

¹¹TAYTA DIOSMI camacächenga jatunpis tacshapis wasicuna juchunanpaj. Chauraga llapanmi illgangapaj.

¹²¿Cawallucuna purinmanchuraj gagapa? ¿Gagacho yapyashwanchuraj? Chaura ¿imanirtaj gamcunaga layta benënumanno ticrachishcanqui? ¿Imanirtaj autoridäcuna alli arriglananpaj cajtapis ticrachishcanqui fiyupa ashgajmanno?

¹³Gamcunaga manacajcunallapitami alabacuycanqui. Munayniyoj cashayquipitami alli-tucur puriycanqui.

¹⁴Cananga sumaj tantiyacuy Israelcuna. Munayniyoj TAYTA DIOSGA caynömi nin: «Nogami camacächishaj juc nasyun runacuna shaycamur fiyupa ñacachishunayquipaj. Chaycunaga llapaniquitami ñacachishunquipaj Hamatman yaycunapita-pacha gallaycur asta Arabá mayucama» nir.