Read Tayta Diosninchi Isquirbichishan Números 1 Bible Online

Números 1 - Tayta Diosninchi Isquirbichishan bible

Números 1

¹Egiptupita Israelcuna llojshicamushan caran wata juc quilla juc junajninna. Chay junaj paycunaga chunyaj Sinaí jircacho carcaycaran. Chaychömi Tincuna Tolducho Moisesta TAYTA DIOS niran:

²«Llapan Israelcunata sinsuy castanpa-cama, famillyanpa-cama ayca cashantapis musyanayquipaj. Ollgu cajcunataga cada-ünunpa jutincunata apuntanqui.

³Ishcay chunca watayojpita janaman guërraman aywananpaj edäninchöna cajtaga sinsur apuntanqui. Röpanpa röpanpa yupanqui. Sinsuychöga wauguiqui Aaronmi yanapäshunqui.

⁴Yanapäshunqui cada trïbupa juc mandajnincunapis.

⁵Yanapäshunayquipaj caj mandajcuna caycunami caycan: «Rubén trïbupita yanapäshunqui Sedeurpa wamran Elisur.

⁶«Simeón trïbupita yanapäshunqui Zurisadaipa wamran Selumiel.

⁷«Judá trïbupita yanapäshunqui Aminadabpa wamran Naasón.

⁸«Isacar trïbupita yanapäshunqui Zuarpa wamran Natanael.

⁹«Zabulón trïbupita yanapäshunqui Helonpa wamran Eliab.

¹⁰«Josëpa wamrancunapitapis yanapäshunquimi. Efraín trïbupita yanapäshunqui Amihudpa wamran Elisama; Manasés trïbupitana Pedasurpa wamran Gamaliel.

¹¹«Benjamín trïbupita yanapäshunqui Gedeonipa wamran Abidán.

¹²«Dan trïbupita yanapäshunqui Amisadaipa wamran Ahiezer.

¹³«Aser trïbupita yanapäshunqui Ocranpa wamran Pagiel.

¹⁴«Gad trïbupita yanapäshunqui Deuelpa wamran Eliasaf.

¹⁵«Neftalí trïbupita yanapäshunqui Enanpa wamran Ahira.»

¹⁶Paycunami caran Israel trïbupita acrashan runacuna. Paycunaga caran cada famillyapa mandajninmi.

¹⁷Chay acrashan runacunawan Moisespis Aaronpis shuntacarmi

¹⁸llapan Israel runacunata gayachiran. Chay caran watacho ishcay quillaman gallaycoj rimir junajmi. Chayno gayaycachirmi sinsuran llapan runacunata cada famillyata, cada castata shuyni-cama, jutincunatapis cada ünunpata. Chayno sinsur apuntaran ishcay chunca watayojpita janaman cajta ayca ollgu cashantapis.

¹⁹Chayta ruraran Moisesta imanöpis TAYTA DIOS nishannöllami. Sinsuran chunyaj Sinaí jircacho.

²⁰Cada trïbuta, cada castata, cada famillyata sinsur jutincunata apuntaran. Chaura musyaranna ishcay chunca watayojpita janaman, guërraman aywananpaj edäninchöna cajcunalla ayca ollgu cashantapis. Caynömi caran: Israelpa mayur caj wamran Rubén trïbupita 46,500.

²²Simeón trïbupita 59,300.

²⁴Gad trïbupita 45,650.

²⁶Judá trïbupita 74,600.

²⁸Isacar trïbupita 54,400.

³⁰Zabulón trïbupita 57,400.

³²Josëpa wamran Efraín trïbupita 40,500, Josëpa wamran Manasés trïbupita 32,200.

³⁶Benjamín trïbupita 35,400.

³⁸Dan trïbupita 62,700.

⁴⁰Aser trïbupita 41,500.

⁴²Neftalí trïbupita 53,400.

⁴⁴Moisés, Aarón, cada trïbupita mirajcunapa ruquin shamoj chunca ishcay mandaj (12) Israelcunawan chaynömi sinsuta ruraran.

⁴⁵Israelcunaga ishcay chunca (20) watayojpita janaman caj, pillyapaj edäninchöna cajlla ollgu runacuna

⁴⁶llapanga caran sojta pachac quimsan waranga pichga pachac pichga chuncan (603,550).

⁴⁷Leví trïbu runacunataga waquin Israel-masincunatawan iwal manami sinsuranchu.

⁴⁸Chaynöga mana sinsuranchu Moisesta TAYTA DIOS cayno nisha captinmi:

⁴⁹«Israelcunata sinsushpayqui ama sinsunquichu Leví trïbu runacunataga.

⁵⁰Leví trïbu runacunataga churanqui Tincuna Tolducho rispitäducuna cajta, chaycho caj llapan cösacunatapis ricananpaj. Paycunallami mayman aywarpis apanga Tincuna Tolduta y llapan ima-aycantapis. Chaychöga paycunallami aronga nogata sirbimashpan. Maychöpis goyanga Tincuna Toldu ñaupancunallacho.

⁵¹Gamcuna juc-läman aywaptiqui paycunami Tincuna Tolduta pascarcur apanga. Tiyanayquipaj mayman chayaptiquipis yapay ichichenga. Mana cüra caycar Tolduman yaycoj cäga wañuchicangami.

⁵²Waquin Israel trïbucunaga pachaconga suldärucunano, quiquincunapa bandërancuna ñaupallancho.

⁵³Leví trïbu runacunaga tiyanga Conträtuta rurashanchi churaränan Toldu läduncunallacho. Paycunami täpanga Israelcuna llutalla mana yaycunanpaj. Llutalla yaycuptin-imaga rabyashpä llapan Israel runacunata castigashämi.»

⁵⁴Chaura Israelcunaga llapantapis ruraran Moisesta TAYTA DIOS nishannölla.