Read Tayta Diosninchi Isquirbichishan Números 10 Bible Online

Números 10 - Tayta Diosninchi Isquirbichishan bible

Números 10

¹Moisesta TAYTA DIOS niran:

²«Guellaypita ishcay trompëtacunata ruray martilluwan tacayllapa. Chay trompëtacunaga canga runacunata shuntanayquipaj u aywayta gallaycärinanpäpis musyachinayquipaj.

³Ishcan trompëtacunata tucaptenga llapan runacuna shamonga gam caycashayqui Tincuna Toldu puncuman.

⁴Jucaj trompëtallata tucaptenga cada trïbupa mandajnincunallami shuntacämonga.

⁵Aywacunanpäna trompëtata tonädachiypa tucaptenga inti yagamunan caj-läpa tiyaycajcuna aywayta gallaycärenga.

⁶Yapay tonädachiypa trompëtata tucaptenga sur caj-läpa tiyajcunana aywayta gallaycärenga. Trompëtata tonädachiypa tucaptenga simri canga tiyaycashanpita juc-läman aywananpänami.

⁷Runacuna shuntacämunallanpäga ishcan trompëtatami tucanga. Runacuna aywacunanpämi ichanga tonädachiypa tucanga.

⁸Trompëtata tucajcunaga cangapaj Aaronpita miraj cüracunami. Chay nishäcunaga imaycamapis laymi canga gamcunapaj gamcunapita mirajcunapäpis.

⁹«Tiyaycashayqui nasyunniquiman chiquishojcuna wañuchishunayquipaj yaycamuptenga trompëtata tonädachiypa tucanqui pillyaj aywanayquicunapaj. Noga TAYTA DIOSNIQUIMI yanapäshayqui. Gamcunata salbashayqui chiquishojcunapita.

¹⁰Trompëtacunataga tucanqui cushicuy junajcunacho, llullu quilla fistacunacho, rupachina sacrifisyuta rupachishpayqui, alli goyaypita sacrifisyu uywacunata pishtarpis. Chayno trompëtacuna wagajta wiyashpämi gamcunata yanapäshayquipaj. Nogami cä TAYTA DIOSNIQUI.»

¹¹Wata juc quilla ishcay chunca junajninchömi Conträtu Babul caycashan Rispitädu Toldu jananpita pucutay jogaricaran.

¹²Chaura Israelcunaga chunyaj Sinaïcho tiyaycashanpita aywacuran. Chaypita pucutayga päracuycuran Parán jutiyoj chunyajchöna.

¹³TAYTA DIOS Moisesta willapashannöllami Israelcunaga aywaran.

¹⁴Judá trïbu runacuna rimir-puntata bandëranwan aywaran. Chay trïbu runacunata mandaycaran Aminadabpa wamran Naasón. (Paycunawan iwalmi aywaran ishcay trïbu runacunapis).

¹⁵Isacar trïbutaga mandaycaran Zuarpa wamran Natanael.

¹⁶Zabulón trïbutana mandaycaran Helonpa wamran Eliab.

¹⁷Paycunapa guepantana Gersonpita, Meraripita mirajcuna Tincuna Tolduta pascarcur apacarcärir aywacuran. Paycunami chay cösacunata apananpaj caran.

¹⁸Paycunapa guepantana Rubén trïbu runacuna bandëranwan aywaran. Paycunata mandaycaran Sedeurpa wamran Elisur. (Paycunawanmi aywaran Simeón trïbu runacunapis, Gad trïbu runacunapis.)

¹⁹Simeón trïbutana mandaycaran Zurisadaipa wamran Selumiel.

²⁰Gad trïbutana mandaycaran Deuelpa wamran Eliasaf.

²¹Paycunapa guepantana aywaran Coatpita mirajcuna. Paycunaga rispitädu cösacunata apar aywaran. Maymanpis chayashpan paycunaga tarej Tincuna Toldu ichichishatana.

²²Paycunapa guepantana aywaran Efraín trïbu runacuna bandëranwan. Paycunata mandaycaran Amiudpa wamran Elisama. (Paycunawanmi aywaran Manasés trïbu runacunapis, Efraín trïbu runacunapis)

²³Manasés trïbutana mandaycaran Pedasurpa wamran Gamaliel.

²⁴Benjamín trïbutana mandaycaran Gedeonipa wamran Abidán.

²⁵Ushanantana aywaran Dan trïbu runacuna bandëranwan. Paycunata mandaycaran Amisadaipa wamran Ahiezer. (Paycunawanmi aywaran Aser trïbu runacunapis, Neftalí trïbu runacunapis)

²⁶Aser trïbutana mandaycaran Ocranpa wamran Pagiel.

²⁷Neftalí trïbutana mandaycaran Enanpa wamran Ahira.

²⁸Chaynömi Israelcunaga röpa-röpa gatinaylla aywaj.

²⁹Madián runa Reuelpa wamran Hobab caran Moisespa cuñädun. Paytami Moisés niran: «Nogacunaga aywacö TAYTA DIOS aunimashan partimanmi. TAYTA DIOSGA Israelcunata aunisha cuyar alli ricananpämi. Yan'gaycallämay ari. Yan'gämaptiquega nogacuna allimi ricashayqui.»

³⁰Hobabna niran: «Manami aywämanchu. Nogaga cuticushaj famillyäcuna tiyaycashan marcämanmi.»

³¹Chaypis Moisesga ruwar niran: «Ama cuticuychu ari. Gamga rejsinquimi chunyajcho mayninman pachacuna cashantapis. Chaymi nogacunata pushamashpayqui rejsichimay ari.

³²Nogacunawan aywacuptiquega TAYTA DIOS tarichimashanchïcunata iwalmi raquipänacushunpis.»

³³Chaynömi Israelcunaga Sinaí jircapita aywacur quimsa junaj aywaran. Chay junajcuna Conträtuta rurashan babultaga Israelcunapa ñaupanta apaycaran maycho jamananpäpis ashishpan.

³⁴Israelcuna aywacuptenga TAYTA DIOS yurichishan pucutay aywaj Israelcunapa janallanta.

³⁵Babulta apananpaj jogarcäriptin Moisés nej: «¡Aywaculläshunna TAYTA DIOS! ¡Contrayqui cajcunaga machiypa-machir gueshpichun! ¡Chiquishojcunaga ricashushpayqui gueshpir aywacuchun!»

³⁶Babulta jamaycachiptinna Moisés nej: «¡Cutiycamuyna ari TAYTA DIOS yupaytapis mana atipaypaj Israel runacunaman!»