Read Tayta Diosninchi Isquirbichishan Números 15 Bible Online

Números 15 - Tayta Diosninchi Isquirbichishan bible

Números 15

¹Chaypitanaga Moisesta TAYTA DIOS niran:

²«Israelcunata willanqui: Goycunäpaj caycaj nasyunman chayarga

³Nogapaj sacrifisyucunata rupachenga. Chaycunapa jömuynenga nogapa shongöpänömi canga. Chay sacrifisyucunata rupachinqui rupachina sacrifisyu captinpis o aunimashayquita cumlishpayquipis, o buluntäniquipita uywata apamushpayquipis o fistapaj uywata apamushpayquipis. Chay sacrifisyucunapaj uywayquicunapita apamunqui töruta carpis, uyshata carpis, o cabrata carpis.

⁴Sacrifisyupaj apamushayquiwan iwal apamunqui ishcay quïlu allinnin jarinata juc litru asëtiwan chapurcur.

⁵Cada cashnita apamur jananman yapanga juc litru bïnuta.

⁶«Carni captenga jananman yapanga chuscu quïlu jarinata litru masnin asëtiwan chapushata.

⁷Jananmanpis nogapaj rupachiptin jömuynin shongöpäno cananpaj yapanga juc litru medyan bïnuta.

⁸«Rupachina sacrifisyupaj apamurpis, aunishanta cumlirpis u alli goyaypita sacrifisyupaj apamurpis besërata apamushanpa

⁹jananman yapanga sojta quïlu jarinata ishcay litru asëtiwan chapushata,

¹⁰ishcay litru bïnuta. Chaycunata nogapaj rupachiptin jömuynin shongöpänömi canga.

¹¹Chaynöllami ruranga töruta apamurpis, carnita apamurpis, cashnita apamurpis, capshita apamurpis.

¹²Ayca uywata apamurpis chaynömi cada uywapaj churanga.

¹³Nogapa shongöpäno jömuynin cananpaj rupachir Israelcunaga chaynömi ruranga.

¹⁴«Lagacamojcunapis nogapaj rupachinanpaj apamuyta munarga gamcuna rurashayquinöllami ruranga.

¹⁵Nishätaga cumlinqui gamcunapis lagacamoj jäpacunapis. Chay nishäcunaga imaycamapis laymi canga gamcunapaj gamcunapita mirajcunapäpis.

¹⁶Juc layllami canga gamcunapäpis jäpa runacunapäpis.»

¹⁷Chaypitana TAYTA DIOSGA Moisesta niran:

¹⁸«Israelcunata willapanqui: Pushaycashä partiman chayaycorga

¹⁹wayushan rïguta cusichar nogapäpis raquinqui.

²⁰Rimir puntata rïguta cusichar nogapaj raquishayquinöllami rimir mäsa chapushayquipitapis tantata nogapaj ruranqui.

²¹Chaynöllami imaypis ofrendata nogapaj apamunqui.

²²«Moisesta nishä mandamintucunata mana musyayniquipa mana cumlir

²³cananpitaga gamcunapis, gamcunapita mirajcunapis caynömi ruranqui:

²⁴Mana musyayninpa llapan Israelcuna llutanta rurasha cashpanga llapanpäraj rupachina sacrifisyupaj juc töru-mallwata rupachenga jömuynin nogapa shongöpäno cananpaj. Chaytaga nishäno churanga chaqui micuy ofrendantawan bïnu ofrendantawan. Chïbutana juchapita sacrifisyupaj pishtanga.

²⁵Nircur cüranami rupachenga llapan Israelcunata juchanpita perdunanäpaj. Chayrämi perdunashaj. Paycuna mana musyayninpa juchata rurashanpita pishtanga, ofrendatapis apamonga.

²⁶Mana musyayninpa juchata rurasha captenga noga perdunashämi Israelcunata, lagacamoj jäpa runacunatapis.

²⁷«Pipis mana musyayninpa llutanta rurasha cashpanga juchapita sacrifisyupaj watayoj china cabra-mallwata pishtanga.

²⁸Cüranami rupachenga chay runa mana musyayninpa juchata rurashanpita perdunanäpaj.

²⁹Mana musyayninpa juchata rurashanpita chay layllami canga Israelcunapäpis, lagacoj jäpa runacunapäpis.

³⁰«Pipis yarpaypa juchata rurarga Israel carpis, jäpa carpis nogatami rabyachiman. Chaymi chay runaga ushacächisha canga.

³¹Noga nishäta mana wiyacushpan manacajman churashanpitami, yachachishätapis mana rurashanpitami illgächisha canga. Quiquinmi juchayojpis canga.»

³²Israelcuna chunyajcho caycashallanchöraj tariran Israel-masin runa säbadu jamay junajcho yantacuycajta.

³³Tariycärir aparan Moisesman Aaronman llapan runacuna caycashanman.

³⁴Yantacuycajta tarishanta willaptinmi imano castigananpäpis mana musyar paycunaga prësulla chariraran.

³⁵Chaymi TAYTA DIOSGA Moisesta niran: «Chay runaga wañunanmi merësin. Chaymi tiyarcaycashanpita juc-läman jorguycur llapan Israelcuna sajmachun.»

³⁶Chaura TAYTA DIOS nishannöllami Israelcunaga juc-läman jorguycur wañunanyaj sajmaran.

³⁷TAYTA DIOSGA Moisesta niran:

³⁸«Israelcunata willapay: Gamcunapis, gamcunapita mirajcunapis röpayquipa cantunman murädu jïluwan paychancunata imaypis jiranqui.

³⁹Chay paychacunata ricashpayquimi gamcunaga yarpanquipaj llapan mandamintöcunata cumlinayquipaj cashanta. Chauraga quiquiquicunapa shonguyqui munashanta mananami ruranquipächu.

⁴⁰Chaynöpami mandamintöcunata yarpanquipaj, cumlinquipaj. Noga Tayta Diosniqui acrashäna canquipäpis.

⁴¹Noga TAYTA DIOSNIQUIMI Egipto nasyunpita jorgamushcä acracushä runacuna canayquipaj. Noga Tayta Diosniquimi chayno në.»