Read Tayta Diosninchi Isquirbichishan Números 24 Bible Online

Números 24 - Tayta Diosninchi Isquirbichishan bible

Números 24

¹Balaamga musyaranna Israelcunata TAYTA DIOS bindisyunta gonanpaj cashanta. Chaymi musyaj aywanyashannöga mana aywarannachu. Chaypa ruquenga chunyajllapana ricäriran.

²Chaura Israelcunataga ricaran cada trïbu shuyni-cama tiyaycajta. Tayta Diospa Espiritunpa munaynincho ricacurna

³Balaamga imano cananpäpis cayno rimaran: «Beorpa wamran Balaammi cä. Imano cananpaj cajtapis Tayta Dios musyachimaptinmi rimaycä.

⁴Munaynincho Tayta Dios ricacachimaptinmi llapantapis ricä. Nogataga munayniyoj Tayta Diosmi musyachiman, ribilaman.

⁵¡Jacobpita mirajcuna, tolduyquicuna cuyayllapämi! ¡Israelcuna, tiyarcaycashayquega cuyayllapaj camarajllami!

⁶Palma yöracuna fïlayllanpa ichiraycajnömi ricacan. Mayu cantuncho wertata TAYTA DIOS lantashanno caycan. ¡Yacu cantuncho sedru guerucuna caycajnömi caycan!

⁷Israelcuna upunanpaj, micuynincunata pargunanpaj yacuga manami pishengachu. Paycunapa raynenga Agagta binsengami. Munayniyoj cashantapis intëruchömi musyanga.

⁸Egiptupita jorgamoj Tayta Diosmi paycunataga yanapan. Chay runacunapäga Tayta Diosmi callpayoj pogusha törunöpis caycan. Israelcunaga contran caj nasyuncunata ushangami. Tulluncunatapis paquengami. Lëchancunawan illaparmi wañuchenga.

⁹Liyun cäsata charinanpaj llupucuycojnömi caycan. Pipis rimapayta manchacunmi. ¡Israelcuna, gamta bindisyunta goshojcunataga Tayta Diospis bindisyuntami gonga! ¡Maldisyunta goshojcunatami ichanga maldisyunanga!»

¹⁰Balaam chayno nejta wiyaycur Balacga fiyupa rabyacurcuran. Chaymi maquitapis jitapar-raj niran: «¡Gamtaga pushachimushcä conträcunata maldisyunapämänayquipämi! ¡Nishä cananwanga quimsa cutinami bindisyunta goshcanqui!

¹¹¡Manaraj imapis cashancama wasiquiman cuticuy! Gamtaga ima-aycatapis goycunämi caran. Ichanga TAYTA DIOSMI mana camacächishachu.»

¹²Chaura Balaam niran: «Cachayqui shamojcunataga maynami willarä:

¹³‹Palasyuncho goriwan guellay caycajta ushajpaj goycamaptinpis TAYTA DIOSNË mana munashantaga imatapis manami rurashächu. Allita ni mana allitapis quiquilläpitaga manami rurashächu. Nogaga rimashaj TAYTA DIOS rimachimashallantami› nir.

¹⁴Nogaga marcämannami cuticö. Ichanga manaraj cuticurmi willashayqui chay Israel runacuna nasyunniquicho imano rurananpaj cashantapis.»

¹⁵Chaura Balaamga imanöpis cananpaj cajta niran: «Beorpa wamran Balaammi cä. Imano cananpaj cajtapis Tayta Dios musyachimaptinmi rimaycä.

¹⁶Munaynincho Tayta Dios ricacachimaptinmi llapantapis ricä. Tayta Dios rejsishantami rejsë. Munayniyoj Tayta Dios ribilamaptin llapanta musyä.

¹⁷Shamoj watacunacho imapis päsananpaj cajtami ricaycä. Carucho caycämojtami ricaycä. Jacobpa mirayninpitami juc goyllar llojshenga. Ricaycä Israelcho juc ray yurejtapis. Paymi Moab runacunataga umanpita llapirenga. Setpita mirajcunatapis ushajpaj wañuchenga.

¹⁸Edom runacunataga binsengami. Contran caj Seircunatapis charicurcongami. Israelcunaga rurangapaj pipis mana rurashantami.

¹⁹Jacobpita mirajcunapitami munayniyoj runa yurimonga. Siudäcunacho quëdajcunatapis illgächengami.»

²⁰Chayno niycashanpita Balaamga ricäriran Amalec nasyunpa. Chay nasyun imano cananpäpis cayno niran: «Amalec runacunaga cay pachacho fiyupa munayniyojmi carcaycan. Chaypis ushajpämi illganga.»

²¹Queni runacuna tiyashan-lädupapis ricärir imano cananpäpis cayno niran: «Pacacunayqui sumaj caycaptinpis, gaga chaupincunacho pacacunayqui caycaptinpis, nina ratarir rupangami Asiriacuna prësu apashuptiqui.»

²³Chaypita mastapis imano cananpäpis cayno niran: «¡Ay Tayta! ¿Pinaraj tiyanga Tayta Dios chayno manchariypaj ruraycuptenga?

²⁴Lamar chaupin Chipre tishgupitami büquicunawan runacuna shamonga. Asiria nasyuncho caj marcacunata ragällantami cachayconga. Heber runacunatapis pasaypami ushacächenga.»

²⁵Chaypitaga Balaam wasinman cuticuran. Balacpis aywacuran.