Read Tayta Diosninchi Isquirbichishan Números 33 Bible Online

Números 33 - Tayta Diosninchi Isquirbichishan bible

Números 33

¹Egiptupita röpacashalla llojshicamuptin Israelcunataga Aaronwan Moisesmi pusharan.

²TAYTA DIOS nishannölla Moisesga apuntaran Egiptupita llojshishan junajpita-pacha mayman-mayman chayashancunatapis.

³Wata gallaycoj quilla chunca pichga (15) junajninmi Israelcuna Ramsespita aywacuran. Chay junaj caran Pascua micuyta micushan waranninmi. Llapan Egipto runacuna ricaycaptinmi paycuna aywacuran Tayta Dios munayninwan yanapaptin.

⁴Egipto runacunaga TAYTA DIOS wañuchishan guechpa wamrancunata pamparcaycaran. Chayno rurarmi TAYTA DIOS musyachiran Egipto runacunapa diosnincuna manacajlla cashanta.

⁵Israelcunaga Ramsespita aywacur chayaran Sucotman.

⁶Sucotpita aywacur chayaran Etamman. Chayga caran chunyaj chaqui jirca gallaycunanna.

⁷Etampita aywacur tumaran Baal-zefonpa chimpan Pi-hahirotman. Chaychöna Migdolpa ñaupancho tolduncunata ichichiran.

⁸Pi-hahirotpita aywacurna lamarta päsashpan chayaran chunyajman. Nircurna quimsa junaj chunyaj Etam jircapa aywar chayaran Maraman. Chayman chayaycur tolduncunata ichichiran.

⁹Marapita aywacur chayaran Elimman. Chaycho caran chunca ishcay yacu pashtaj, ganchis chunca palmëra yöracunapis. Chaycho tiyananpaj tolduncunata ichichiran.

¹⁰Elimpita aywacur chayaran Puca Lamarpa ñaupanman.

¹¹Puca Lamarpita aywacur chayaran chunyaj Sin partiman.

¹²Chunyaj Sinpita aywacur chayaran Dofcaman.

¹³Dofcapita aywacur chayaran Alusman.

¹⁴Aluspita aywacur chayaran Refidimman. Chaychöga runacuna upunanpaj yacu mana caranchu.

¹⁵Refidimpita aywacur chayaran chunyaj Sinaïman.

¹⁶Chunyaj Sinaïpita aywacur chayaran Kibrot-hataavaman.

¹⁷Kibrot-hataavapita aywacur chayaran Hazerotman.

¹⁸Hazerotpita aywacur chayaran Ritmaman.

¹⁹Ritmapita aywacur chayaran Rimón-peresman.

²⁰Rimón-perespita aywacur chayaran Libnaman.

²¹Libnapita aywacur chayaran Rissaman.

²²Rissapita aywacur chayaran Ceelataman.

²³Ceelatapita aywacur chayaran Sefer jircaman.

²⁴Sefer jircapita aywacur chayaran Haradaman.

²⁵Haradapita aywacur chayaran Macelotman.

²⁶Macelotpita aywacur chayaran Tahatman.

²⁷Tahatpita aywacur chayaran Taraman.

²⁸Tarapita aywacur chayaran Mitcaman.

²⁹Mitcapita aywacur chayaran Hasmonaman.

³⁰Hasmonapita aywacur chayaran Moserotman.

³¹Moserotpita aywacur chayaran Bene-jaacanman.

³²Bene-jaacanpita aywacur chayaran Gidgadcho caycaj Horman.

³³Gidgadcho caycaj Horpita aywacur chayaran Jotbataman.

³⁴Jotbatapita aywacur chayaran Abronaman.

³⁵Abronapita aywacur chayaran Ezión-geberman.

³⁶Ezión-geberpita aywacur chayaran Zin chunyajman. Chayga caran Cades partina.

³⁷Cadespita aywacur chayaran Edom nasyunwan tincoj Hor jircamanna.

³⁸Chaypita cüra Aaronga TAYTA DIOS nishanno wicharan Hor puntaman. Chaycho wañucuran Israelcuna Egiptupita llojshimushan chuscu chunca watana caycaptin. Chayga caran pichga caj quilla rimir junajcho.

³⁹Hor jircacho Aaronga wañuran pachac ishcay chunca quimsan watayoj caycashanchömi.

⁴⁰Cananeo runa Aradpa rayninmi mayaran Israelcuna chayashanta. Chay ray tiyaycaran Canaán particho caycaj Neguevcho.

⁴¹Israelcunaga Hor puntapita aywacur chayaran Zalmonaman.

⁴²Zalmonapita aywacur chayaran Punonman.

⁴³Punonpita aywacur chayaran Obotman.

⁴⁴Obotpita aywacur chayaran Moabpa lindan Ije-abarimman.

⁴⁵Ije-abarimpita aywacur chayaran Dibón-gadman.

⁴⁶Dibón-gadpita aywacur chayaran Almón-diblataimman.

⁴⁷Almón-diblataimpita aywacur chayaran achca puntayoj Abarimman. Chayga Nebo puntapita inti yagamunan caj-läduchömi caycan.

⁴⁸Abarimpita aywacur chayaran Moab pampaman. Chay pampaga caycan Jordán mayupa jucaj lädunmi, Jericöpa chimpanchömi.

⁴⁹Moab pampa Jordán mayupa ñaupancho paycunaga tiyarcaycaran Bet-jesimot partipita-pacha Abel-sitim particama.

⁵⁰Jordán mayupa jucaj lädun Moab pampa, Jericöpa chimpancho Israelcuna tiyarcaycaptin Moisesta TAYTA DIOS niran:

⁵¹«Israelcunata willapanqui: Gamcuna Jordán mayuta chimpar Canaán nasyunman yaycur

⁵²chaycho tiyaycaj runacunata llapanta jitarinqui. Illgächiy rumipita rurashan, fyërrupita jundishan ïduluncunata. Ïduluncunata adurananpaj puytush lömacunacho rurashan capillancunatapis llapanta juchorgärachiy.

⁵³Gamcuna chay nasyunman yaycur tiyacaycäriy. Nogami gamcunataga tiyanayquipaj goycö.

⁵⁴Chacrata ichanga cada trïbucho ayca runacuna cashanman-tupu surtita jitaypa aypunqui. Achca runacuna captin achca chacrata aypunqui. Wallca runacuna captenga wallcallata aypunqui. Cada trïbu maynincho chacrata chasquinanpäpis surti töcashanchömi chacran canga.

⁵⁵«Chay nasyuncho tiyashpayqui jinan runacunata mana garguptiquimi ichanga canga ñawiquicho agu caycajno, chaquiquicho casha jatiraycajno.

⁵⁶Mana garguptiquega chiquishojniquicunata castigayta yarpashänöllami gamcunatana castigashayquipaj.»