Read Tayta Diosninchi Isquirbichishan Números 34 Bible Online

Números 34 - Tayta Diosninchi Isquirbichishan bible

Números 34

¹Moisesta TAYTA DIOS niran:

²«Israelcunata willapanqui: Gamcuna chayaycanquinami Canaán partiman. Chay partimi gamcunapa nasyunniqui canga. Lindancuna caynömi canga:

³«Sur caj-lädumanga tincuranga chunyaj jirca Zinwan Edom nasyunwan. Inti yagamunan caj-läpita gallaycurnami lindaga canga Cachi Lamarpa ura cantunpita.

⁴Chaypita sur caj-läpa linda aywaranga Acrabimman wichänacama. Zin partipa päsar chayaranga Cades-barnea nishancama. Chaypitana Hasar-adarpa päsar Asmón particama chayaranga.

⁵Asmonpa päsar chayanga Egiptupa lindan mayu-mallwa aywajcama. Chaypitana linda chayaranga jatun lamar Mediterraneocama.

⁶«Inti yaganan caj-läpaga lindan canga jatun lamar Mediterráneo cantullanpa.

⁷«Norte caj-läpaga linda canga jatun lamar Mediterraneopita Hor puntacama.

⁸Hor puntapitanami linda chayanga Hamat partiman yaycunacama. Chaypitana chayaranga Zedad particama.

⁹Zedad partipita norte caj lindaga chayaranga Zifrón particama. Nircurnami chay linda ushanga Hazar-enán particho.

¹⁰«Inti yagamunan caj-läpanami linda canga Hazar-enanpita gallaycur Sefam particama.

¹¹Sefampa päsar Ribla particama, Aín partiman inti yagamunan cajcama linda chayaranga. Chaypitanami linda päsaranga Cineret gocha cuchunpa.

¹²Nircur chay lindaga aywaranga Jordán mayullanpa Cachi Lamarman chayanancama. «Chaynömi lindancuna canga Israel-masiquicuna tiyananpaj caycaj nasyunpaga.»

¹³Israel-masincunata Moisesga willaparan: «Cay partitami gamcunaga surtipa raquipänacunqui. TAYTA DIOSNINCHÏMI nisha isgun caj trïbuwan mas pullan trïbu cay nasyunta raquipänacunayquipaj. Chay trïbucunallanami raquipänaconga.

¹⁴Chacran caycannami Rubén trïbu runacunapa, Gad trïbu runacunapa, pullan Manasés trïbu runacunapapis. Paycunaga chacrata maynami chasquisha famillyancunapäwan aypajta. Chasquishan chacracunaga caycan Jordán mayuman inti yagamunan caj-lächo Jericöpa chimpancho.»

¹⁶Moisesta TAYTA DIOS niran:

¹⁷«Chacrataga raquipanga cüra Eleazarwan Nunpa wamran Josuëmi.

¹⁸Paycunata yanapänanpäga cada trïbupa mandajnincunata churanqui.

¹⁹Aypöshejcunaga caycunami canga: Judá trïbupita canga Jefonepa wamran mandaj Caleb.

²⁰Simeón trïbupita canga Amiudpa wamran mandaj Semuel.

²¹Benjamín trïbupita canga Quislonpa wamran mandaj Elidad.

²²Dan trïbupita canga Joglipa wamran mandaj Buqui.

²³Josëpa wamran Manasés trïbupita canga Efodpa wamran mandaj Haniel.

²⁴Efraín trïbupita canga Siftanpa wamran mandaj Kemuel.

²⁵Zabulón trïbupita canga Parnacpa wamran mandaj Elizafán.

²⁶Isacar trïbupita canga Azanpa wamran mandaj Paltiel.

²⁷Aser trïbupita canga Selomipa wamran mandaj Ahiud.

²⁸Neftalí trïbupita canga Amiudpa wamran mandaj Pedael.»

²⁹Chay mandajcunatami TAYTA DIOSGA churaran Canaán partita Israelcunata raquipänanpaj.