Read Tayta Diosninchi Isquirbichishan Miqueas 3 Bible Online

Miqueas 3 - Tayta Diosninchi Isquirbichishan bible

Miqueas 3

¹Sumaj wiyay-llapa: Israelcunapa autoridänincuna, mandajnincuna, gamcunaga ¿manachu alli cajta ruranquiman?

²Chaypa ruquin gamcunaga alli cajta chiquiycanqui. Mana alli cajtana cuyaycanqui. Runacunataga pasaypanami garapachaycanqui. Chayno garapacharmi tullullantana cachaycunqui.

³Israelcunataga cawaycajtami ultacarcärinqui. Garancunata rachir-ushashpayqui tulluncunatapis paquirgärinquimi. Söpa mancaman wiñananpaj aychata rurashannömi gamcunaga ruraycanqui.

⁴Gamcunaga juc junaj TAYTA DIOSTA mañacunquipämi. Ichanga pay manami wiyashunquipänachu. Fiyupa mana allita rurashayquicunapitami gamcunapitaga juc-läpa ticracurcongapaj.

⁵Chayno caj profëtacunata TAYTA DIOSGA nin: «Israelcunaga manami alli cajta ruranchu. Chaynöga caycan profëtacuna llullapaptinmi. Chay profëtacunaga pipis micuyta garaycoj cajta ‹allillami goyanquipaj› nin. Micuyta mana garaj cajtanami ichanga ‹Mana allimi goyanquipaj› nin.

⁶Chaypitami gamcunataga manana musyachishayquinachu imata ruranäpaj cajtapis. Ima cananpaj cajcunatapis manami willapäshayquinachu.» Chay profëtacunapäga intipis yagacongami. Paycunapäga pachapis chacacäcongami.

⁷Chay profëtacunaga, musyacojcunaga pasaypa pengaychömi ricaconga. Ruwacushanta Tayta Dios mana willaptin paycunaga imata niytapis manami camäpacongapächu.

⁸Nogatami ichanga TAYTA DIOSPA Espiritun yanapäman callpayoj canäpaj, alli cajllata ruranäpaj, balurchanäpaj. Chaynöpami Israelcunataga mana wiyacoj cashanta, juchayoj cashanta niycä.

⁹Rayta mandäshej Israelcuna, Jacobpita mirajcunapa mandajnincunapis canan nishäta wiyamay. Gamcunaga manami alli cajta rurayta munanquichu. Lay nishancunatapis manami cumlinquichu.

¹⁰Chaypitami Jerusalén siudächöga waran-waranpis caycan mana alli ruraycunalla wañuchinacuylla.

¹¹Autoridäcunapis runacuna pacayllapa pägashan cajta alli arriglan. Cüracunapis guellayllapämi yachaycächin. Profëtacunapis guellayllapämi willacuycan. Chayno ruraycarpis «TAYTA DIOSMI yanapaycäman» nir riguichin. «TAYTA DIOSGA noganchïwanmi caycan. Ima mana allipis manami chayamäshunchu» nin.

¹²Gamcunapa juchayquipitami Sión lömaga quëdanga yapyashano. Jerusalén siudä quëdangapaj muntuy-muntuy rumicuna goturaycajlla. Templu caycashan jircachöpis mana alli jachacunallana juntasha canga.