Read Tayta Diosninchi Isquirbichishan Miqueas 4 Bible Online

Miqueas 4 - Tayta Diosninchi Isquirbichishan bible

Miqueas 4

¹Shamoj watacunacho TAYTA DIOSPA Templun caycashan puntaga waquin puntacunapita mas rispitashami cangapaj. Chaymanmi shamongapaj achca nasyun runacuna.

²Aypalla runami shamunanpaj shacyächinacushpan cayno ninaconga: «Aywashun-llapa, Jacobpa TAYTA DIOSNINPA Templun caycashan jircaman wichänapaj. Chaychönami yachachimäshun imano goyänanchïpäpis. Chaynöpana pay munashanno llapantapis rurashunpaj» nir. Sionpitami TAYTA DIOSGA yachachenga. Jerusalenpitanami parlapämonga.

³Tayta Diosmi jusganga llapan nasyun runacunata. May carucho caycaj nasyuncunatapis imano cananpäpis nenga. Chaura chay runacunaga sablincunatapis rëjamanmi ticrachenga. Tucsicuna lansancunatapis ösimannami ticrachenga. Juc nasyunwan juc nasyun manami guërrata ruranganachu. Guërrapäpis manami yachachinaconganachu.

⁴Chauraga mana manchacuypanami runacuna goyangapaj. Cada-ünunnami jamarpäcongapaj übas yöranpa, ïgus yöranpa llantuncunacho. Munayniyoj TAYTA DIOSMI nisha chayno cananpaj.

⁵Waquin nasyun runacunaga diosnincunatami aduran. Noganchïmi ichanga imaypis TAYTA DIOSNINCHI nimashallanchïta wiyacushun.

⁶TAYTA DIOSGA caynömi nin: «Chay junäga wegru uyshäcunata shuntashämi. Ogracasha caycajta, ñacaycajta canchanman shuntashaj.

⁷Chay wegrucunatami acrashaj. Chay ñacaycajcunatami munayniyoj nasyun cananpaj camacächishaj. Noga TAYTA DIOSMI acrashä runacunataga Sión lömapita-pacha imaycamapis mandashäpaj.

⁸Sión gammi caycanqui uyshacunata ricachacuna törri. Gammi canqui chaycho tiyajcunapa pacacunan. Yapaymi ñaupatano rispitädu canquipaj. Jerusalén yapaymi capital canquipaj.»

⁹Cananga ¿imanirtaj nanay chariptin warmi gaparajno gaparanqui? ¿Manachu rayniqui can? U ¿tantiyachishojniquichu wañusha?

¹⁰Sión siudächo tiyajcuna, nanaywan guempuycachay. Nanaycho caycaj warminöpis gaparay ari. Gamcunaga cay siudäpita aywacunquipämi. Chunyaj jircacunachömi tiyanquipaj. Babilonia nasyunmanmi prësu apashunquipaj. Chaypitanami TAYTA DIOSGA salbashunquipaj contrayquipa munayninpita.

¹¹Cananga achca nasyun runacunami gampa contrayqui shuntacasha carcaycan. Paycunami cayno parlan: «¡Jerusalén ushacaycunman! ¡Chauraga fiyupa cushicurmi ricapashwan!» nir.

¹²Ichanga chay nasyun runacuna manami musyanchu TAYTA DIOSPA yarpaynin imano cashanta, ni imata rurananpaj yarpaycashantapis. Manami musyanchu rïguta ëraman shuntajno TAYTA DIOS shuntaycashanta.

¹³TAYTA DIOSGA caynömi nin: «Sión runacuna, jatarcärir ërayna-llapa. Nogami yanapäshayqui fyërrupita wagrayoj, runsipita shilluyoj töruno fiyupa callpayoj canayquipaj. Chaynöpami achca nasyun runacunata lluchcar-ushanquipaj. Mana allita ruraypa tarishan cösancunatapis gamcunami guechunquipaj. Nircorga llapanpaj munayniyoj noga TAYTA DIOSNIQUITAMI goycamanquipaj.»