Read Tayta Diosninchi Isquirbichishan Miqueas 5 Bible Online

Miqueas 5 - Tayta Diosninchi Isquirbichishan bible

Miqueas 5

¹Chaymi cananga Jerusalén runacuna chapacunayquipaj camaricuy. Gamcunamanga jäpa runacunami yaycamongapaj. Paycunami Israelcunapa mandajnintaga fiyupa magangapaj.

²Ichanga Judächo caj marcacunapita mas tacsha Belén Efrata marca, gamchömi Israelcunapa raynin yurengapaj. Payga yurenga mas unay famillya aywarajpitami.

³Cananpitaga Tayta Dios cachaycushunquipämi. Ichanga manami unaycamachu cachaycushunquipaj. Chayga canga gueshyacunanpaj caycaj warmi gueshyacunancamallami. Chaypitaga chay yurejmi Israel-masincunawan shuntacanga. Shuntacanga prësu aywashanpita cutimojcunawan.

⁴Paynami marca-masincunataga TAYTA DIOSPA munayninwan mandanga. Uyshëru uyshata michejnöpis ricanga. Chaura paycunaga allillanami goyangapaj. Chaynöga cangapaj intëru munducho paytana pï-maypis rispitaptinmi.

⁵Pay mandaptenga alli goyaymi cangapaj. Asiria runacuna nasyunninchïman yaycamuptin, palasyunchïcunaman yaycuptin, paycunaman cachashun ganchis mandajninchïcunata, pusaj mas rispitädu runacunatapis.

⁶Chaura paycunami pushamäshun Asiria runacuna cajman, Nimrodcho tiyajcunata binsiycur mandananchïpaj. Paycunami salbamäshunpaj Asiria runacuna nasyunninchïman yaycamuptinpis.

⁷Chaura Jacobpita miraj quëdajcunaga intëru nasyuncunachömi caycangapaj. Shullayta TAYTA DIOS guewaman cada tuta chayachimushannömi caycanga. Chaycunataga manami runachu chayachimun. Chaypa ruquenga Diosllami chayachimun.

⁸Chaynöpis Jacobpita miraj quëdajcunaga intëru nasyuncunachömi aypacasha caycangapaj. Animalcunacho manchacuypaj liyun caycajnömi caycangapaj. Liyonga uyshacunata charishpan rachir-usharinmi. Cawaycajtaga manami ni jucnayllatapis cachaycunchu.

⁹Tayta Dios, gamga chaynömi illgächinquipaj contrayqui jatarejcunata.

¹⁰TAYTA DIOSGA Payllaman yäracunanpämi Israelcunataga cayno nin: «Chay junäga cawalluyquicunatapis wañuchishämi. Guërrapaj caj carrëtayquicunatapis illgächishämi.

¹¹Siudäniquicunatapis illgächishaj. Pacacunayquicunatapis ushajpämi juchurgärachishaj.

¹²Brüjucunatapis ushajpämi illgächishaj. Chaura gamcunachöga manami cangapänachu musyacojcunapis.

¹³Ïduluyquicunatapis, rispitashayqui wancacunatapis ushajpämi illgächishaj. Chayno ruraptëga imaypis manami aduranquipänachu quiquiquicuna ‹diosnë› nir rurashayquita.

¹⁴Rispitashayqui Asera diosa-niraj ïdulutapis ushajpämi jitarishaj. Siudäniquicunatapis ushajpämi juchurgärachishaj.

¹⁵Noga nishäta mana wiyacoj nasyun runacunatami ichanga fiyupa rabyawan castigashaj.»