Read Tayta Diosninchi Isquirbichishan Miqueas 6 Bible Online

Miqueas 6 - Tayta Diosninchi Isquirbichishan bible

Miqueas 6

¹Israelcuna, TAYTA DIOS nishanta wiyay-llapa. Paymi nin: «Lömacuna wiyaycäshuptiqui ichircur difindicuy ari. Imata rimashayquitapis puntacuna wiyachun.

²Mundu mana cuyucunanpaj tucnaraycaj simintuncunapis puntacunapis sumaj wiyay-llapa. Acrashä runacunatami jusgaj-aywä. Israel runacunatami imata rurashallantapis jorgapaj-aywä.

³Israelcuna, mä canan nimay. Gamcunataga ¿imatataj rurashcä? ¿Imachötaj rabyachishcä?

⁴Gamcunataga uyway caycajta salbashpä Nogami Egiptupita jorgamurä. Nogami cachamurä Moisesta, Aaronta, Mariata llojshicamuptiqui paycuna pushamushunayquipaj.

⁵Acrashä runacuna, cananga yarpäriy Moabpa raynin Balac gamcunapa contrayqui imano yarpashantapis. Chaynöpis yarpäriy Beorpa wamran Balaam imano nishantapis. Yarpäriy Sitimpita Gilgalcama imano aywashayquitapis. Chaynöpami musyanqui noga TAYTA DIOSNIQUI gamcunapaj allicunata rurashäta.»

⁶Capas pillapis ninman: «¿Imalläwanraj aywashaj TAYTA DIOSPA ñaupanman? ¿Imallawanraj janaj pachacho caycajta adurashaj? ¿Paypa ñaupanmanga aywashaj rupachipänäpaj cajta apacurcurchuraj, u watayoj besërata apacurcurchuraj?

⁷¿TAYTA DIOS cushicunmanchuraj waranga uyshacunata paypaj pishtaptë? ¿Aypalla mayu aywaycajtanöraj asëtita goycuptë chasquinmanchuraj? ¿Paypa contran jatarishäpita, juchäcunapa ruquin, guechpa wamräta sacrifisyupaj pishtapaptë chasquimanmanchuraj?»

⁸Runa, TAYTA DIOSGA maynami nisha-cashunqui, alli cajllata, pay munashan cajllata ruranayquipaj. Payga munan: Alli cajllata ruranayquitami, pï-maytapis cuyanayquitami, imata Tayta Dios nishushayquitapis wiyacur cumlinayquitami.

⁹TAYTA DIOSGA Jerusalén siudächömi gayaraycan. Payga cayno nin: «Siudächo caycajcuna llapayqui wiyay. Tantiyachejcunapis wiyay.

¹⁰Fiyu runacunapa wasinchöga ima-aycanpis caycan mana allita rurar shuntashallanmi. Chaynöpis chaychöga caycan chiquishä caj suwa tupullami.

¹¹¿Imanöpataj perdunashaj suwa balansayojta, pishejlla pësacunayojtaga?

¹²Cay siudächo caj rïcucunaga llapanpis ñacachicojcunallami. Llapanpis llullacunallami caycan.

¹³Chaypitami cananga gamcunata castigayta gallaycushayqui, juchayquicunapitapis illgächiyta.

¹⁴Micurpis manami sacsanquipächu. Jinallami yargaycanquipaj. Ima-aycatapis shuntar churanquipaj. Chayno churarpis manami imatapis jorgunquipächu. Imallatapis quëdachisha captiquega Nogami camacächishaj guërrachöna ushacänanpaj.

¹⁵Murupacurpis manami shuntapacunquipächu. Olivota agarpis asëtinwan manami imatapis ruranquipänachu. Übasta lluchcarpis manami bïnuta upunquipänachu.

¹⁶Chaynöga cangapaj ray Omriwan, ray Acabpa famillyancuna nishancunata, rurashancunata, wiyacur rurashayquipitami. Chaypitami cananga noga camacächishaj Jerusalenta illgächinanpaj. Chaycho tiyaj runacunataga pasaypa manacajmanmi churanga. Llapan nasyun runacunami jamurpangapaj acrashä runacunataga.»