Read Tayta Diosninchi Isquirbichishan Nahúm 1 Bible Online

Nahúm 1 - Tayta Diosninchi Isquirbichishan bible

Nahúm 1

¹Cay libroga caycan Nínive imano cananpaj cashantapis Nahumta Tayta Dios ribilashanmi. Nahúm tiyaran Elcos marcachömi.

²TAYTA DIOSGA payllata sirbinanchïtami munan. Mana allita rurashaga pay rabyar castigacunmi. Pay nishanta mana rurajcunataga rurashanmannömi castïguta gon. Paypa contran cajcunapäga fiyupami rabyan.

³TAYTA DIOSGA fiyupa munayniyojmi. Chaymi jucha ruraj cajtaga castigänita mana cachaycongachu. Ichanga juclla manami rabyacunchu. TAYTA DIOSGA aywan löcu tamya jananpami, gachwariycar aywaj wayra jananpami. Pucutayga caycan chaquin polbuta jatarachishanmi.

⁴Lamartapis ollgöparga chaquirachinmi. Paymi camacächin llapan mayucuna chaquinanpäpis. Chaymi Basán particho, Carmelo jircacunacho jachacuna caycajpis wañuytacäcun. Libanucho caycaj waytacunapis wañuytacäcun.

⁵Payta ricashpanga puntacunapis sicsicyan. Paypa ñaupanchöga puntacunapis jurucäcunmi. Payta ricashpanga intëru cay mundumi mancharin. Cay pachapis, cay pachacho tiyajcunapis llaquicun.

⁶Pay fiyupa rabyasha caycashan öraga ¿piraj ichiraycanman? ¿Piraj awantanman rabyasha caycaptenga? Paypa rabyaynenga nina wapchacojnömi. Chaynöpis, paypa ñaupanchöga gagacunapis shillicäcunmi.

⁷TAYTA DIOSGA fiyupa allimi. Payga ñacaycashanchi öra pacamajninchïmi. Payman yäracoj cajcunataga imapitapis chapanmi.

⁸Paypa contran cajcunatami ichanga mayu chayar ima-aycatapis apacushanno illgarachin. Paypa contran cajcunataga yanauyaycaj chacaychöpis gaticachangami.

⁹Nínive runacuna ¿gamcunaga imanirtaj TAYTA DIOSPA contran yarparcaycanqui? ¡Payga ushajpämi illgarachishunquipaj! Paypa contran cajcunataga illajpitami ushajpaj illgarachenga.

¹⁰Shiraca chaquir jiracasha caycajtanömi, chaquisha ogshata nina ushacurcojnömi usharenga.

¹¹Nínive siudä, gampitami yurimusha TAYTA DIOSPA contran jatarëga. Chay runami juc runacunata shimita jatipaycan.

¹²Chaypitami TAYTA DIOSGA Judá runacunata nin: «Asiria runacunaga callpayoj aypalla cashpanpis illgangami. Nishänömi ushacangapaj. Gamcunataga ñacachishcänami. Cananpitaga manami ñacachishayquipänachu.

¹³Ñacachishushpayqui yüguta churapäshushayquitapis ichic-ichicllami paquirishaj. Wataraycashayqui cadinatapis agullargärishämi.»

¹⁴Nínive runacuna, gamcunapäga TAYTA DIOS caynömi nisha: «Gamcunapita mirar aywäga manami cangapänachu. Diosniquicunapa templuntapis juchuchishämi. Uywa-niraj ïduluyquicunatapis illgächishämi. Gamcunatapis melanaypaj captiquimi ushajpaj usharishayquipaj.»

¹⁵¡Judá runacuna, masqui ricay! Willacoj maynami jircacunapa aywaycämun alli goyay cananpäna willapata apamushpan. Diosta adurana fistayquicunata rurayna. Tayta Diosta aunishayquicunatapis cumliyna. Yapayga imaypis manami fiyu runacunapa munaynincho canquipänachu. Chay fiyu runacunaga ushajpänami ushacasha.