Read Tayta Diosninchi Isquirbichishan Nahúm 3 Bible Online

Nahúm 3 - Tayta Diosninchi Isquirbichishan bible

Nahúm 3

¹¡Ay imanöraj canqui wañuchicur yawar mashtaraycajta cachaycoj Nínive runacuna! Gamcunaga llullacuyllatami, wañuchinacuyllatami arurcaycanqui. Mana jamaypami imaypis suwacurcaycanqui.

²Sumbadurnincunata pashtachishanpis wiyacanganami. Cawallucuna pagrarayllana cörrishan, carrëtacuna aywashanpis wiyacanganami. Ruyrancuna tumarishanpis wiyacanganami.

³Ricacanganami muntäducuna shamushanpis. Espäda achicyaypa achicyashanta, lansancuna chip-chipyashantapis ricay. Waranganpa waranganpami malubrashacunapis canga. Gotuyninpa-gotuyninpami wañushacunapis canga. Intëruchömi wañushacunaga mashtaräconga. Chayno captinmi mayman lluchcananpäpis mana jäcongachu.

⁴Nínive, chaynöga päsashurayqui guellaypaj cacoj warmino achca nasyuncunata engañashayquipitami. Cuyayllapaj captiquimi juc-lä nasyuncunapis cuyacurcushurayqui. Chaymi engañayta, brüju rurayta yachacusha.

⁵Munayniyoj TAYTA DIOS caynömi nin: «Nogaga gampa contrayquimi caycä. Juc-lä nasyuncuna galallata ricashunayquipämi umayquiyaj justanniquitapis shucuparcushayqui. Chaymi fiyupa pengaycho ricacunquipaj.

⁶Fiyupa pengaycho canayquipämi camacächishaj. Pengacunayquipaj ganra berbäjitami jillpushayqui.

⁷Llapanpis ricashojcunaga gueshpirmi aywaconga cayno nishpan: ‹¡Nínive siudäga illgächishami caycan! ¿Piraj cuyapayconga? ¿Maychöraj pillatapis tarishwan shogananpaj?›

⁸«Nínive, ¿gamga Tebas siudäpita mas munayniyojchuraj canqui? Chay siudäga caycan Nilo mayupa lädunchömi. Jatun mayumi chaparaycan. Intëru cantunpa yacumi curalaraycan.

⁹Chay siudätaga Etiopiawan Egiptumi fiyupa munayniyoj cashpan imaypis washaj. Fut runacunawan Libia runacunanami imaypis yanapaj.

¹⁰Chayno caycajtami Tebas runacunataga prësu aparan. Wamrancunatapis cällipa isquïnancunaman apaycur pagshirgäriran. Mayur runacunata apacunanpaj surtita jitaran. Mandajnincunatanami cadinacunawan watacarcärir prësu apacuran.

¹¹Gampis chaynömi machasha runano tapraycachaycanquipaj. Imata ruraytapis mana camäpacushpayquimi contrayquicunapita pacacunquipaj. Pacacunayquipaj ashir purinquipaj.

¹²«Llapan curalasha siudäniquicunaga canga ïgus yöra pogur päsaycajnömi. Chay yörata pipis tapsiptenga ïgus shicwacun cuyuchej micucurcunanpaj maquillamanna.

¹³Suldäruyquicunaga caycan warminöllami. Rancayquicunata nina rupar ushashanpitami siudäniquicunapa puncuncunapis quicharaycan. Chaymi contrayquicuna yaycamunanpaj libri caycan.

¹⁴Gamcunaman contrayqui yaycamuptin yacunayta awantanayquipaj yacuta churacuy. Curral pergayquicuna mas sinchi cananpaj yapay. Mituta lluchcay. Nircorga gabërawan adöbita chutay.

¹⁵Ichanga chaychömi nina ushashunquipaj. Sabliwanmi wañunquipaj; ushajpämi illgächishunquipaj. ¡Chüpacano aypallaman miray ari! ¡Chüpacacunano aypallaman miray ari!

¹⁶Gamcuna cajcho nigusyanticuna goyllarnörämi mirasha. Chayno captinpis chüpacacuna älan wiñarcuptin pärir aywacushannömi aywacongapaj.

¹⁷Guërrapaj runacunata charejcunaga caycan chüpacacunanömi. Mandajcunaga caycan chuspi gashyariycajnömi. Curucuna gasaywan pergacunaman lagacashannömi wiyacuycun. Inti ratarcamuptenga aywacun. Manami pipis musyannachu maypa aywashantapis.

¹⁸«¡Asiriapa raynin, mandäshishojcunaga imanöshi puñucasha carcaycan! Mandaj suldäruyquicuna jamaparcaycan. Runacunanami wacpa caypa machicasha carcaycan. Manami pipis canchu juc pachaman chaycunata shuntananpäga.

¹⁹Manami jampi cannachu gueriquipaj. Gueriquega caycan mana allchacajmi. Mana alliman chayashayquita mayajcunaga llapanmi cushicuywan macshongaraj. ¿Pï-mayraj mana ñacashachu fiyupa ñacachiptiqui?»