Read Tayta Diosninchi Isquirbichishan Sofonías 1 Bible Online

Sofonías 1 - Tayta Diosninchi Isquirbichishan bible

Sofonías 1

¹Amonpa wamran Josías Judäpa raynin caycashan wichanmi TAYTA DIOSGA Sofoniasta ribilaran. Sofonías caran Cusipa wamran, payna Gedaliaspa wamran, payna Amariaspa wamran, payna Ezequiaspa wamran.

²TAYTA DIOSGA caynömi nin: «Munducho cajtaga ushajpämi illgächej-aywä.

³«Illgächej-aywä runacunata, animalcunata. Chaynöllami illgächishaj äbicunata, pescäducunatapis. Fiyu runacuna mana alliman chayananpämi camacächishaj. Chaynöpami allpa jananpitaga ushajpaj runacunata illgächishaj.» TAYTA DIOSGA caynömi nin:

⁴«Judá runacunatami castigaj-aywä. Jerusalencho tiyajcunatapis castigajmi-aywä. Chay partipaga ushajpämi Baal dios-niraj ïdulucunata llapan cürancunatapis illgächishaj.

⁵Wasin jananman wichaycur syëlucho caycaj goyllarcunata adurajtapis illgarachishämi. Gongurpacushpan nogapa jutëcho jurarcur ‹dios Milcompa jutincho› nir jurajcunatapis illgächishämi.

⁶Illgächishämi nogata gongaycamajcunata, Noga nishäta rurananpaj mana yarpachacojcunata, mana tapucamajcunatapis.»

⁷TAYTA DIOS caynömi nin: «Upällalla cay-llapa. Jusganäpaj caj junäga chayaycämunnami. Chay junajpäga llapanpis camarishallanami caycan. Gayachishäcunapis chayamushanami.

⁸Chay jusganä junäga castigashaj mandajcunata, raypa wamrancunata y juc-lä nasyun runacunano röpata jaticojcunatapis.

⁹Castigashäpaj juchasapa runacunapa custumrintano rurajcunata, wañurcachir, llullacur suwapaypa ima aycatapis mandajninpa wasinman shuntajcunata.»

¹⁰TAYTA DIOSGA caynömi nin: «Chay junäga yanapänanpaj gayacushan wiyacanga Pescädu jutiyoj puncupita-pachami. Siudäpa cantun baryucho gaparashanpis wiyacangapämi. Ñaupan lömacunacho gaparashanpis fiyupa manchariypämi wiyacangapaj.

¹¹Mactes baryucho tiyaycajcunaga llapaniqui gaparpay. Chay junäga llapan nigusyanticunami wañongapaj. Llapan guellayta rucajcunami illgangapaj.

¹²Chay wichanga lamparinwan achquicurcurmi Jerusalencho tiyajcunataga acramushaj. Nircur castigashaj pogusha bïnupa gonchun tiyacurcushanno mana yarpachacuypa caycaj runacunata. Chay runacunaga caynömi nircaycanpis: ‹¡TAYTA DIOSGA manami imatapis rurangachu allita ni mana allitapis!› nir.

¹³Chaypitami ima-ayca charashancunatapis juc runacunana guechurcur apaconga. Wasincunatapis illgächenga. Tiyananpaj wasicunata arushanchöga manami tiyangapänachu. Übascunata lantashanpa bïnuntapis manami upongapänachu.»

¹⁴TAYTA DIOS jusganan junaj chayamunanpäga wallcanami pishin. Chay junäga rätumi chayaraycamoj-aywan. Chay junäga canga fiyupa manchariypämi. Chaura mana manchacojnin cajpis gaparangami.

¹⁵Chay junäga Tayta Dios fiyupa rabyashami caycanga. Chay junäga canga fiyupa llaquicuy junajmi, ima-aycapis ushacänan, illgänan junajmi, fiyupa yanauyaycaj chacaymi.

¹⁶Chay junäga intërunpa curalasha caycaj siudäcunaman magaj yaycunanpämi, jatuncaray törricuna caycajmanpis yaycunanpämi trompëtata tucashpan mandanga.

¹⁷TAYTA DIOSGA caynömi nin: «Llapan runacunami nogapa conträ juchata rurasha. Chaypitami runacunataga ñacayman chayachishaj. Chaynöpami gapra runacunano purenga. Yawarninpis ñuchu allpanömi mashtaranga. Aychannami uywapa iscanno mashtaranga.»

¹⁸TAYTA DIOS jusganan junäga manami runata salbangapächu guellaynin ni gori charashanpis. Tayta Dios rabyasha caycashanga ninanörämi nasyun intëruta usharengapaj. Cay pachacho tiyajcunataga llapantami juc guepishtayllacho usharengapaj.