Read Tayta Diosninchi Isquirbichishan San Lucas 1 Bible Online

San Lucas 1 - Tayta Diosninchi Isquirbichishan bible

San Lucas 1

¹Musyashayquinöpis waquinpis isquirbishami Jesusta ima päsashantapis.

²Chay isquirbejcunaga isquirbiran Jesuspa disïpuluncuna willapashantami. Chay willajcunaga caran Jesusta ima päsashantapis quiquin ñawinwan ricajcunami, paypa willacojnincunami.

³Chaymi nogapis Jesuspita musyajcunata imano cashallantapis sumaj tapucachashcä. Tayta Teófilo, chaytami isquirbimö sumaj camacächiypa, gallaycunanpita-pacha imano cashantapis.

⁴Chaynöpami gamga ñaupata willapäshushayquicuna rasunpa cashanta sumaj musyanquipaj.

⁵Judeapa raynin Herodes cashan wichan juc cüra caycaran Zacarías jutiyoj. Zacariasga Abías cürapita miraj cashpanmi chay casta cüracunawan iwal aroj. Zacariaspa warminpa jutinmi caran Elisabet. Paypa taytanpis Aaronpita mirar aywaj cürami caran.

⁶Paycunaga imaypis Tayta Dios mandashanta cumlirmi goyaj. Chaymi paycunapäga pipis washanta mana rimajchu.

⁷Ishcanpis caran auquin chacwanna. Elisabet mana wawa tarej captin, manami wamran caranchu chacwanna cashancamapis.

⁸Chayno carcaycaptin Zacariaswan caj cüra-masincunapa turnun chayamuran Tayta Diospa ñaupancho cüra cayninta rurananpaj.

⁹Chaura imaypis rurashannöraj surtita jitaran maygan cüra Templu ruriman insinsuta rupachej yaycunanpäpis. Chaycho töcaran Zacarías yaycunanpaj. Chaymi yaycuran Templu ruricho rispitädu caycashan cuartuman.

¹⁰Ruriman yaycuycur insinsuta rupachishancamaga llapan runacuna jawallacho Tayta Diosta mañacurcaycaran.

¹¹Zacarías rupaycächiptin, juc anjil yuriparan insinsu rupachicuna altarpa derëchu caj-läduncho.

¹²Zacariasga ricärir fiyupa mancharir ima ruraytapis mana puydiranchu.

¹³Chaura anjil niran: «Zacarías, ama manchacamaychu. Mañacushayquitami Tayta Dios wiyashurayqui. Chaymi warmiqui Elisabet gueshyaconga ollgu wamrata. Jutintami churapanquipaj ‹Juan› nir.

¹⁴Payga fiyupami cushicachishunquipaj. Yurishanpitapis achcajmi cushicongapaj.

¹⁵Tayta Dios munashanno rurashpanmi Tayta Diostapis cushicachengapaj. Bïnuta ni ima machächicojtapis mana upojmi cangapaj. Manaraj yurishanpita-pachami Espíritu Santupa munayninwanna caycangapaj.

¹⁶Chaymi Tayta Diospa willacuyninta willacuptin Israel runacuna juchancunata cacharir Tayta Dios munashanno goyanga.

¹⁷Tayta Diospa munayninwan Elías willacushannömi paypis willacongapaj.[1] Tayta Dios shamunanpaj caycaptin, willacushpanmi willapanga papäninpis wamrancunawan amistananpaj, mana wiyacojcunapis Tayta Dios munashannöna goyänanpaj. Chaynöpami runacunata shacyächenga Tayta Dios cachamushan Cristuta alli chasquicunanpaj.»

¹⁸Chaura anjilta Zacarías tapuran: «¿Rasunpachuraj canga nimashayquega? ¿Imanöpataj musyashaj rasunpa cashanta? Nogaga auquinnami cä. Warmëpis chacwannami.»

¹⁹Anjilnami niran: «Nogaga Tayta Diospa sirbejnin Gabrielmi caycä. Paymi cachamasha cay alli willapata willanäpaj.

²⁰Canan nishäta mana riguishayquipitami cananpitaga shimiqui läbacäconga wamrayqui yurinancama.»

²¹Chaycamaga jawacho cajcuna shuyarpaycaran «¿Imanir-raj mana llojshimunchu?» nir yarpachacushpan.

²²Chaura Zacariasga Templupita llojshimur rimayta mana pashtachirannachu. Maquinwan sëñallapana tantiyachiran chaycho caycaj runacunata. Chaymi runacunaga cuentata gocuran Templu ruricho Tayta Dios imatapis ricachishanta.

²³Templucho ayca junajpis rurananpaj caj ruraynincunata ushaycur Zacariasga wasinmanna cuticuran.

²⁴Chaypita, warmin Elisabetga gueshyaj ricacushpan pichga quilla wasillancho goyäcuran.

²⁵Cushicushpan niran: «Ima allishi Tayta Dios yanapämasha wawata tarinäpaj. Cananga manami pipis manacajman churamanganachu.»

²⁶Elisabet gueshyaj ricacushanpita sojta quillatanami anjil Gabrielta Tayta Dios cacharan Galilea probinsyacho caycaj Nazaret marcaman.

²⁷Chaychöga virjin Mariami tiyaran. Payga José jutiyoj runawan tiyananpämi parlashana caycaran. Josëga caran Davidpita mirar aywajmi.

²⁸María caycashan cajman yaycurir anjil niran: «¡Cushicuy María! Tayta Dios acrashanmi canqui. Paymi gamwan caycan.»

²⁹Chayno niptin fiyupa yarpachacuran: «¿Chaynöga imanir-raj nimasha?» nir.

³⁰Anjilga niran: «María, ama manchacuychu. Tayta Diospa ricay-ñawincho allimi canqui.

³¹Cananmi gueshyaj ricacunqui. Ollgu wamratami gueshyacunquipaj. Jutinta churapanquipaj ‹Jesús› nir.

³²Munayniyoj captinmi paypäga ‹munayniyoj Tayta Diospa wamran› nengapaj. Paytami unay caj famillyan Davidno ray cananpaj Tayta Dios churanga.

³³Chaura llapan Israelcunaga imaycamapis paypa munayninchönami canga. Pay mandashanga imaypis manami ushacangachu.»

³⁴Chayno niptin Mariaga tapuran: «Runawan manaraj caycaptëga ¿imanöpataj wamrä canga?»

³⁵Niptin anjil niran: «Espíritu Santu gamman chayamuptinmi Tayta Diospa munaynin pucutay llantupajno chayamongapaj. Chaynöpami chay yurinanpaj caj wamrayquitaga ‹Diospa Wamran› nenga.

³⁶Chaynömi famillyayqui Elisabetpis chacwanna caycashpan sojta quillana gueshyaj caycan. Paypämi rimaj ‹Mana wawata tarej warmi› nir.

³⁷Tayta Diospäga imapis sasaga manami canchu.»

³⁸Chayno niptin Mariaga niran: «Nogaga Tayta Diospa munayninchömi caycä. Nimashayquino pay nogacho rurachun ari.» Chaypitanaga anjil aywacuran.

³⁹Anjil nishanpita warannincuna Mariaga juclla aywaran Judea probinsyapa jircancunacho caycaj marcaman.

⁴⁰Zacariaspa wasinman yaycurir Elisabet-ta saludaran.

⁴¹Saludaptinmi Elisabetpa pachancho caycaj wamrapis cuyuriran. Chauraga Espíritu Santupa munayninwanmi Elisabet cushicushpan Mariata niran:

⁴²«¡Llapan warmicunapita masmi gamtaga Tayta Dios bindisyunta goshurayqui! Gueshyaj caycashayqui wamrayquitapis paymi bindisyunta goycan.

⁴³Cristupa maman caycashpayqui watucamaj shamunayquipäga ¿pitaj nogaga cä?

⁴⁴Saludamashayquita wiyarcuptë jinan örami pachächo caycaj wamräpis cushicuypita cuyusha.

⁴⁵Tayta Diosninchi nishushayquicunata riguishayquipita fiyupa cushishami canquipaj.»

⁴⁶Chayno niptin María niran: «Llapan shongöwanmi Tayta Diosta alabä.

⁴⁷Fiyupami cushicö salbamaj Tayta Dios acramashanpita.

⁴⁸Umildi uywaynin caycashätami ricamasha. Cananpitaga imaycamapis nogapaj nenga: ‹Tayta Dios bindisashanmi› nir.

⁴⁹Munayniyoj Tayta Diosmi yanapämashpan almiraypajcunata nogacho rurasha. Paypaga jutinpis Santumi.

⁵⁰Pay munashanno cawajcunata Diosninchëga imaycamapis cuyapangami.

⁵¹Munayninwanmi rurasha fiyupa almiraypajcunata. Munayniyoj-tucojcuna yarpashancunatapis manami camacächishachu.

⁵²Mandajcunatami despächuncunapita jitarachisha. Umildicunatami ichanga alli cayman churachisha.

⁵³Yargaycho caycajcunatami garachisha. Rïcucunatami ichanga jinayllata garguchisha.

⁵⁴Munaynincho goyaptin sirbejnin Israelcunata yanapasha. Payga imaypis cuyapaycanmi.

⁵⁵Chayno cananpämi unay caj awilunchïcunata ‹rurashäpaj› niran Abrahamta, paypita mirajcunatapis.»

⁵⁶Mariaga Elisabetpa wasincho quimsa quillano goyarcur wasinpana cuticuran.

⁵⁷Gueshyacunanpaj quillanchöna cashpan Elisabetga ollgu wamrata gueshyacuran.

⁵⁸Chayta musyaycur, famillyancuna rejsinacushancunapis shamuran «Elisabet-taga Tayta Dios allimi yanapasha» nir cushicushpan.

⁵⁹Itin pusaj junajyoj caycaptinna Zacariaspa wasinman aywaran custumrin cashanno itita señalananpaj.[2] Chaycho itipa jutintaga churapayta munaran papänin Zacariaspa jutillanta.

⁶⁰Chaura maman niran: «¡Manami! Jutenga Juanmi canga.»

⁶¹Chayno niptin paycuna niran: «¿Imanirtaj chay jutita churapayta munanqui? Famillyayquicuna chay jutiyöga manami canchu.»

⁶²Chaymi ima jutita churapänanpäpis sëñallapa Zacariasta tapuran.

⁶³Tapuptin tabla-mallwata mañacuran chayman isquirbinanpaj. Tabla-mallwacho isquirbiran «Juanmi jutenga» nir. Chaura llapan almirasha ricacuran.

⁶⁴Jinan öra rimayta pashtaraycachir Zacariasga parlayta gallaycuran. Chaura Tayta Diosta alabaran.

⁶⁵Chayno päsashan willapa mashtacaptin wiyajcunaga almirasha ricacoj. Chaypaj parlaj intëru Judeacho, jircacunacho caycaj marcacunachöpis.

⁶⁶Parlajta wiyajcuna yarpachacur nej: «Chay wamraga Tayta Diospa munayninwanmi yurishapis. Jatunyarga ¿ima munayniyojraj canga?»

⁶⁷Wamrapa papänin Zacariasga Espíritu Santu musyachiptinmi imano cananpaj cashantapis cayno rimaran:

⁶⁸«Alabasha cachun Israelcuna adurashan Tayta Diosga. Payga shamusha ñacaycho caycaj marcanta jorgunanpämi.

⁶⁹Sirbejnin Davidpa castanpitami munayniyoj runata yurichenga salbamänanchïpaj.

⁷⁰Chayno cananpäga Tayta Dios unaynami willachimaranchi acrashan profëtancunawan.

⁷¹Willachimaranchi ñacachimajninchïpita salbamänanchïpaj, chiquimajninchïpa munayninpita jorgamänanchïpaj.

⁷²Chayno cashpanmi musyachimaranchi unay caj awilunchicunata cuyapashanta, conträtuta rurar aunishancunata mana gongashantapis.

⁷³Conträtuta rurar aunishpanmi Abrahamta musyachiran

⁷⁴chiquimajninchïcunapita jorgamänanchïpaj, payllatana mana manchacuypa sirbinanchïpaj,

⁷⁵pay munashannöllana imaycamapis paypa ñaupancho allita rurar goyänanchïpaj.»

⁷⁶Iti wamrantanami Zacarías niran: «Gamga runacunata willapanquipaj Salbacoj shamuptin chasquicunanpämi. Chaymi gampäga nengapaj ‹Mas Munayniyoj Diospa profëtan› nishpan.

⁷⁷Runacunata willapanquipaj Tayta Dios perdunashpan salbananpaj caycashanta.

⁷⁸Tayta Diosga fiyupa cuyamashpanchïmi juc Salbacojta syëlupita cachamusha. Chayga noganchïpaj caycan tutapa inti yagamojnömi.

⁷⁹Chaura payga chacaj pachacho achicyacurcojnömi canga. Payga salbangami wañuyman chayananpaj caycajcunata. Chaynöpami allina goyänanchïpaj pushamäshunpaj.»

⁸⁰Zacariaspa wamran Juanga wiñayllan-tupu mas alli yacharan Dios munashanno goyashpan. Chunyaj jircacunallacho tiyacuran Israel-masincunaman willapaj chayanancama.