Read Tayta Diosninchi Isquirbichishan San Lucas 3 Bible Online

San Lucas 3 - Tayta Diosninchi Isquirbichishan bible

San Lucas 3

¹Mandaj Tiberio César chunca pichga (15) watana llapan nasyunpa mandajnin caycaran. Chayno Poncio Pilatupis Judea probinsyacho gobernador caycaran. Herodesnami Galilea probinsyacho mandaj caycaran. Herodespa wauguin Felipina mandaj caycaran Itureawan Traconite particho. Lisaniasna mandaj caycaran Abilinia particho.

²Jerusalenchöna Anás y Caifás caycaran llapan cüracunapa mas mandajnin. Chay wichan Zacariaspa wamran Juan chunyaj jircacho caycaptin Tayta Dios niran willacuyninta willacunanpaj.

³Chaymi Juanga Jordán mayupa läduncho caycaj marcacunapa purishpan willacuran: «Tayta Dios perdunashunayquipaj jucha ruraycashayquita cachaycur bautisacuy arpinticushayqui musyacänanpaj.»

⁴Chayno Juan willacunanpämi profëta Isaías unayna isquirbiran: «Chunyajchömi gayacuypa willacuycan: ‹Tayta Diosninchi shamunanpaj nänita allchay. Diosninchi shamunanpaj chunyajpa nänita dirichay.

⁵Llapan ragracunatapis pampayächiy. Puytush lömacunatapis parijay. Wicsu nänicunatapis dirichay. Uchcu-uchcu nänicunatapis pampachay.

⁶Chaynöpami Tayta Dios cachamushan Salbacojtaga llapan runa ricanga.›»

⁷Aypalla runacuna bautisacoj shamuptin Juanga niran: «¡Culebra casta runacuna! ¿Pitaj gamcunata willasha-cashunqui Tayta Diospa castïgunpita gueshpinayquipaj cashanta?

⁸Rasunpa jucha rurashayquipita arpinticushayqui musyacänanpaj allita rurallarna caway. Ama yarpaynachu-llapa Abraham famillya cashallayquipita Tayta Dios salbashunayquipaj cashantaga. Munarga Tayta Dios cay rumicunatapis Abrahampa famillyanmanga ticrarachinmanmi.

⁹Juc yöra frütata mana wayuptenga duyñun sapipita muturirmi ninaman rupachenga. Chaynömi Tayta Diospis mana allita rurajcunataga castigananpaj caycan.»

¹⁰Chayno niptin runacuna tapuran: «Chaura ¿imatataj ruräman?»

¹¹Chayno tapuptinmi Juan niran: «Ishcay rucaj röpayqui captin jucaj rucajta goycuy röpaynaj cajta. Micuyniyoj carga raquipaycuy micuyniynaj cajta.»

¹²Impuestuta cobrajcunapis waquenga bautisacunanpaj shamur tapuran: «Tayta, nogacunaga ¿imatataj ruräman?»

¹³Tapuptin Juan niran: «Aycata cobranayquipäpis caycashanpita mastaga ama cobranquichu.»

¹⁴Chaynöllami suldärucunapis waquenga tapuran: «Nogacunaga ¿imatataj ruräman?» Chaura Juan niran: «Ama pitapis manacajpita manchachipaypa ni manacajta jitapaypa imantapis guechunquichu. Arushayquipita aycatapis pägashushallayquiwan cuntintacuy.»

¹⁵Chaura Cristo cay pachaman shamunanpaj cashanta shuyaraj runacunaga yarpachacushpan niran: «¿Juanchuraj Tayta Dios cachamushan Cristo caycan?»

¹⁶Ichanga Juan niran: «Nogaga yacullawanmi bautisä. Nogapa guepäta shamoj cajmi ichanga fiyupa munayniyoj canga. Nogaga manami merësëchu llanguinta chaquinpita jorgapänalläpäpis. Payga Espíritu Santuwanmi ninawanmi bautisashunquipaj.

¹⁷Payga jorquëtita chararaycannami rïguta wayrananpaj. Wayrarcurnami rïgunta wasinman churanga. Punshantanami ichanga mana imaypis upej ninaman gaycurenga.»

¹⁸Chayno willapar mas jucnöpapis Juanga Tayta Diospa alli willacuyninta yachachiran.

¹⁹Chaynöpis Juanga mandaj Herodesta piñacuran Felipipa warmin Herodiaswan tiyaptin. Mastapis Juanga piñacuran mas achca mana allicunata rurashanpitapis.

²⁰Chaypis Herodesga mas mana allita rurar-raj Juanta carsilman wichgachiran.

²¹Juanta manaraj carsilman wichgachiptin runacunata bautisaycashan wichan Jesuspis bautisacuran. Bautisacur Tayta Diosta mañacuycaptin syëlu quichacäcuran.

²²Espíritu Santuna syëlupita-pacha Jesusman urämuran palumano. Syëlupitanami Tayta Dios nimuran: «Gammi cuyay wamrä canqui. Gampitami fiyupa cushisha caycä.»

²³Quimsa chunca (30) watayojnöna caycar bautisacurcurmi Jesusga Tayta Diospa willacuyninta willacur gallaycuran. Jesuspäga runacuna yarparan Josëpa wamran cashantami. Josënami Elïpa wamran caran.

²⁴Elïmi caran Matatpa wamran. Matatmi caran Levïpa wamran. Levïmi caran Melquipa wamran. Melquimi caran Janapa wamran. Janami caran Josëpa wamran.

²⁵Josëmi caran Matatiaspa wamran. Matatiasmi caran Amospa wamran. Amosmi caran Nahumpa wamran. Nahummi caran Eslipa wamran. Eslimi caran Nagaipa wamran.

²⁶Nagaimi caran Maatpa wamran. Maatmi caran Matatiaspa wamran. Matatiasmi caran Semeipa wamran. Semeimi caran Josecpa wamran. Josecmi caran Judäpa wamran.

²⁷Judämi caran Joanapa wamran. Joanami caran Resapa wamran. Resami caran Zorobabelpa wamran. Zorobabelmi caran Salatielpa wamran. Salatielmi caran Neripa wamran.

²⁸Nerimi caran Melquipa wamran. Melquimi caran Adipa wamran. Adimi caran Cosampa wamran. Cosammi caran Elmodampa wamran. Elmodammi caran Erpa wamran.

²⁹Ermi caran Josuëpa wamran. Josuëmi caran Eliezerpa wamran. Eliezermi caran Jorimpa wamran. Jorimmi caran Matatpa wamran.

³⁰Matatmi caran Levïpa wamran. Levïmi caran Simeonpa wamran. Simeonmi caran Judäpa wamran. Judämi caran Josëpa wamran. Josëmi caran Jonanpa wamran. Jonanmi caran Eliaquimpa wamran.

³¹Eliaquimmi caran Meleapa wamran. Meleami caran Mainanpa wamran. Mainanmi caran Matatapa wamran. Matatami caran Natanpa wamran.

³²Natanmi caran Davidpa wamran. Davidmi caran Isaïpa wamran. Isaïmi caran Obedpa wamran. Obedmi caran Boozpa wamran. Boozmi caran Salmonpa wamran. Salmonmi caran Naasonpa wamran.

³³Naasonmi caran Aminadabpa wamran. Aminadabmi caran Arampa wamran. Arammi caran Esrompa wamran. Esrommi caran Farespa wamran. Faresmi caran Judäpa wamran.

³⁴Judämi caran Jacobpa wamran. Jacobmi caran Isaacpa wamran. Isaacmi caran Abrahampa wamran. Abrahammi caran Tarëpa wamran. Tarëmi caran Nacorpa wamran.

³⁵Nacormi caran Serugpa wamran. Serugmi caran Ragaupa wamran. Ragaumi caran Pelegpa wamran. Pelegmi caran Heberpa wamran. Hebermi caran Salapa wamran.

³⁶Salami caran Cainanpa wamran. Cainanmi caran Arfaxadpa wamran. Arfaxadmi caran Sempa wamran. Semmi caran Noëpa wamran. Noëmi caran Lamecpa wamran.

³⁷Lamecmi caran Matusalenpa wamran. Matusalenmi caran Enocpa wamran. Enocmi caran Jaredpa wamran. Jaredmi caran Mahalaleelpa wamran. Mahalaleelmi caran Cainanpa wamran.

³⁸Cainanmi caran Enospa wamran. Enosmi caran Setpa wamran. Setmi caran Adanpa wamran. Y payta Tayta Diosninchi ruraran.