Read Tayta Diosninchi Isquirbichishan Deuteronomio 32 Bible Online

Deuteronomio 32 - Tayta Diosninchi Isquirbichishan bible

Deuteronomio 32

¹«Syëlu wiyay rimashäta. Cay pacha wiyay imata niycashätapis.

²Yachachicuynëga tamyanömi runacunaman chayanga. Willapashäga shullaynömi, jachaman chirapa chayajnömi, tajtacho shullay caycajnömi canga.

³TAYTA DIOS munayniyoj cashantami willacushaj. ¡Llapayqui payta alabay ari!

⁴Paymi imapitapis chapämajninchi. Pay rurashancunaga fiyupa allimi. Imatapis allillatami ruran. Payga manami imaypis llullacunchu. Payga llapantapis allimi rican. ¡Alli cajtami ruran; rasun cajllatami riman!

⁵«Fiyu, juchasapa runacuna, Tayta Diosta rabyachej, Paypa ‹wamran› ninäpäpis manami allichu canqui.

⁶Mana tantiyaj lïsu runacuna ¿chaynöchu TAYTA DIOSNINCHÏTA cutichinqui? Payga ¿manachu taytayqui caycan? ¿Manachu camashojniqui, cawayta goshojniqui caycan?

⁷«Mä yarpachacuriy. Unay imano cashantapis tantiyacuriy. Taytayquicunata, auquincunata tapucuy.

⁸Tayta Diosmi juc junajcho runacunata raquiran. Nasyuncunata raquir lindancunatapis churaparan. Chayno rurashpan Israelcunatapis raquiparan aycapis cashanman-tupumi.

⁹Chaymi paycunata cuyar acraran yanapänanpaj. Jacobpita mirajcunatami shuntaran paypa maquincho cawananpaj.

¹⁰Wayralla tumaycaj chunyaj jircachömi paycunata tariran. Cuyapashpan shuntacurmi sumaj yachachiran. Ñawi-ñïñunta-japuymi cuydaran.

¹¹Chaymi gueshtancho anca älanta quicharcur-quicharcojno, wawancunata pärinanpaj yachachejno, Tayta Diospis acrashancunata apacamuran.

¹²«TAYTA DIOSLLAMI pushararan. Juc dioscunaga manami yanapashachu.

¹³Nasyuncunacho altunnin jircacunapami llapanta binsichir pushamusha. Jircacunacho cajpa wayuynintami micunanpaj camariparan. Gagapita llojshimoj mishquitami upuchiran. Ranrapita llojshimoj asëtitami upuchiran.

¹⁴Quësutami, cabrapa lëchintami camariparan. Yanapaptinmi Basán particho caj cashnicunata, uyshacunata, chïbucunata micuran. Rïgutapis allillatami micuran. Bïnutapis upuran sumaj pogusha übaspa yacuntami.

¹⁵«Israel ichanga werayasha, jaytacojyasha. Jesurún[1] wera cayllawan llushwaypa llushwasha. Chayno carmi Camajnin Tayta Diostapis gongaycusha. Salbajninta, chapajninta manacajman churasha.

¹⁶Juc dioscunata adurashpanmi Tayta Diosta rabyachisha.

¹⁷Uywacunatapis pishtaran dyablucunapaj, chayraj rejsishan dioscunapaj. Chaycunataga unay awiluncunapis manami aduraranchu.

¹⁸«Israelcuna, cachaycushcanquimi imapitapis chapäshoj Taytanchïta. Gongaycushcanqui cawayta gomajninchi Tayta Diosta.

¹⁹Chaypitami TAYTA DIOSGA rabyacurcusha. Wamrancuna captiquipis mana yanapäshurayquinachu.

²⁰Chaymi nisha: ‹Paycunata manami yanapäshänachu. Mä imamanshi chayanga. Paycunaga fiyu runacuna, mana yäracuypaj wamracunami.

²¹Mana dios caycaptin juc dioscunata adurashpanmi rabyachiman. Manacaj ïdulucunata adurashpanmi rabyachiman. Nogapis paycunata rabyachishaj juc marca runacunawan. Mana tantiyacoj runacunawanmi rabyachishaj.

²²Cananga nina ratarejnörämi fiyupa rabyacurcushcä. Rabyashäga chayanga pacha rurincamami. Allpatapis micuytapis manami wayuchishächu. Jircacunatapis rupachirmi ushashaj.

²³Paycunataga tucuynöpami castigashaj. Wacpita-caypitami lëchäcunata chayachishaj.

²⁴Yargaywan rupay gueshyawan wañunanpämi camacächishaj. Fiyu gueshyami ushangapaj. Micucoj animalcunatami, wañuchicoj culebracunatami yurichishaj.

²⁵Wamrancunatapis cällicunachömi tucsirgärenga. Wasincunachöpis fiyupa manchariymi canga. Wañongapämi mösupis jipashpis, auquinpis, itipis.

²⁶« ‹Nogaga yarparä pipis mana yarpänanpaj intërupa garguriytami.

²⁷Ichanga contrancuna cushipämänanta manami munashcächu. Manami munächu paycuna alli-tucur «TAYTA DIOSNIN chapaycaptinpis illgächishcanchi» ninanta.›

²⁸«Israelcunapaga yarpayninpis manami cannachu. Imata rurarcaycashantapis manami tantiyannachu.

²⁹Canan nishäcunata ojalä tantiyacunman ichanga. Ushacänanpaj cashanta cuentata gocuptin allimi canman.

³⁰¿Imanöpataj warangantin runacunata jucnaylla gaticachanman? ¿Imanöpataj chunca warangantin runacunata ishcajlla gaticachanman? Chayno captinpis Israelcunata chayno gaticachasha imapitapis chapaj TAYTA DIOS contrancunapa munayninman cachaycuptinnami.

³¹«Contranchïcunata chapäga manami noganchïta chapämajninchïnöchu. Chaytaga quiquincunapis musyanmi.

³²Contranchïcunaga fiyumi, wañuchicojmi, Sodoma, Gomorra runacunanömi. Chay runacunaga caycan ismusha übasnömi.

³³Paycunapa bïnunpis wañuchicoj culebrapa benënunnömi.

³⁴«Tayta Diosninchi nisha: ‹Jucha rurashancunataga manami gongächu. ¿Gongaycunäpaj cashantachi yarpaycan?

³⁵Llutanta rurashanman-tupu quiquëmi runacunataga jusgashaj. Juchan aypämuptenga manami jananpashächu. Ushacächinäpaj juchan aypaycämunnami. Öran chayaycämunnami paycunata jusganäpaj.›

³⁶«Acrashan runacunapa callpan manana captenga TAYTA DIOS yanapangami. Payta sirbejcuna ushacänanpaj captenga cuyapangami.

³⁷Chaymi contranchïcunata Tayta Dios nenga: ‹¿Maytaj imapitapis chapäshunayquipaj yäracushayqui diosniquicuna?

³⁸¿Maytaj chay uywacunapa wiranta «micun» nishayqui, bïnuta churashayquita «upun» nishayqui dioscuna? ¡Canan jatarimuchun yanapäshunayquipaj! ¡Shamuchun washäshunayquipaj!

³⁹¡Nogallami llapanpaj munayniyoj Dios caycä! Nogapita mas jucga manami canchu. Nogami munayniyoj caycä pitapis cawayta gonäpaj, wañuchinäpäpis. Nogami pitapis gueshyachë, allchacächëpis. Ñawëpitaga manami pipis gueshpinchu.

⁴⁰Imaycamapis cawaj Dios cashpämi maquëta syëluman jogarcur jurä.

⁴¹Conträcunata jusganäpaj achicyaypa achicyaycaj espädäta afilashaj. Chiquimajcunataga llapantami castigashaj. ¡Chiquimajcunataga merësishanman-tupumi ayñita cutichishaj!

⁴²Mandajnincunatawan suldäruncunata ushaptë lëchäcunapis yawarllami canga. Espädäpis aychanta cuchurmi ushanga. Chayno wañonga guërracho pillyajcunapis prësu charisha cajcunapis.›

⁴³«May-chay nasyunchöpis tiyaj runacuna Tayta Dios acrashan Israelcunawan iwal cushicuy-llapa. Paymi ayñita cutichishpan wañuchenga sirbejnincunata wañuchishanpita. Acrashan runacuna cushisha cawananpämi tiyashan nasyunninta limyuyächenga.»

⁴⁴Chay birsutami Nunpa wamran Josuëwan aywaycur Moisés llapan Israelcunata liguiparan.

⁴⁵Liguipayta usharcur Israelcunata

⁴⁶niran: «Canan willapashäcunata sumaj yarpachacuy. Yachachishä laycunata cumlinanpaj wamrayquicunata willapay.

⁴⁷Cay laycunataga manami yangallapächu yachachishcä, man'chäga chaycunata cumlir alli cawayta tarinayquipämi. Chay laycunata cumlerga Jordán mayuta chimparcur partisyun chacrata chasquir allimi cawanquipaj.»

⁴⁸Chay junajllami Moisesta TAYTA DIOS niran:

⁴⁹«Moab nasyuncho caycaj Abarim jircacunapa aywar Nebo puntaman wichay. Chayga caycan Jericó siudä chimpanchömi. Chay puntapitami ricanqui Israel runacunata goycunäpaj caycaj Canaán nasyunta.

⁵⁰Wauguiqui Aarón Hor puntacho wañushpan unay wañoj famillyayquicunawan tincoj aywacushannömi gampis Nebo puntaman wicharcur wañushpayqui famillyayquicunawan tincoj aywacunquipaj.

⁵¹Gamga wauguiqui Aaronwan ishcaniquimi Israelcunapa ñaupancho mana wiyacamarayquichu. Chayno rurarayqui Zin jutiyoj chunyaj Meriba-cades yacu llojshimojchömi. Israelcunapa ñaupancho gamcunaga manami rispitamarayquichu.

⁵²Chaypitami gamga Israelcunata goycunäpaj caycaj nasyunta carullapitana ricärinquipaj. Chay nasyunman ichanga gam mana yaycunquipänachu.»