Read Tayta Diosninchi Isquirbichishan Deuteronomio 33 Bible Online

Deuteronomio 33 - Tayta Diosninchi Isquirbichishan bible

Deuteronomio 33

¹Moisestaga Tayta Diosmi acraran. Paymi wañunanpaj wallcallana pishiycaptin Israelcunata bindisyunta gor

²cayno niran: «TAYTA DIOSGA Sinaïpitami shamusha. Seirpita-pachami achquipämashcanchïpis. Parán jircapitami achicyaypa achicyämuran. Waranganpa waranganpa anjilnincunawanmi shamusha. Derëchu caj maquinpitaga ninanörämi layninpis yargamusha.

³Tayta Diosga cuyanmi acrashan caj runacunata. Pay munashanno cawajcunataga imapitapis chapanmi. Chayno cawaj runacunaga Diospa ñaupanman gongurpacun. Chaychömi tantiyachishancunata chasquicun.

⁴Moisesmi laycunataga willapämashcanchi. Chay laycunaga Jacobpita mirar aywaj cajcunapa erensyannömi caycan.

⁵Jesurún Tayta Diosta chasquiran raynin cananpaj.»

⁶Rubén trïbu runacunapaj niran: «¡Wallcajlla carpis Rubén trïbu runacunaga ama ushacächunchu!»

⁷Judá trïbu runacunapämi niran: «Judá runacuna mañacamushanta wiyaycullay ari TAYTA DIOS. Paycunataga mashtacaptinpis juc pachallaman shuntaycuy. Munayniyoj cayniquiwan paycunata washaycuy ari. Contrancunata binsinanpaj yanapaycullay.»

⁸Leví trïbu runacunapämi niran: «Tayta Dios, Israelcunataga Masah partichömi musyaparayqui. Meribachömi paycunawan rimanacurayqui. Nishayquita wiyacoj Leví trïbu runacunatami ichanga Tumimtawan Urimta aptapashcanqui.

⁹Paycunaga nishayquita llapantami cumliran. Conträtu rurashayquinöllami cawarcaycan. Maman-taytanta, wauguincunata, wamrancunata cuyashanpitaga masmi gamta cuyashunqui Tayta Dios.

¹⁰Paycunaga Jacobpita miraj Israelcunatami layniquicunata yachachin. Ñaupayquichömi insinsuta rupachin. Altarchömi rupachina sacrifisyucunata rupachin.

¹¹TAYTA DIOS, paycuna sumaj sirbishunayquipaj yanapaycullay. Paycuna rurashanga shonguyquipäno caycullächun. Chiquejcuna yarpashanta ichanga manacajman churaycullay. Amana contran jatarichunnachu.»

¹²Benjamín trïbu runacunapämi niran: «TAYTA DIOS cuyashancunaga mana yarpachacuypami goyanga. Paymi imaycamapis chapanga. Maquillanchömi imaypis chararanga.»

¹³José trïbu runacunapämi niran: «Paycunapa chacranmanga TAYTA DIOS bindisyunta churaycuchun. Tamyata tamyachimuchun. Yacutapis pashtachimuchun pargunanpaj.

¹⁴Micuynincunapis timpuncho wiñamuptin alli poguypa poguchichun.

¹⁵Lömacunachöpis allinnin caj micuy wayuchun. Jircancunachöpis aypallata cusichachun.

¹⁶Chacrancunapis alli chacra cachun. Micuyninpis alli wayuchun. Josëta bindisyunta gochun rataycaj shiracho yuripäcoj Tayta Dios. Llapanpis Josëpäga alli cachun. Paytaga llapan wauguincunapitami acraran.

¹⁷José trïbu runacunaga wäcapa rimir caj wawan maucha cashan törunömi caycan. Callpayoj cayninpis chucaru törunömi. Callpayoj cayninpami may-chay nasyun runacunatapis binsir manchachenga. Chaynömi canga yupaytapis mana atipaypaj Efraín runacunaga. Chaynömi canga waranganpa waranganpa Manasés runacunapis.»

¹⁸Zabulón trïbu runacunapaj Isacar trïbu runacunapaj niran: «Zabulón runacuna maypapis purir cushicuy. Gamcunapis Isacar runacuna witichinalla tolduyquicunacho goyar cushicuy.

¹⁹Paycunaga juc-lä runacunatami puntaman gayangapaj. Chay runacunawanna Tayta Diospaj uywacunata pishtanga. Lamarcho ima-aycapis bälejcuna cajwan rïcuyarmi cushisha goyanga.»

²⁰Gad trïbu runacunapämi niran: «Tayta Diosga alabasha caycullächun. Paymi Gad runacunapa chacrancuna mas achca cananpaj yanaparan. Gad runacunaga wawayoj liyun lätacuycur cäsajnömi caycan. Chaymi charishan runapa ricranta, umantapis rachirin.

²¹Paycunaga allinnin caj chacracunatami charicurcusha. Paycunapa chacrancunaga suldärucunapa mandajnincuna allinnin caj chacrata chasquishannömi caycan. Gad runacunami waquin Israel famillyata yanapar ñaupa-puntata aywaran. Paycunaga llapantapis TAYTA DIOS willapashannöllami cumlisha. Israel trïbucunachöga Dios munashallantami rurasha.»

²²Dan trïbu runacunapämi niran: «Dan runacunaga caycan manta liyun Basán partipita pintimojnömi.»

²³Neftalí trïbu runacunapaj niran: «Neftalí runacunataga TAYTA DIOS cuyanmi. Paycunataga achca bindisyuntami gosha. ¡Lamarpita chunyajcamami chacranpis caycan!»

²⁴Aser trïbu runacunapaj niran: «Jacobpita miraj waquin trïbucunano paycunapis bindisyunta chasquichun. Waquin trïbucunapis Aserta cuyachun. Chaquincunatapis ushmananpaj olivo asëti puchuy-puchuy caycullächun.

²⁵Siudä puncunpa rancancunapis fyërrupita, runsipita caycullächun. Callpancunapis wañushanyaj ama ushacächunchu.»

²⁶«Jesurunpa Diosninnöga manami ima dioscunapis canchu. Payga yanapäshunayquipaj shamun pucutay janallanpami.

²⁷Imaypis cawaj Tayta Diosmi munayninwan gamcunataga chapäshunqui. Paymi chiquishojcunatapis ñaupayquipita gargusha. Chayno gargushpan ushacächinayquipämi nishunqui.

²⁸Israelcunaga Tayta Diospa munaynincho carmi alli goyäconga. Mirar aywaj wamrancunapis allimi goyäconga. Chacrancunachöpis rïguwan übasga fiyupami wayonga. Paycuna tiyashanmanga tamyapis timpunchömi tamyanga.

²⁹Israelcuna cushicäriy. ¿Picunaräshi gamcunamanga tincunman? TAYTA DIOS quiquinmi gamcunataga salbashunqui. Paymi imapitapis chapäshushpayqui yanapäshunqui. Paymi contrayquicunatapis binsëshishunquipaj. Chiquishojcunataga ushajpämi wañuchinquipaj. Alli-tucuycajtami manacajman churanquipaj.»