Read Tayta Diosninchi Isquirbichishan Jueces 17 Bible Online

Jueces 17 - Tayta Diosninchi Isquirbichishan bible

Jueces 17

¹Efraín parti jircachömi tiyaran Micaía.

²Paymi juc cuticho mamanta niran: «¿Yarpaycanquichu waranga pachacnin (1,100) guellayniqui suwaj runata maldisyunashayquita? Nogami chay suwapäshoj runa caycä.» Chayno niptinmi maman niran: «¡TAYTA DIOS bindisyunninta goycushunqui ïju!»

³Waranga pachacnin (1,100) guellayta wamran Micaía cutiycachiptin mamanga niran: «Cananga TAYTA DIOSPÄMI cay guellayta churä. Chay guellaywanmi rurachishaj juc ïduluta guerupita, juc ïdulutana guellaypita. Chaytaga gamtami entregaycö.»

⁴Wamran cutiycachiptin ishcay pachacta (200) raquiran. Chayta aparan guellay tacajman. Paytanami ruwacuran juc ïduluta guerupita, juc ïdulutana guellaypita rurapänanpaj. Ïduluta rurarcuptin Micaiapa wasinman churaran.

⁵Micaiapaga maynami caycaran capillan. Diosta mañacur jaticunanpämi efodta ruraran. Quiquin famillyacunalla «diosnë» nishancunapis achca caran. Nircur juc wamrantanami cüra cananpaj churaran.

⁶Chay wichanga Israelcunacho manami ray caranchu. Chaymi cada ünun munashanno goyäcoj.

⁷Judá runacuna tiyashan Belén marcachömi puricachaj mösu caran. Payga caran Leví trïbupitami.

⁸Chay mösumi Belenpita aywacuran maychöpis tiyananpaj ashir. Efraín partipa puriycashancho chayaran Micaiapa wasinman.

⁹Micaiaga tapuran: «¿Maypitataj shamunqui?» nir. Chaura niran: «Belenpitami shamushcä. Leví trïbupitami cä. Maycho tiyanäpäpis ashirmi puriycä» nir.

¹⁰Niptinmi Micaiaga niran: «Caycho tiyacushun ari. Nogapa cürä cay. Chaura gamnami willapämar tantiyachimanqui. Watachöga pägashayqui chunca guellayta. Jananmanpis listumi goyanqui röpapita micuypitaga.»

¹¹Chayno niptinmi Leví trïbu mösuga chaycho tiyashpan Micaiapa wamrannöna ricacuran.

¹²Chaynöpis cüra cananpaj Micaía churaptin paypa wasillanchöna tiyaran.

¹³Leví mösu cüran captinmi Micaiaga yarparan TAYTA DIOSPA bindisyunninwan alli goyashanta.