Read Tayta Diosninchi Isquirbichishan Jueces 5 Bible Online

Jueces 5 - Tayta Diosninchi Isquirbichishan bible

Jueces 5

¹Chay junajmi Deborawan Abinoampa wamran Baracga Tayta Diosta alabar cantaran:

²«TAYTA DIOSTA llapayqui alabay mandajcuna pillyaman runacunata pushashanpita; marca runacunapis shongun shacyaptin pillyaman aywashanpita.

³Raycunapis, llapayqui wiyamay. Mandajcunapis, wiyaycäramay. Israelcuna rispitar adurashan TAYTA DIOSTAMI alabä.

⁴«TAYTA DIOS, Seirpita llojshimuptiqui, Edom nasyunpita aywacuptiqui, intëru allpami chucchuran. Syëlupis cuyuriranmi. Pucutaypis tamyamuranmi.

⁵Israelcuna rispitashan TAYTA DIOSPA ñaupanchöga llapan jircacunapis chucchuranmi. Sinaí puntapis chucchuranmi.

⁶«Anatpa wamran Samgar cashan wichanpis, Jael cashan wichanpis carupa puriyta manchacojmi. Caminanticunapis mananami näninpaga purirannachu. Juc-läpanami puriran.

⁷Israel castapa chacranpitaga llapanmi aywacuran. Chayno caycajta ricarmi noga Deboraga Israelcunapa mamannöpis jatarishcä.

⁸Israelcuna juc dioscunatana aduraptenga guërra jananchöna ricacoj. Ichanga Israelcuna chuscu chunca waranga (40,000) captinpis chapacuna escüdun ni lansanpis ni jucnayllapis manami caranchu.

⁹«Nogaga llapan shongöpami cushicö Israelcunapa mandajnincunapaj, pillyaj aywaj marca-masëcunapaj. TAYTA DIOSTA llapayqui alabay.

¹⁰«Rïcucunapis pobricunapis cantay. Caminanticunapis cantay.

¹¹Uywata michicur goturpashpayquipis willacuy TAYTA DIOS binsishantaga. Israelcuna binsishanta cushicur willacuy.

¹²«Ricchay, jatariy Débora. Juc birsuta cantay. Abinoampa wamran Barac prësuyquicunata apacuy.

¹³«Chaymi mandajnincunaga Israelcunawan pillyaman aywaran. Aywaran fiyupa munayniyoj chiquejcunawan pillyananpämi.

¹⁴Efraín trïbu waquenga aywaran pampaman. Paycunapa guepantami aywaran Benjamín trïbu suldärucunapis. Maquir castapa mandajnincunapis, Zabulón trïbu autoridäcunapis aywaran.

¹⁵Isacar trïbu mandajcunapis Deborawan aywaran. Baractaga yanaparan Isacar trïbumi. Paycunami guepanta pampaman aywaran. «Rubén trïbucunachömi ichanga jucta-jucta yarpar apänacuran.

¹⁶Pillyaman aywananpa ruquin uyshancunata ricar goyäcuran. Rubén trïbucunachöga jucta-jucta yarpar apänacuran.

¹⁷«Galaad castacunaga Jordán mayupa chimpanchömi pachacaraycar quëdasha. Dan trïbuga quëdasha büquicuna ichiränanchömi. Aser trïbuga quëdasha lamar cantuncho büquincunata cuydar.

¹⁸Altu jircacunachöpis, pampacunachöpis Zabulonwan Neftalïllami wañuyta cawaytapis mana manchaypa pillyasha.

¹⁹«Canaán partipitami achcaj raycuna shamuran Israelcunata magaj. Taanaccho Meguiducho caycaj ragra läduncho pillyaran. Ichanga manami apashachu guellayta ni imatapis.

²⁰Goyllarcunapis Sisarapa contranmi pillyasha. Janaj pachapitami pillyamusha.

²¹Cisón ragrapa lloglla aywajmi chiquimajninchïcunataga apacusha. ¡Sumaj balurchay! ¡Mana guellanaypa aywashun!

²²«Sisarapa cawalluncunaga maquitapis chojparcur chojparcurmi gueshpir aywacusha. Shilluncunapis pututuyllami wiyacasha.

²³TAYTA DIOSPA anjilninnami willacun: ‹Merozcho tiyajcunaga manami aywashachu TAYTA DIOSPA suldäruncunata yanapaj. Chaypita castïgu chayachun› nir.

²⁴«Queni runa Heberpa warmin Jaelga llapan warmicunapita mas rispitasha cachun.

²⁵Sísara yacuta mañacuptin Jaelga lëchita goycuran. Cuyayllapaj tasunwan mas alli caj lëchitami goycuran.

²⁶Nircorga jucaj maquinwan istägata aptarcur jucaj maquinwan mäsuta aptarcur Sisarata umapa labityapaycuran. Chauraga uma tullunta paquirir togshunpa päsariran.

²⁷Sisaraga gochpar atipacuycaran Jaelpa ñaupancho. Atipacuycällarmi pampaman yagaran. Yagashallanchöna wañucäcuran.

²⁸«Sisarapa mamannami llaquicushpan bentänapa ricchacushpan nin: ‹¿Imanirtaj mana chayamunchu carrëtan? ¿Imanirtaj guepacämun pillyapaj carrëtan?›

²⁹Niptin waquin musyaj yachaj warmicunapis, quiquinpis nin:

³⁰‹Pillyar binsishpan imatapis guechushancunatami raquipänacuycanga. Suldärucunaga jucta-camachari ishcayta-camachari uywayninpaj warmita raquipänacuycan. Sisarapäga canga achca culur tëlacuna. Burdasha juc ishcay cuyayllapaj pañuylucunami binsej wallgacunanpaj canga.›

³¹«TAYTA DIOS, chiquishoj cäga llapanpis chaynölla ushacächun. Gamta cuyashoj cajcuna ichanga inti cuyayllapaj achicyashanno cachun.» Chaypitaga chuscu chunca (40) watayaj chay Israel nasyuncho jauca goyaylla caran.