Read Tayta Diosninchi Isquirbichishan Apocalipsis 18 Bible Online

Apocalipsis 18 - Tayta Diosninchi Isquirbichishan bible

Apocalipsis 18

¹Chaypitanami ricarä munayniyoj anjil fiyupa achicyaycar janajpita uraycämojta. Chay achicyayninmi intëru pachata achicyaran.

²Chay anjilmi sinchipa nimuran: «¡Ushacashanami Babilonia! ¡Ushacashanami jatuncaray siudä! Cananga dyablucunallanami chaycho tiyaycan. Chaychöga ganra äbicunallanami, asyaj animalcunallanami tiyaycan.

³Mañösa car juchata rurashanwanmi llapan nasyuncuna machasha. Tucuy nasyuncunapa raynincunapis paywan cacusha. Cay pachacho caj nigusyanticunapis fiyupa rïcuyasha tucuy munashanta payta ranticushpan.»

⁴Chaynöpis yapay wiyarä janaj pachapita cayno nimojta: «Acrashä runacuna, chay siudäpita aywacuy pay juchata rurashanno mana ruranayquipaj, juchata rurashanpita castïgu chayashan gamcunata mana chayashunayquipaj.

⁵Payga pasaypa juchasapami caycan. Mana alli rurashancunataga Tayta Dios llapantami musyaycan.

⁶Imanömi jucta ruraran chayno paytapis ruray. Rurashanpita masta cutichiy. Juccunata machächir ñacachishan bäsunman quiquintaga mas aypallata camaripay.

⁷Payga ima-aycayojpis car fiyupa alli-tucushpanmi cawaran. Chayno alli goyashanpita cananga payta ñacachiy, llaquicachiy. Payga shonguncho caynömi nej: ‹Nogaga raynanömi caycä. Manami biyüdachu cä. Manami imaypis ñacashächu› nir.

⁸Chayno cashanpitami juc junajllacho fiyupa ñacaycuna payman chayanga. Wañuypis, ñacaypis, yargaypis illajpitami chayanga. Nircurnami rupar fiyupa ushacanga. Paytaga llapanpaj munayniyoj Tayta Diosmi castigangapaj.»

⁹Chay siudäpita goshtay jatariycajta ricarmi llapan nasyuncunapa mandajnincuna llaquicur waganga. Chay mandajcunaga paywan cacushpanmi pasaypa juchata ruraran. Tayta Diospa contran imatapis mana manchacuypa ruraran.

¹⁰Fiyupa castigashanta ricarmi carullapita ricarpanga. Cayno nirmi gapachaconga: «¡Ay, ay Babilonia! ¡Munayniyojchaj carayquega! ¡Cananga illajpitachaj juc rätulla ushacäcushcanqui!»

¹¹Chaynömi llapan nigusyanticunapis waganga chay siudä ushacashanpita. Manami canganachu pipis nigusyuncunata rantinanpaj.

¹²Chay nigusyanticunaga ranticunanpaj apaj gorita, guellayta, cuyayllapaj rumicunatapis, lïnupita tëlata, sëdapita tëlata, puca chicnu tëlata, cuestaj guerupita tucuy-niraj tablacunata, cuyayllapaj marfilpita, runsipita, fyërrupita, marmolpita rurasha cajcunata,

¹³canëlata, insinsuta, mïrrata, tucuy alli asyaj jachacunata, bïnuta, asëtita, jarinata, rïguta, cargacuna caj uywacunata, uyshata, cawallucunata, carrëtacunatapis. Uywaycunatapis ranticoj aruchinanpaj.

¹⁴Nigusyanticunami cantapanga cayno nir: «Cananga alli sillu micuyta manami micunquipänachu. Shonguyqui munashanta manami tarinquipänachu. Alli goyayniquipis ushacashanami. Guellayniquipis llapanmi ushacasha.»

¹⁵Babiloniata ranticur rïcuyaj nigusyanticunaga rupaycajta ricaycur wagar carullapita manchacasha ricarpanga

¹⁶«¡Ay jatuncaray siudä! Cuyayllapaj car lïnupita rurasha puca chicnu alli röpashami caran. Goriwan, perlascunawan, cuyayllapaj rumicunawan adurnashami caran.

¹⁷¡Llapan ima-aycayquipis illajpita ushajpämi ushacasha!» nir. Büqui manijaj runacuna, büquicho llapan arupacojcunapis carullapita ricaraycar quëdaconga.

¹⁸Chay marcapita goshtay jatarejta ricar fiyupa waganga «Chay siudäno ¿mayllachöga cashachuraj juc siudä?» nir.

¹⁹Nircorga fiyupa wagar gapararmi allpatapis umanman wiñacur nenga: «¡Ay jatuncaray siudä! Chaychömi büquiyojcuna nigusyunta ranticur llapanpis rïcuyasha. Cananga illajpitachaj juc rätulla ushacäcusha.»

²⁰Syëlucho cajcuna, fiyupa cushicuy. Tayta Diospa apostulnincuna, profëtancuna, llapan yäracojcunapis cushicuy. Gamcunata ñacachishushayquipitami Tayta Dios chay siudäta ushacächisha.

²¹Chaura munayniyoj anjil mulinu rumita-niraj jogarcur lamarman jitarir niran: «Chaynömi päsashunquipaj jatuncaray Babilonia siudätaga. Mananami imaypis ricashunquipänachu.

²²Mananami cantashancunapis wiyacangapänachu. Mananami imaypis wiyacanganachu cälliquicunacho arpa, pincullu ni trompëta wagashanpis. Gam cajchöga mananami ima aruyta yachajcunapis canganachu. Mulinu agashanpis manami wiyacanganachu.

²³Pipis mana tiyaptin achquipis mananami achicyanganachu. Casaray fistapis mananami canganachu. Munayniyoj nigusyanticunapis manami canganachu. Brüju car may-chaychöpis tiyaj runacunata engañashayquipitami chayno ushacanquipaj.»

²⁴Chay siudä runacunami juchayoj caycan Tayta Diospa profëtancunata, yäracojcunata may-chaychöpis wañuchishanpita. Chaypitami paycunaga castigasha canga.