Read Tedim Chin PIANCILNA 11 Bible Online

PIANCILNA 11 - Tedim Chin bible

PIANCILNA 11

¹Tua laitakin leitung buppi in kampau khat le kammal tawmno bek nei hi.

²Amaute, nisuahna lamah lal uh a, Shinar gam sungah zanglei mun khat mu-in tua lai-ah a teng uh hi.

³Amaute khatlekhat kiangah, “Hong pai un, leiseek seekin limtakin hal ni,” kici uh hi. Amaute in suang dingin leiseek nei uh a, a buan dingin kultal tui nei uh hi.

⁴Tua ciangin amaute in, “Hong pai un, leitung buppi-ah eite i kithehthang gawp loh nadingin ei a dingin khuapi khat bawlin, a dawn in vantung a ban ding tausang khat lamin, eite’ minthan nading khat bawl ni,” ci uh hi.

⁵Tua ciangin mihingte’ lamsa khuapi le tausangpi a en dingin TOPA hong paisuk hi.

⁶TOPA in, “En un, amaute minam khat hi uh a, amaute khempeuh in kampau khat nei uh hi. Hih pen amau’ sep ding a kipatna bek ahi hi. Tu-in sep dinga amau’ vaihawmte amau a dingin hi thei nawn lo ding hi.

⁷Hong pai un, amaute khatlekhat’ thugen a kitheih loh nadingun eite paisukin amau’ kampau va kitukalhsak ni,” a ci hi.

⁸Tua ahih ciangin TOPA in tua lai panin leitung khempeuhah amaute thehthang a, a khuapi bawl uh a tawp uh hi.

⁹Tua ahih ciangin a min Babel kici hi. Bang hang hiam cih leh TOPA in tua munah leitung khempeuh’ kampau kitukalhsak hi. Tua lai mun panin TOPA in leitung khempeuhah amaute a thehthang hi.

¹⁰Hihte pen Shem’ suanlekhakte ahi hi. Shem kum zakhat a phak, tuiciin tun khit kum nih ciangin, amah in Arpakshad kici tapa khat nei hi.

¹¹Arpakshad a suah khit ciangin Shem kum zakhat nungta lai a, tanu le tapa dang nei lai hi.

¹²Arpakshad kum sawmthum le nga a phak khit ciangin, amah in Shelah kici tapa khat nei hi.

¹³Shelah a suah khit ciangin Arpakshad kum zali le kum sawmthum nungta lai a, tanu le tapa dang nei lai hi.

¹⁴Shelah kum sawmthum a phak khit ciangin Eber kici tapa khat nei hi.

¹⁵Eber’ suah khit ciangin Shelah kum zali le kum sawmthum nungta lai a, tanu le tapa dang nei lai hi.

¹⁶Eber kum sawmthum le li a phak khit ciangin amah in Peleg kici tapa khat nei hi.

¹⁷Peleg a suah khit ciangin Eber kum zali le kum sawmthum nungta lai a, tanu le tapa dang nei lai hi.

¹⁸Peleg kum sawmthum a phak khit ciangin amah in Reu kici tapa khat nei hi.

¹⁹Reu a suah khit ciangin Peleg kum zanih le kum kua nungta lai a, tanu le tapa dang nei lai hi.

²⁰Reu kum sawmthum le nih a phak khit ciangin amah in Serug kici tapa khat nei hi.

²¹Serug a suah khit ciangin Reu kum zanih le kum sagih nungta lai a, tanu le tapa dang nei lai hi.

²²Serug kum sawmthum a phak khit ciangin amah in Nahor kici tapa khat nei hi.

²³Nahor a suah khit ciangin Serug kum zanih nungta lai a, tanu le tapa dang nei lai hi.

²⁴Nahor kum sawmnih le kua a phak khit ciangin amah in Terah kici tapa khat nei hi.

²⁵Terah a suah khit ciangin Nahor kum za le sawm le kua nungta lai a, tanu le tapa dang neilai hi.

²⁶Terah kum sawmsagih a phak khit ciangin amah in Abram, Nahor, le Haran a nei hi.

²⁷Tu-in Terah’ suanlekhakte hih bang ahi hi. Terah pen Abram, Nahor, le Haran’ pa hi a, Haran pen Lot’ pa ahi hi.

²⁸Ama pa Terah a sih ma-in ama suahna gam ahi, Khaldea gam Ur khua-ah Haran si hi.

²⁹Abram le Nahor in zi nei uh hi. Abram’ zi min Sarai hi a, Nahor’ zi min Milkah hi a, Milkah pen Iskah’ pa Haran’ tanu ahi hi.

³⁰Tu-in Sarai ciing a, ta nei lo hi.

³¹Terah in ama tapa Abram le Haran’ tapa, ama tupa ahi Lot, le a tapa Abram’ zi ahi a monu Sarai samin, Kanaan gam sungah a pai dingin Khaldea gam Ur khua panin amaute a paikhia khawm uh hi. Ahi zongin amaute Haran a tun uh ciangin tua munah a teng uh hi.

³²Terah’ khansung kum zanih le kum nga hi a, Haran-ah Terah a si hi.