Read Tedim Chin PIANCILNA 12 Bible Online

PIANCILNA 12 - Tedim Chin bible

PIANCILNA 12

¹TOPA in Abram kiangah, “Na gam, na beh, le na pa’ inn panin nang kong lah ding gamah pai in.

²Thupha a ngah dingin minam lian khatin nang hong bawlin, thupha hong pia-in, na min kong liansak ding hi.

³Nang thupha hong piate thupha ka pia ding a, nang hong samsiate ka samsia ding hi. Nang’ thupha ngah bangin thupha a ngah nadingun leitung midang khempeuh in hong ngen ding uh hi,” a ci hi.

⁴Tua ciangin TOPA’ gensa bangin Abram pai a, Lot in zong a zui hi. Haran panin a paikhiatin Abram kum sawmsagih le nga a pha hi.

⁵Abram in ama zi Sarai, a sanggampa’ tapa Lot, amau’ kaihkhopsa neihsa khempeuh, le Haran-a amau’ neih sila khempeuh samin, Kanaan gamah a pai dingin amaute ding khia uh a, tua gam a tung uh hi.

⁶Abram in tua gam sung nawkin Shekhem mun, Moreh tawsaw phung dong a tung hi. Tua hunin tua lai-ah Kanaan mite teng lai hi.

⁷Tua ciangin Abram’ tungah TOPA kilang a, “Na suanlekhakte tungah hih leitang ka pia ding hi,” a ci hi. Tua ahih ciangin amah in ama tunga kilang TOPA a dingin biakna tau khat a bawl hi.

⁸Tua ciangin Bethel panin nisuahna lam mualah amah kin kikin a puanbuk lam a, nitumna lamah Bethel, nisuahna lamah Ai om hi. Tua lai munah zong amah in TOPA a dingin biakna tau khat bawl a, TOPA’ tungah thu a ngen hi.

⁹Abram in a khualzin zom lai a, Negeb gam lam manawhin a pai lai hi.

¹⁰Kanaan gam sungah kialpi tung hi. Tua kialpi nasia ahih manin tawlkhat sung a om dingin Egypt-ah Abram a paisuk hi.

¹¹Egypt gam a tum ding ciangin amah in a zi Sarai’ kiangah, “Nang pen nupi melhoih khat na hihna ka thei hi.

¹²Egypt mite in nang hong muh ciangin amaute in, ‘Hih nu ama zi hi,’ ci ding uh hi. Tua ciangin amaute in kei hong that ding uh a, ahi zongin amaute in nang hong nungtasak ding uh hi.

¹³Nang pen ka sanggamnu ci lehang, nangma hangin kei a dingin thu hong hoihzaw ding a, nangma hangin ka suakta thei kha ding hi,” a ci hi.

¹⁴Egypt gam sungah Abram a tun ciangin Egypt mite in tua nupi a mel hoihsa mahmah uh hi.

¹⁵Faro’ uliante in amah a muh uh ciangin Faro’ kiangah amah phat uh hi. Faro’ inn sungah tua nupi kila hi.

¹⁶Tua nu’ hangin amah in Abram limbawl mahmah hi. Amah in tuu, bawngtal, latal, pasal nasem, numei nasem, lanu, le kalaohte a pia hi.

¹⁷Ahih hangin TOPA in Abram’ zi Sarai’ huhau-in Faro le a innkuanpihte gimna lianpi thuaksak hi.

¹⁸Tua ahih ciangin Faro in Abram samin, “Bang hangin hih bangin kei hong bawl na hi hiam? Amah na zi ahihna bang hangin kei kiangah hong gen lo na hi hiam?

¹⁹Ka zi dingin amah ka lak theih nadingin, ‘Amah ka sanggamnu hi,’ bang hangin hong ci na hi hiam? Tu-in hih lai-ah na zi om hi. Amah la in la pai un,” a ci hi.

²⁰Faro in amah tawh kisai-in a mite tungah thu a pia hi. Amaute in a zi le ama neih khempeuh tawh lampi-ah a khakhia uh hi.