Read Tedim Chin PIANCILNA 13 Bible Online

PIANCILNA 13 - Tedim Chin bible

PIANCILNA 13

¹Tua ahih ciangin Egypt panin Abram, a zi, ama neih khempeuh, le Lot zong tawh, Negeb gam lamah a paito hi.

²Abram in ganhing, ngun, le kham hau mahmah hi.

³Amah Negeb gam pan kipanin Bethel ciang dong, a kipat cil-in a puanbuk omnasa mun Bethel le Ai kikal,

⁴a masa-a biakna tau khat a bawlnasa munah khualzinin a paisuak hi. Tua lai munah Abram in TOPA’ tungah thu a ngen hi.

⁵Abram tawh a paikhawm Lot in zong tuuhon, ganhon, le puanbukte nei hi.

⁶Tua ahih manin mun khatah a tengkhawm dingin leitang in amau tegel vak zo lo hi. Bang hang hiam cih leh amau’ gan neihsate tam mahmah ahih manin amau tegel tengkhawm thei lo uh a,

⁷Abram’ gancingte le Lot’ gancingte kitawng thei zel hi. Tua hun laitakin Kanaan mite le Perez mite tua gamah teng lai uh hi.

⁸Tua ciangin Abram in Lot’ kiangah, “Nang le kei’ kikal, nang’ gancingte le kei’ gancingte’ kikalah kitotna omsak kei ni. Bang hang hiam cih leh eite beh khat ihi hi.

⁹Na mai-ah gam buppi om hi lo ahi hiam? Kei’ kiang panin nangmah paikhia tawm in. Nang in veilam na lak leh, kei taklamah ka pai ding hi. Tua ahih kei leh zong, nang in taklam na lak leh, kei veilamah ka pai ding hi,” a ci hi.

¹⁰Lot zong khuadak a, Jordan gun kuam mun khempeuh in limtakin tui ngahin TOPA’ huan hitaleh, Zoar lama Egypt gam tawh hitaleh kibang hi, ci-in mu hi. Hih pen TOPA in Sodom le Gomorrah a suksiat hun ma ahi hi.

¹¹Tua ahih ciangin Lot in ama a dingin Jordan gun kuam khempeuh teel a, nisuahna lamah a pai hi. Tua ahih manin amaute kikhen tuak uh hi.

¹²Kuam sunga khuapite’ lakah Lot tengin, a puanbukte Sodom ciang dongah khinin a om laitakin Kanaan gam sungah Abram teng hi.

¹³Tua laitakin Sodom mite migi lo hi a, TOPA’ tungah nakpitakin a khialte ahi hi.

¹⁴Ama kiang panin Lot a paikhiat khit ciangin TOPA in Abram’ kiangah, “Khuadak to inla, nangma omna panin leilu lam, leitaw lam, nisuahna lam, le nitumna lam en in.

¹⁵Bang hang hiam cih leh na muh gam khempeuh nang le na suanlekhakte kong pia paisuak ding hi.

¹⁶Na suanlekhakte, leitung leivui zahin tampi ka phasak ding hi. Mi khatpeuh in leitung leivui a sim theih leh na suanlekhakte zong kisim thei ding hi.

¹⁷Ding inla, gamdung gamvai kantanin pai in. Bang hang hiam cih leh nang’ tungah kong pia ding hi,” a ci hi.

¹⁸Tua ahih ciangin Abram in a puanbuk khinin, Hebron gam sung, Mamre tawsawte gei-ah hong pai-in a teng hi. Tua lai munah TOPA a dingin biakna tau khat a bawl hi.