Read Tedim Chin PIANCILNA 14 Bible Online

PIANCILNA 14 - Tedim Chin bible

PIANCILNA 14

¹Shinar kumpipa Amrafel, Ellasar kumpipa Ariok, Elam kumpipa Khedorlaomer, le Goiim kumpipa Tidal-te’ hun lai-in,

²hih kumpite in Sodom kumpipa Bera, Gomorrah kumpipa Birsha, Admah kumpipa Shinab, Zeboiim kumpipa Shemeber, le Bela (Zoar) kumpipa, kumpi ngate va sim uh hi.

³Hih kumpi ngate in kipawlna bawlin Siddim Kuam (Ci Tuipi)-ah a galkapte uh gawm uh hi.

⁴Amaute, kum sawm le nih sung Khedorlaomer’ khutnuai-ah om uh a, ahih hangin a kum sawm le thumna ciangin amaute in lehdo uh hi.

⁵A kum sawm le lina ciangin Khedorlaomer le amah tawh a kipawl kumpite hong pai-in sehnel gamgi Elparan ciang dongah Ashteroth Karnaim gam a Refaim, Ham gam a Zuzim, Shavehkiriathaim gam a Emim,

⁶le amau’ gam Seir Mual tunga Hori mite hong zo uh hi.

⁷Tua ciangin amaute kihei kikin Enmishpat (Kadesh) ah hong pai uh a, Amalek mite’ gam khempeuh le Hazazontamar gam a teng Amor mite zong zo uh hi.

⁸Tua ciangin Sodom kumpipa, Gomorrah kumpipa, Admah kumpipa, Zeboiim kumpipa, le Bela (Zoar) kumpipa kuankhia uh a, amaute kipawlin Siddim Kuam ah

⁹Ela kumpipa Khedorlaomer, Goiim kumpipa Tidal, Shinar kumpipa Amrafel, le Ellasar kumpipa Ariok tawh kido uh a, kumpi li kigawm le kumpi nga kigawm kido uh hi.

¹⁰Siddim Kuam pen kultal khukte tawh kidim a, Sodom le Gomorrah kumpite a tai uh ciangin pawlkhat tua khukte sungah kia uh a, a omlai teng mualtungah tai uh hi.

¹¹Tua ahih ciangin galte in Sodom le Gomorrah-te’ na khempeuh le a an khempeuh uh la-in a ciah uh hi.

¹²Amaute in Sodom a, a teng Lot (Abram’ sanggampa’ tapa) le a na khempeuh zong la-in a paikhia uh hi.

¹³Tua ciangin a suakta mi khat hong pai-in, Hebru mi Abram’ kiangah hong gen hi. Amah pen Eshkol le Aner’ sanggampa ahi hi. Amor mi hi a, Mamre tawsawte gei-ah teng hi. Hih mite pen Abram’ kipawlpihte ahi hi.

¹⁴Ama behpa salin a kimatna Abram in a zak ciangin, ama inn sunga a suak, a kihilhsa ama mi zathum le sawm le giatte makaihin Dan ciang dong a delhin a pai uh hi.

¹⁵Amah in zan hunin ama pawlte, amah le a nasemte, amaute a do dingin khenin amaute zo a, Damaskas leilu lam Hobah ciang dong a delh uh hi.

¹⁶Tua ciangin amah in Lot le ama na khempeuh, numeite le a galmatte tawh a ciahpih kik hi.

¹⁷Abram in Khedorlaomer kumpipa le a pawlte a zawhna panin a ciahkik ciangin amah a dawn dingin Sodom kumpipa Shaveh Kuam (Kumpipa’ Kuam)-ah na pai hi.

¹⁸Tua ciangin Jerusalem kumpipa Melkhizedek in an le leenggahzu hong pusuah hi. Amah pen Sang Pen Pasian’ siampi zong ahi hi.

¹⁹Amah in thupha pia a, “Vantung le leitung a bawl, Sang Pen Pasian in Abram thupha pia hen!

²⁰Na galte na khut sungah a hong pia Sang Pen Pasian in thupha ngah hen,” a ci hi. Abram in na khempeuh sawm-ah-khat ama tungah a pia hi.

²¹Sodom kumpipa in Abram’ kiangah, “A mite hong pia inla, ahih hangin a nate nang a dingin la in,” a ci hi.

²²Ahih hangin Abram in Sodom kumpipa kiangah, “Vantung le leitung a bawl Sang Pen TOPA Pasian tungah ka kiciam khinzo hi.

²³Nangmah in, ‘Abram ka hausak hi,’ ci kha ding na hih manin mimkhau ahi a, khedap khau ahi a, nangma a’ ahi na khat peuhpeuh ahi zongin ka la kei ding hi.

²⁴Tangvalte’ neksate le kei tawh hong kuan mite’ tanh dingte lobuang bangmah ka la kei ding hi. Aner, Eshkol, le Mamre-te amau’ tanh ding pia in,” a ci hi.