Read Tedim Chin PIANCILNA 15 Bible Online

PIANCILNA 15 - Tedim Chin bible

PIANCILNA 15

¹Hih thute khit ciangin mang sungah TOPA’ thu Abram’ tungah hong tung a, “Abram aw, lau kei in. Keimah in lauhuaina panin nang ka hong hu ding a, na thaman lian mahmah ding hi,” a ci hi.

²Ahih hangin Abram in, “TOPA Pasian aw, bang hong pia ding na hi hiam? Ta nei loin ka omlai hi. Ka inn a luah ding pa pen Damaskas mi Eliezer ahi hi.

³Ta nong pia kei a, ka inn sunga a suak sila in keima gamh a luah ding hi ta hi,” a ci hi.

⁴Tua ciangin ama tungah TOPA’ thu hong tung a, “Hih mipa pen nangma gamhluah pa hi lo ding hi. Nangma tapa mahmah na gamhluah pa hi ding hi,” a ci hi.

⁵Amah in a pualamah paipih a, “Vantung lam enin aksite sim in; na sim thei hiam?” a ci hi. Tua ciangin amah in, “Na suanlekhakte, tua mah bang ding hi,” a ci hi.

⁶Amah in TOPA muang hi. Tua ahih manin ahi ding bangin Abram gamta hi, ci-in TOPA in a ciamteh hi.

⁷Tua ciangin ama kiangah, “Hih leitang na neih nadingin nangma tungah a hong pia dingin Khaldea gam Ur khua panin a hong paikhiatpih pa pen keimah na TOPA ka hi hi,” a ci hi.

⁸Ahih hangin amah in, “TOPA Pasian aw, keimah in tua leitang ka neih nading bangci theih ding ka hi hiam?” a ci hi.

⁹Amah in, “Kum thum a pha bawngla khat, kum thum a pha keelnu khat, kum thum a pha tuutal khat, vakhu khat le kawl vakhu khanglai khat hong paipih in,” a ci hi.

¹⁰Amah in Pasian kiangah hihte khempeuh paipih a, tuate phel nih ciat suahin, phel khat pen a phel dang khat tungah a koih ciat hi. Ahih hangin vasate phelnih suah lo hi.

¹¹Sasialne vasate tua sate tungah hong tuk suk ciangin Abram in tuate a hawlkhia hi.

¹²Ni a tum ciangin Abram a ihmut nak suah mahmah a, khua mial bekbak a, lau mahmah hi.

¹³Tua ciangin TOPA in Abram kiangah, “Na suanlekhakte amau’ leitang ahi lo munah tawlkhat sung omin, tua lai-ah amaute sila hi ding uh a, amaute kum zali sung kinengniam ding ahihna thu a kitel theihna thei in.

¹⁴Ahi zongin na a sepsak uh minamte’ tungah thukhenna ka tungsak ding a, tua khit ciangin neihsa tampi tawh amaute paikhia ding uh hi.

¹⁵Nang na hih leh, nuamtakin na pu na pate kiang na zuan ding a, khan kicingin hong kivui ding hi.

¹⁶Khang lina ciangin hih lai munah amaute hong paikik ding uh hi. Bang hang hiam cih leh Amor mite’ mawhna kicing nai lo hi,” a ci hi.

¹⁷Ni tumin khua a mial khit ciangin, en in, hih sate kikalah mei beel khu le a kuang meivak a pai hi.

¹⁸Tua ni-in TOPA in Abram tawh thuciamna khat bawl a, “Na suanlekhakte tungah hih leitang, Egypt gun panin a lian gunpi ahi Eufratis gun ciang dong,

¹⁹Ken mite, Kenaz mite, Kadmon mite,

²⁰Hit mite, Perez mite, Refaim mite,

²¹Amor mite, Kanaan mite, Girgash mite, le Jebus mite’ leitang ka hong pia hi,” a ci hi.