Read Tedim Chin PIANCILNA 17 Bible Online

PIANCILNA 17 - Tedim Chin bible

PIANCILNA 17

¹Abram kum sawmkua le kua a phak ciangin ama tungah TOPA kilang a, “Kei, Vanglian Pasian ka hi hi. Hoihtakin gamta inla, paubaang kei in.

²Nang tawh thuciamna ka bawl ding a, nang tampi tak kong phasak ding hi,” a ci hi.

³Tua ciangin Abram mai kunsuk hi. Pasian in ama kiangah,

⁴“En in, nang tungah hih thuciamna kong bawl hi: Nang pen minam honpite’ pa na hi ding hi.

⁵Na min Abram hi nawn lo ding a, Abraham hi ding hi. Bang hang hiam cih leh minam honpite’ pa-in nang kong bawl khin hi.

⁶Keimah in suanlekhak tampi kong neisak ding hi. Nang sung panin minamte ka piangsak ding a, nang sung panin kumpite hong piangkhia ding hi.

⁷“Nang le nang’ khit cianga na suanlekhakte tungah Pasian hihna ding tawntung thuciam nadingin kei le nang’ khit cianga na suanlekhakte’ tungah amau’ khang tawntungin ka thuciamna ka kipsak ding hi.

⁸Nangma tung le nang’ khit cianga na suanlekhakte tungah tawlkhat na omna Kanaan leitang khempeuh na neih tawntung dingun kong pia ding a, kei pen amaute’ Pasian ka hi ding hi,” a ci hi.

⁹Pasian in Abraham’ kiangah, “Nang le nang’ khit cianga na suanlekhakte in zong ka thuciamna na zuih ding uh nong thukim ding uh ahi hi.

¹⁰Hih pen nang le nang’ khit cianga na suanlekhakte’ zuih ding keima thuciamna ahi hi: Note’ lak panin pasal peuhmah a vun ki-at ding hi.

¹¹Note’ vun dawn ki-at ding a, tua pen kei le note’ kikalah thuciamna lim khat hi ding hi.

¹²Note’ lak panin ni giat a pha peuhmah pa a vun ki-at ding hi. Note’ khang tawntungin pasal peuhmah, note’ inn sunga suak hitaleh, note’ ta ahi lo, gamdang mi khatpeuh kiang panin na sum uh tawh na lei uh hitaleh

¹³na inn sunga suak hitaleh, na sum tawh a kileipa hitaleh a vun ki-at tuak ding hi. Tua ahih ciangin tawntung thuciamna ahi keima thuciamna pen nomau’ satak sungah om ding hi.

¹⁴A vun dawn a ki-at lo pasal peuhmah a mipihte kiang panin kihawlkhia ding hi. Bang hang hiam cih leh amah in keima thuciamna palsat hi,” a ci hi.

¹⁵Tua ciangin Pasian in Abraham’ kiangah, “Na zi Sarai ahihleh, ama min Sarai na ci nawn kei ding a, ama min Sarah hi ding hi.

¹⁶Amah thupha ka pia ding a, amah tawh tapa khat kong pia ding hi. Amah thupha ka pia ding a, amah, minamte’ nu hi ding hi. Mihingte’ kumpite ama sung pan hong piangkhia ding hi,” a ci hi.

¹⁷Tua ciangin Abraham mai kun sukin nui a, amahmah tungah, “Kum za a pha pasal khat in ta nei ding ahi hiam? Kum sawmkua a pha Sarah in ta nei ding ahi hiam?” kici hi.

¹⁸Abraham in Pasian’ kiangah, “Ishmael hong nungtasak peuh lecin,” a ci hi.

¹⁹Pasian in, “Hi lo hi. Na zi Sarah in nang a dingin tapa khat nei ding a, ama min Isaac na phuak ding hi. Ama khit cianga a suanlekhakte a dingin tawntung thuciam nadingin ka thuciamna amah tawh ka kipsak ding hi.

²⁰Ishmael a’ ding na ngetna ahihleh ka za khin hi. En in, amah thupha pia-in ka pungsak ding a, tampi tak ka phasak ding hi. Amah pen ulian sawm le nihte’ pa hi ding a, minam lian khatin ka bawl ding hi.

²¹Ahih hangin, kumkik tuhun ciangin Sarah’ sung panin nang a’ dinga hong suak ding Isaac tawh ka thuciamna ka kipsak ding hi,” a ci hi.

²²Amah tawh a kiho a man khit ciangin Abraham’ kiang panin Pasian paikhia to hi.

²³Tua ciangin Abraham in a tapa Ishmael le ama sum tawh a lei hitaleh ama inn sunga suak hitaleh a sila, ama inn sunga om mite’ lak panin pasal khempeuh samin, Pasian in ama tunga a gensa bangin tua ni mahmahin amaute’ vun dawn a atsak hi.

²⁴Ama vun dawn a ki-atin Abraham kum sawmkua le kua pha ta hi.

²⁵Ama vun dawn a ki-atin a tapa Ishmael kum sawm le thum a pha hi.

²⁶Tua ni mahmahin Abraham le a tapa Ishmael a vun uh ki-at hi.

²⁷Ama inn sunga pasal khempeuh, inn sunga suak hitaleh gamdang mite’ tung panin sum tawh a kilei mite hitaleh, amah tawh a vun uh ki-at khawm hi.