Read Tedim Chin PIANCILNA 18 Bible Online

PIANCILNA 18 - Tedim Chin bible

PIANCILNA 18

¹Mamre tawsaw gei-a Abraham a omna-ah TOPA hong kilang hi. Abraham a puanbuk kong gei-ah sun nisat laitakin tu-in a om laitakin

²a khuadaktoh leh, ama mai-ah mi thum na ding hi. Amah in amaute a muh ciangin amaute a dawn dingin puanbuk kong panin va tai a, leilakah kunsukin,

³“Ka tote aw, nong hehpihna-un na sempa hong kheng kei un.

⁴Na nasempa’ kiang hong tung khin na hih khit buangun na thahat kik nadingun an tawmkhat ka va lak kikal sungin tui tawmkhat lasakin na khe uh sil unla, sing nuai-ah khawl un; tua khit ciangin paisuak un,” a ci hi. Tua ahih ciangin amaute in, “Na cih bangin hong hih in,” a ci uh hi.

⁶Tua ciangin puanbuk sunga Sarah kiangah Abraham pai mengmeng a, “Annel hoihte lawh thum hong bawl mengmeng inla, meek manin mohin hong bawl in,” a ci hi.

⁷Abraham zong bawnghon lakah tai-in bawngno a dawng a hoih khat la a, manlang taka a na bawlpah a nasempa tungah a pia hi.

⁸Tua ciangin amah in, bawngnawi-thaukhal, bawngnawi, le a minsa bawngsa la-in amau’ mai-ah a lui hi. Amaute in a nek laitakun sing nuai-ah amau’ kiangah amah a ding hi.

⁹Amaute in ama kiangah, “Na zi Sarah koi-ah om ahi hiam?” a ci uh hi. Amah in, “Puanbuk sungah om hi,” a ci hi.

¹⁰Amaute khat in, “Tuzawh kha kua khit ciangin kong paikik taktak ding a, na zi Sarah in tapa khat nei ding hi,” a ci hi. Sarah in ama nung puanbuk kongah na ngai hi.

¹¹Tu-in Abraham le Sarah teek ta uh a, a kum uh ham hi. Sarah a numei ngeina teng tawpta hi.

¹²Tua ahih ciangin Sarah amahmah nui-in, “Kei ka teek khit, ka topa zong a teek khitin tua bang hi thei nawn ding ahi hiam?” a ci hi.

¹³TOPA in Abraham’ tungah, “Bang hangin Sarah nui-in, ‘Tu-in kei teek ka hih ciangin ta nei takpi ding ka hi hiam?’ ci ahi hiam?

¹⁴Na khat peuhpeuh TOPA a dingin haksa lua ahi hiam? A kisehsa tuzawh kha kua ciangin nang kiangah kong paikik ding a, Sarah in tapa khat nei ding hi,” a ci hi.

¹⁵Ahih hangin Sarah in nialin, “Ka nui kei hi,” ci hi. Bang hang hiam cih leh amah lau hi. Amah in, “Hi lo hi, na nui mah hi,” a ci hi.

¹⁶Tua ciangin tua mun panin mite paikhia a, amaute in Sodom lam en uh hi. Amau’ pai nading lampi-ah a kha dingin Abraham in amaute va zui hi.

¹⁷TOPA in a lungsimah, “Abraham a lian a thahat minam suakin, leitung minam khempeuh in ama thupha ngah bangin thupha a ngah nadingun hong ngen ding hi, ci-in thei ahih manin, tu-a ka hih ding thu Abraham’ tungah im ding ka hi hiam?

¹⁹Im kei ning. Bang hang hiam cih leh TOPA in Abraham’ tunga a ciamsa thu a tunsak theih nadingin ama khita a tate le a innkuanpihte in thuman le thutangin nasepna tawh TOPA’ thupiakte a zuih theih nadingun a hilh dingin amah ka teel khin hi,” a ci hi.

²⁰Tua ciangin TOPA in, “Sodom le Gomorrah a kimawhsakna lianin, amaute’ khialhna nasia mahmah kici ahih manin,

²¹kei tunga hong kigen bangin amaute gamta takpi uh hiam, ci-in a thei dingin ka paisuk ding hi. Tua bang ahih kei leh zong ke’n ka va thei ding hi,” a ci hi.

²²Tua ahih ciangin tua panin mite kihei-in Sodom lamah pai uh a, ahi zongin TOPA’ mai-ah Abraham ding lai hi.

²³Tua ciangin Abraham in hong naihin, “Thuman mite, migilote tawh susia khawm takpi ding na hi hiam?

²⁴Tua khuapi sungah thuman mi sawmnga bang om leh, tua sunga om thuman mi sawmngate’ hangin khah loin tua khua susia teitei ding na hi hiam?

²⁵Thuman mite, migilote tawh a kibat nadingin migilote tawh thuman mite thahkhawm ding, hi thei ding ahi hiam? Tua pen hi thei lo ding hi. Leitung khempeuh Thukhen pa a manin gamta lo ding ahi hiam?” a ci hi.

²⁶TOPA in, “Sodom khuapi sungah thuman mi sawmnga ka muh leh, amaute’ hangin tua khua buppi ka khah ding hi,” a ci hi.

²⁷Abraham in thu gen leuleu a, “En in, leivui le vut bang ahi lel keimah in TOPA’ tungah thu kong gen ngamna hong maisak in.

²⁸Thuman mi sawmnga sung panin nga om kei leh? Tua nga a om loh manin khuapi buppi na susia veve ding hiam?” a ci hi. Amah in, “Tua sungah sawmli le nga ka muh nakleh ka susia kei ding hi,” a ci hi.

²⁹Ama kiangah thu gen kikin, “Tua sungah sawmli bang kimu leh,” a ci hi. Amah in dawngin, “Sawmlite’ hangin ka hih kei ding hi,” a ci hi.

³⁰Tua ciangin amah in, “Topa heh kei in, thu kong gen lai ding hi. Tua lai-ah sawmthum bang kimu leh,” ci hi. Amah in dawngin, “Sawmthum ka muh leh ka hih kei ding hi,” a ci hi.

³¹Amah in, “En in, Topa tungah thu kong gen ngam lailaina hong maisak in. Tua lai-ah sawmnih bang kimu leh,” a ci hi. Amah in dawngin, “Sawmnihte’ hangin ka susia kei ding hi,” a ci hi.

³²Tua ciangin amah in, “Topa heh kei in, hih khatvei bek thu hong gensak lai in. Tua lai-ah sawm bang kimu leh,” a ci hi. Amah in dawngin, “Sawmte’ hangin ka susia kei ding hi,” a ci hi.

³³Abraham’ tungah a thugen ding a man khit ciangin ama pai nadingah TOPA pai a, Abraham zong ama inn-ah a ciahkik hi.