Read Tedim Chin PIANCILNA 19 Bible Online

PIANCILNA 19 - Tedim Chin bible

PIANCILNA 19

¹Vantung mi nihte Sodom ah nitakin hong tung a, Sodom khua kulhkongpi-ah Lot na tu hi. Lot in amaute a muh ciangin, amaute a dawn dingin ding a, leilakah a mai ngatin kun a,

²“Ka tote aw, kong thum hi. Na nasempa’ inn lamah hong kihei-in hong giak unla, na khete uh sil un. Tua ciangin zingsangin tho baihin na pai nading lam uhah pai pan un,” a ci hi. Amaute in, “Hi lo hi; khua lakah ka giak ding uh hi,” a ci uh hi.

³Ahih hangin amah in amaute nakpitakin kun ahih manin ama lamah kihei uh a, ama inn-ah a lut uh hi. Amah in amaute a dingin an bawl a, silngo sawh loh anlum emsak a, amaute in a ne uh hi.

⁴Ahih hangin amaute’ lup ma-in Sodom khua mite, a moi a hamin mi khempeuh in a inn umcih uh hi.

⁵Amaute in Lot sam uh a, “Tu nitak a nang kiangah hong tung mite koi-ah om ahi hiam? Amau’ taw ka luk theih nadingun ko kiangah amaute hong paikhiatpih in,” a ci uh hi.

⁶Lot, kongkhak pua-ah mite kiangah pai-in kong lehkhak a,

⁷“Ka sanggamte aw, tua banga na gitloh gamtat loh nading uh kong thum hi.

⁸En un, ta nungak nih ka nei hi. No kiangah amaute hong paikhiatpihsak unla, na ut bangun amaute tungah gamta un. Hih mite’ tungah bangmah gamta kei bek un. Bang hang hiam cih leh amaute, keima innsung hong tungkhin uh ahih manin ka hut ding kisam hi,” a ci hi.

⁹Ahih hangin amaute in, “Taikhia in. Kote kiangah hong peem pak a, tu-in nang thukhen hong kineih ding na hi hiam? Tu-in amaute sangin nang kong siatbawl zaw ding uh hi,” a ci uh hi. Tua ciangin amaute in nakpitakin Lot’ lam hong neh uh a, kongkhak a phukham zah dongin hong neh uh hi.

¹⁰Ahih hangin mi nihte in amau’ khut hong zanin innsung amau’ kiangah Lot paipihin kong khak uh hi.

¹¹Inn kongkhakah a om mi a lian a neute, amaute in a mit uh tawsak uh hi. Tua ahih ciangin kongkhak a zawtzawt hangun mu zo lo uh hi.

¹²Tua ciangin mi nihte in Lot kiangah, “Hih lai-ah tanau dang na nei hiam? Makte, tapate, ahih kei leh khua sunga nang’ mi peuhpeuh hih mun panin paikhiatpih in.

¹³Bang hang hiam cih leh hih mite a kimawhsakna thu TOPA’ tungah tung khin a, a susia dingin TOPA in hong sawl khin ahih ciangin hih khua a susia ta ding ka hi uh hi,” a ci uh hi.

¹⁴Tua ahih ciangin Lot paikhia-in a tanute a tenpih dingte kiangah, “Manlangin hih khua panin paikhia un. Bang hang hiam cih leh TOPA in hih khuapi a susia ding hi ta hi,” a ci hi. Ahih hangin amah pen a mak dingte tungah a ciamnui bang lel hi.

¹⁵Zingsang khuavak ciangin vantung mite in, “Khuapi gimpiakna sungah kangtum kha ding na hih uh ciangin kinawh inla, hih lai-a om na zi le na tanute la in,” ci-in Lot sawl hamtang uh hi.

¹⁶Ahih hangin amah lungka-in omlai veve hi. Ahi zongin TOPA in ama tungah hehpihna nei ahih manin, mite in amah le a zi le a tanu nihte a khut uh tawh manin, amaute in amah paikhiatpihin khua pualamah koih uh hi.

¹⁷Amaute in a paikhiatpih khit uh ciangin, “Na nuntak nadingun tai un. Nunghei kei unla, kuam sungah zong khawl kei un. Note hong kangtum kha ding ahih manin mualtungah taito un,” a ci uh hi.

¹⁸Ahi zongin Lot in amaute tungah, “Hi lo hi, ka tote aw;

¹⁹en un, note’ muhna-ah na nasempa in maipha muzo a, ka nuntakna nong hutna uhah migitna lianpi kei tungah nong lak khin uh hi. Ahih hangin mualtung gamla ahih manin ka tun ma-in siatna in kei hong pha-in ka si ding hi.

²⁰En un, gal-a om khuapi, tai nadingin nai a, khuapi neu khat ahi hi. Tua lai-ah hong taisak un - khuapi neu khat hi lo ahi hiam? tua hileh ka suakta ding hi,” a ci hi.

²¹Amah in ama kiangah, “En in, na gensa khuapi ka lumlet loh nading, hih maipha zong nang kong pia hi.

²²Kinawh inla, tua lai-ah tai in. Bang hang hiam cih leh tua lai-ah nang na tun mateng ke’n bangmah ka hih thei kei hi,” a ci hi. Tua ahih ciangin tua khuapi min Zoar kici hi.

²³Zoar-ah Lot a tun ciangin tua lai-ah ni suak khinta hi.

²⁴Tua ciangin TOPA in vantung panin Sodom le Gomorrah khuate tungah kaat le meikuang zusak hi.

²⁵Amah in tua khuapite, kuamte khempeuh, khuapite sunga mi tengte khempeuh le leitung a a po khempeuh a susia hi.

²⁶Ahih hangin a nunga om Lot’ zi nunghei a, amah ci khuam a suak hi.

²⁷TOPA’ mai-a a dinnasa munah zingsang tungin Abraham va pai hi.

²⁸Sodom le Gomorrah le kuamte khempeuh lam nga sukin khuadak a, leitang khu pen, meiphualpi khu bangin a kah to a mu hi.

²⁹Pasian in kuam sunga khuapite a suksiat lai-in, amah in Abraham phawk a, amah in Lot’ tenna khuapite a suksiat ciangin tua bang a suksiatna sung panin Lot sawlkhia ahih manin a suakta ahi hi.

³⁰Tu-in Zoar panin Lot paikhia to-in a tanu nihte tawh mualtungah a teng hi. Bang hang hiam cih leh Zoar-ah a ten ding lau hi. Tua ahih ciangin a tanu nihte tawh suanghawm sung khatah a teng uh hi.

³¹A u pen in a nau tungah, “I pa lah teek ta a, leitung ngeina bangin eite hong luppih ding pasal khat zong om lo hi.

³²Hong pai in; i pa leenggahzu khamsak ni; i pa tawh suanlekhak i kizopsak theih nadingin amah tawh lumkhawm ni,” a ci hi.

³³Tua ahih ciangin amaute in tua nitakin a pa uh leenggahzu khamsak uh hi. A unu pai-in a pa tawh lum hi. A tanu a luplam hitaleh a thawhlam hitaleh amah in phawk lo hi.

³⁴A zing ciangin a u in a nau tungah, “En in, zan zanin i pa tawh ka lum hi. Tu nitakin zong amah leenggahzu khamsak leuleu ni. Tua ciangin nang pai inla, i pa tawh suanlekhak i kizopsak theih nadingin amah tawh lumkhawm in,” a ci hi.

³⁵Tua ahih ciangin amaute in tua nitakin zong a pa uh leenggahzu khamsak uh hi. A nau pai-in amah tawh lum hi. A tanu a luplam hitaleh a thawhlam hitaleh amah in phawk lo hi.

³⁶Tua ahih ciangin Lot’ tanu tegel in a pa uh tawh naupaii uh hi.

³⁷A u in tapa khat nei-in a min Moab phuak a, amah pen tuhuna Moab mite’ pianna pupi ahi hi.

³⁸A nau in zong tapa khat nei-in a min Benammi phuak a, amah pen tu donga Ammon mite’ pianna pupi ahi hi.