Read Tedim Chin PIANCILNA 20 Bible Online

PIANCILNA 20 - Tedim Chin bible

PIANCILNA 20

¹Mamre panin Negeb gamah Abraham paisuk a, Kadesh le Shur kikal Gerar-ah tawlkhat sung a teng hi.

²Abraham in a zi Sarah pen, “Ka sanggamnu hi,” ci hi. Gerar kumpipa Abimelek in mi sawlin Sarah samsak hi.

³Ahih hangin zanin mang sungah Abimelek kiangah Pasian pai a, ama kiangah, “En in, na laksa numei’ hangin nang a si ding na hi hi. Bang hang hiam cih leh amah, mi khat’ zi ahi hi,” a ci hi.

⁴Ahi zongin Abimelek in amah zuan nai lo hi. Tua ahih ciangin amah in, “Topa aw, nang in midik pa that ding na hi hiam?

⁵Amahmah in kei kiangah, ‘Amah, ka sanggamnu ahi hi,’ hong ci hi lo ahi hiam? A numei mahmah in zong, ‘Amah, ka sanggampa ahi hi,’ hong ci hi. Tua ahih ciangin lungsim kisuang hetloin a gamta ka hi a, khial ka kisa kei hi,” a ci hi.

⁶Tua ciangin Pasian in a mang sungin ama kiangah, “Hi hi, lungsim kisuanna om loin hih bangin na gamtatna thu ka thei a, kei tungah na khialh loh nadingin a hong kem pa kei mahmah ka hi hi. Tua ahih ciangin nang, amah kong lawngsak kei hi.

⁷Tua ahih ciangin tu-in mipa’ zi piakik in. Bang hang hiam cih leh amah, kamsang khat hi a, amah in nang a dingin thu hong ngetsak ding a, nang na nungta ding hi. Ahih hangin nang in tua numei na piakkik kei le nang le na mi khempeuh na sih taktak ding uh thei in,” a ci hi.

⁸Tua ahih ciangin zingsangin Abimelek tho baih a, a nasemte samin hih thute khempeuh amaute kiangah a gen hi. Amaute nak lau mahmah uh hi.

⁹Tua ciangin Abimelek in Abraham samin ama kiangah, “Bang hangin ko tungah hong hici gamtat na hi hiam? Kei le ka kumpi gam sungah khialhna lianpi khat nong tut nadingin nang’ tungah bang khialhna nei ka hi uh hiam? Hih dinga kilawm lo nate kei’ tungah nong hih hi,” a ci hi.

¹⁰Tua ciangin Abimelek in Abraham’ kiangah, “Hih banga na gamtat nadingin bang ngaihsun na hi hiam?” ci lai hi.

¹¹Abraham in, “Hih lai munah Pasian zahtakna om het lo hi. Ka zi’ hangin amaute in kei hong that ding hi, ci-in ngaihsun kha ka hih manin hih bangin a gamta ka hi hi.

¹²Tua tham loin a taktakin amah ka sanggamnu mah ahi hi. Pa kikhat, nu tuam ka hi uh a, amah ka tenpih ahi hi.

¹³Pasian in ka pa’ inn panin hong paikhiatsak ciangin ama kiangah, ‘Hih pen kei’ tunga nong hih ding na migitna ahi hi: I paina peuhpeuhah kei pen ka sanggampa hi, hong ci in,’ ka ci hi,” a ci hi.

¹⁴Tua ciangin Abimelek in tuu le bawngtalte, sila numei le sila pasalte la-in Abraham pia a, ama tungah a zi Sarah a pia kik hi.

¹⁵Abimelek in, “En in, ka leitang, na mai-ah om hi. Nangmah in hoih na sakna munah teng in,” a ci hi.

¹⁶Sarah’ kiangah, “En in, na sanggampa tungah ngun tang tulkhat ka pia khin hi. Nang tawh a om mite khempeuh’ mai-ah nangma dikna a kilatna ahi hi. Mi khempeuh’ mai-ah nang a manin hong kibawl hi,” a ci hi.

¹⁷Tua ciangin Abraham in Pasian’ tungah thu ngen a, Pasian in Abimelek a damsak hi. Amaute in ta a neih theih nadingin a zi le a sila numeite zong a damsak hi.

¹⁸Bang hang hiam cih leh TOPA in Abraham’ zi Sarah’ hangin Abimelek’ innkuan’ naubu khempeuh khakcipsak khin hi.