Read Tedim Chin PIANCILNA 21 Bible Online

PIANCILNA 21 - Tedim Chin bible

PIANCILNA 21

¹A gensa bangin TOPA in Sarah’ tungah thupha pia a, a gensa bangin Sarah’ tungah TOPA in hih hi.

²Sarah gai a, ama tunga Pasian in a gensa hunin a teek zawhin Abraham tawh tapa khat nei hi.

³Abraham in Sarah tawh a neih ama tapa’ min dingin Isaac a phuak hi.

⁴Pasian in ama tunga a thu piaksa bangin amah in ni giat a phak ciangin a tapa Isaac a vun a at hi.

⁵A tapa Isaac a suah ciangin Abraham kum za pha hi.

⁶Sarah in, “Pasian in kei a dingin nuamin nuihzak nading hong bawlsak khin hi. A za peuhmah in nuamin hong nuihpih ding uh hi,” a ci hi.

⁷Amah in, “Sarah in nau nawi pia ding ci-in kua in Abraham’ tungah gen ngei ding ahi hiam? Ahi zongin a teek khitin amah tawh tapa khat ka nei hi,” a ci hi.

⁸Naupang khang a, nawi tawh hong kikhen ta hi. Isaac nawi tawh a kikhen ni ciangin Abraham in pawi lianpi khat bawl hi.

⁹Ahih hangin, Abraham tawh a neih Egypt mi Hagar’ tapa in ama tapa Isaac a ciamnuih bawlna Sarah in a mu hi.

¹⁰Tua ahih ciangin amah in Abraham’ kiangah, “Hih sila numei a tapa tawh lawnkhia in; bang hang hiam cih leh sila numei’ tapa in ka tapa Isaac tawh gamh luahkhawm thei lo ding uh hi,” a ci hi.

¹¹Ama tapa’ hangin Abraham’ tungah thu nuam het lo hi.

¹²Ahih hangin Pasian in Abraham’ tungah, “Tangvalpa le na sila numei’ hangin lungkim loin om kei in. Sarah in nang’ tunga hong gen peuhmah ama hong gen bangin gamta in. Bang hang hiam cih leh Isaac tawh na suanlekhakte’ min ki lo ding hi.

¹³Sila numei’ tapa zong nangma ta mah ahih manin, minam khatin ka bawl ding hi,” a ci hi.

¹⁴Tua ahih ciangin zingsangin Abraham tho baihin an le tuithawl la-in Hagar pia a, ama liangko tungah naupang tawh suanin a sawlkhia hi. Amah paikhia a, Beersheba gam sungah a vak kawikawi hi.

¹⁵Thawl sunga tui a bei ciangin amah in sawlbawk nuai khatah naupang lawn hi.

¹⁶Tua ciangin amah pai-in a hoihkhop khat a gamla, thallot khat tan bangah a ta nungngatin a tusuk hi. Bang hang hiam cih leh amah in, “Naupang’ sih hong musak kei in,” a ci hi. Amah nungngatin a tut laitakin naupang nakpi-in a kap hi.

¹⁷Pasian in naupang’ kahna aw a za hi. Pasian’ vantungmi in vantung panin Hagar sam a, ama kiangah, “Hagar aw, bang in hong lungkhamsak ahi hiam? Lau kei in. Bang hang hiam cih leh naupang a omna munah a kahna awging Pasian in za hi.

¹⁸Dingin naupang la inla, na khut tawh kip takin len in. Bang hang hiam cih leh minam lian khatin amah ka bawl ding hi,” a ci hi.

¹⁹Tua ciangin Pasian in ama mit haksak a, amah in tuikhuk khat a mu hi. Amah pai-in tui tawh tuithawl dimin naupang a dawnsak hi.

²⁰Pasian in tua naupang ompih a, amah khangto hi. Amah gamlakah teng a, thallot siampa khat hong suak hi.

²¹Paran gam sungah amah teng hi. A nu in Egypt gam panin ama a’ ding zi khat a la hi.

²²Tua hun laitakin Abimelek le a galkap mangpa Fikol in Abraham’ kiangah, “Na sepna khempeuhah Pasian in nang hong ompih hi.

²³Tua ahih ciangin tu-in kei hitaleh ka tate hitaleh ka suanlekhakte hitaleh tungah a man lopi-in hong bawl loin, nang tungah thuman tak tawh kong gamtat bangin keima tung le tawlkhat na omna leitang tungah nong gamtat nadingin Pasian tawh kei tungah hong kiciam in,” a ci hi.

²⁴Abraham in, “Ka kiciam ding hi,” a ci hi.

²⁵Abimelek’ nasemte in a suhsa tuikhuk tawh kisai thu Abraham in a lungkim lohna Abimelek’ kiangah a gen ciangin,

²⁶Abimelek in, “Kua in hih hiam ka thei kei hi. Nang nong gen kei a, keimah in tuni dong ka za nai kei hi,” a ci hi.

²⁷Tua ahih ciangin Abraham in tuu le bawngtalte la-in Abimelek pia a, tua mi nihte in thuciamna khat a bawl uh hi.

²⁸Abraham in a tuuhon sung panin tuununo sagih tuam koih hi.

²⁹Abimelek in Abraham’ kiangah, “Hih na koihtuam tuununo sagihte bang a cihnopna ahi hiam?” a ci hi.

³⁰Amah in, “Keimah in hih tuikhuk ka tawhna thu-ah nang in keima a dingin teci na hih theih nadingin nangmah in ka khutsung panin hih tuununo sagihte na la ding hi,” a ci hi.

³¹Tua ahih ciangin tua mun Beersheba kici hi. Bang hang hiam cih leh amau tegel tua munah thu kiciam uh hi.

³²Tua ahih ciangin amaute in Beersheba-ah thuciamna khat a bawl uh hi. Tua khit ciangin Abimelek le a galkap mangpa Fikol, Filistia mite’ leitangah ciahkik uh hi.

³³Abraham in Beersheba-ah makeng kung khat suan a, tua lai munah Tawntung Pasian, TOPA a bia hi.

³⁴Filistia mite’ leitangah Abraham, sauveipi sung peemta-in a om hi.