Read Tedim Chin PIANCILNA 22 Bible Online

PIANCILNA 22 - Tedim Chin bible

PIANCILNA 22

¹Hih thute khit ciangin Pasian in Abraham ze-et a, ama kiangah, “Abraham,” a ci hi. Amah in, “Hiah om ing,” a ci hi.

²Amah in, “Na it, na tapa neihsun Isaac, la inla Moriah gamah pai in. Tua lai mun a nang kiangah kong gen ding mual khat tungah meihal biakpiakna-in amah hong pia in,” a ci hi.

³Tua ahih ciangin zingsangin Abraham tho baih a, a la tutphah vawhin, ama nasem tangval nih le a tapa Isaac a paipih hi. Amah in meihal biakpiak nadingin sing ek a, ama tunga Pasian’ gensa munah a pai hi.

⁴A ni thum ni ciangin Abraham khuadak to-in a gamla-ah tua mun a mu hi.

⁵Tua ciangin Abraham in a nasemte kiangah, “Hih lai-ah la tawh na om un. Kei le tangvalpa hua lamah pai-in Pasian ka va bia ding uh a, note kiangah ka hong paikik ding uh hi,” a ci hi.

⁶Abraham in meihal biak nading sing la-in a tapa Isaac’ tungah suan a, amah in a khut sungah mei le temta a tawi hi. Tua bangin amau tegel paikhawm uh hi.

⁷Isaac in a pa Abraham’ kiangah, “Pa aw,” a ci hi. Amah in, “Hiah om ing, ka ta,” a ci hi. Amah in, “En in, mei le sing om hi. Ahih hangin meihal biakpiak nading tuuno koi-ah om ahi hiam?” a ci hi.

⁸Abraham in, “Pasian in meihal biakpiak nadingin ama a’ ding tuuno hong pia ding hi, ka ta aw,” a ci hi. Tua bangin amau tegel paikhawm uh hi.

⁹Ama kiangah Pasian’ gensa mun a tun uh ciangin, Abraham in tua lai-ah biakna tau khat bawlin, a ngeina ding bangin sing koihin, a tapa Isaac henin biakna tau tunga sing tungah a koih hi.

¹⁰Tua ciangin Abraham in a tapa a that dingin tem la hi.

¹¹Ahih hangin TOPA’ vantungmi in vantung panin, “Abraham, Abraham!” ci-in a sam hi. Amah in, “Hiah om ing,” a ci hi.

¹²Amah in, “Tangvalpa su kei in. Ama tungah bangmah hih kei in. Bang hang hiam cih leh nang in Pasian na zahtakna tu-in ka thei a, na tapa khat neihsun keima a dingin na humcip lohna ka mu hi,” a ci hi.

¹³Tua ciangin Abraham khuadak kawikawi a, khaumang lakah a ki-a a awk tuutal khat a nungah na om hi. Abraham pai-in tua tuutal kai a, ama tapa’ tangin meihal biakna-in a pia hi.

¹⁴Tua ahih ciangin Abraham in tua mun pen, “TOPA in hong sik hi,” ci-in min phuak a, tuni dongin TOPA’ mual tungah hong kisik hi, a kici hi.

¹⁵TOPA’ vantungmi in vantung panin Abraham a nih veina sam a,

¹⁶“Kei mahmah ka kiciam hi, TOPA in ci hi. Bang hang hiam cih leh nang in hih thu na bawl khin a, na tapa neihsun na humcip kei hi.

¹⁷Nang thupha kong pia taktak ding a, na suanlekhakte vana aksite le tuipi gei-a sehnel bangin tampi ka phasak ding hi. Na suanlekhakte in amau’ galte’ khuapite luah ding uh a,

¹⁸na suanlekhakte thupha ka piak bangin, leitung minam khempeuh in thupha a ngah nadingun hong ngen ding uh hi. Bang hang hiam cih leh nang in ka thu na mang hi,” a ci hi.

¹⁹Tua ciangin a nasemte’ kiangah Abraham ciahkik a, Beersheba-ah paikhawm uh hi. Abraham Beersheba-ah a teng hi.

²⁰Hih thute’ khit ciangin Abraham’ kiangah, “En in, Milkah in zong na sanggampa Nahor tawh tate nei hi:

²¹Uz a u pen hi. A sanggamte pen Buz, Aram’ pa Kemuel,

²²Khesed, Hazo, Pildash, Jidlaf, le Bethuel ahi hi,” kici hi.

²³Bethuel pen Rebekah’ pa ahi hi. Milkah in Abraham’ sanggam Nahor tawh tapa giat nei hi.

²⁴Tua tham loin Reumah min nei a zineu in ta Tebah, Gaham, Tahash, le Maakah a nei hi.