Read Tedim Chin PIANCILNA 23 Bible Online

PIANCILNA 23 - Tedim Chin bible

PIANCILNA 23

¹Sarah kum za le kum sawmnih le sagih nungta a,

²Kanaan mite’ gam sung Kiriatharba (Hebron)-ah a si hi. Abraham dahin kap a, a vui nading vaihawm hi.

³Abraham in a misi nusia-in Hit mite kiangah va pai a,

⁴“Kei pen note lakah khualmi hi-in peemta ka hi hi. Ka zi ka vui theih nadingin note’ lakah vui nading mun leitang hong pia un,” a ci hi.

⁵Hit mite in Abraham dawngin,

⁶“Topa aw, kote’ thu hong ngai in. Nang pen kote’ lakah a vanglian ulian khat na hi hi. Kote’ han na deih pen munah na zi vui in. Kote kuamah in nang a dingin a han it lo ding a, na zi vui ding hong khaktan lo ding hi,” a ci uh hi.

⁷Abraham dingin tua gammi ahi Hit mite’ lamah a kun hi.

⁸Amah in amaute’ kiangah, “Hih gamah ka zi ka vui ding nong deih uhleh, ka thu hong ngai un. Zohar’ tapa Efron in

⁹ama neih Makpelah leihawm kei tungah hong piak theih nadingin hong thumsak un. Tua pen ama lo nawlah om hi. Vui nading munin ka neihna dingin a man ding cing takin piakna tawh note’ muhna-ah kei tungah amah hong piasak un,” a ci hi.

¹⁰Tua laitakin Hit mite’ lakah Efron zong a om ahi hi. Khuapi kulhkongpi-ah a hong pai Hit mite khempeuh’ zakna-ah Hit mi Efron in Abraham dawng a,

¹¹“Hi lo hi, ka topa aw, hong ngai in. Nang’ tungah lo kong pia hi. Tua sunga leihawm zong nang’ tungah kong pia hi. Ka mipihte’ muhna-ah nang’ tungah kong pia hi. Na misi vui in,” a ci hi.

¹²Tua ciangin tua gam mite’ mai-ah Abraham a kun hi.

¹³Tua gam mite’ zakna-ah amah in Efron’ kiangah, “Lungsim takpi tawh na cih ahihleh hong ngai in. Lo man ding kong pia ding hi. Tua lai-ah ka misi ka vui theih nadingin kei’ tung panin a man hong sang in,” a ci hi.

¹⁴Efron in Abraham dawngin,

¹⁵“Ka topa aw, ka thu hong ngai in. Leitang bek khat in ngun shekel zali man hi. Nang le kei’ kikalah bang thudang omnawn ahi hiam? Na misi vui in,” a ci hi.

¹⁶Efron’ cih bangin Abraham thukim hi. Abraham in Efron a dingin, Hit mite’ zakna-ah a min lawh zah, tua hun laitak a sumbukte’ lakah a kizang a gikzah tawh kizui-in ngun shekel zali a tehkhia hi.

¹⁷Tua ahih ciangin Makpelah a Efron’ lo, Mamre nisuahna lamah a om, a sunga om leihawm le a lo, le tua mun khempeuhah a om lo sunga singte pen

¹⁸khuapi kulhkongpi-ah a kikhawm mite khempeuh’ mai, Hit mite’ omna-ah Abraham’ neih dingin kipia hi.

¹⁹Hih bangin a kihih khit ciangin, Kanaan gam sunga om Mamre (Hebron) nisuahna lamah a om Makpelah lo sunga leihawm sungah Abraham in a zi Sarah a vui hi.

²⁰Lo le a sunga om leihawmte si vui nading munin a neih dingin Abraham’ tungah Hit mite in a pia uh hi.