Read Tedim Chin PIANCILNA 24 Bible Online

PIANCILNA 24 - Tedim Chin bible

PIANCILNA 24

¹Tu-in Abraham teekin a kum tam mahmah ta hi. TOPA in na khempeuhah Abraham thupha pia hi.

²Abraham in ama neih khempeuh a uk, a inn sungah a upa pen a nasempa kiangah, “Ka phei nuai-ah na khut hong koih in.

³Nangmah in amau’ lakah ka tenna Kanaan mite’ tanute lak panin ka tapa’ zi ding la loin, keima gam le ka behte kiangah va pai-in ka tapa Isaac’ zi ding na lak nadingin vantung le leitung Pasian ahi TOPA tawh nang kong kiciamsak ding hi,” a ci hi.

⁴

⁵Nasempa in ama kiangah, “A numei in hih gamah kei hong zui nuam kei khaleh nangma nong paikhiatna gamah na tapa ka paipih kik ding hiam?” a ci hi.

⁶Abraham in ama kiangah, “Tua lai-ah ka tapa na paipih kik loh ding thei in.

⁷Ka pa’ inn le ka suahna leitang panin kei hong la-in, kei kiangah thu hong genin kei tungah hong kiciam a, ‘Na suanlekhakte’ tungah hih leitang ka pia ding hi,’ a hong ci vantung Pasian, TOPA in nangma mai-ah a vantungmi sawl ding a, tua lai mun panin nangmah in ka tapa a’ ding zi khat na la ding hi.

⁸Ahih hangin a numei in nang hong zuih nop kei leh keima thuciamna panin nang na suakta ding hi. Bangbang hileh tua lai-ah ka tapa na paipih kik kei ding hi,” a ci hi.

⁹Tua ahih ciangin a nasempa in a topa Abraham’ phei nuai-ah a khut koih a, hih thu tawh kisai-in ama tungah a kiciam hi.

¹⁰Tua ciangin a nasempa in a topa’ kalaohte sawm la-in paikhia a, a topa’ tung panin letsong hoihnono a namkim la hi. Amah dingin Mesopotamia gam Nahor’ khuapi-ah a pai hi.

¹¹Numeite’ nitak tuitawi hun laitakin khuapi pualam tuikhuk gei-ah amah in a kalaohte boksak hi.

¹²Amah in, “Ka topa Abraham’ Pasian, TOPA aw, tuni-in ka maa hong vangsak in. Nang tungah thu kong ngen hi, ka topa Abraham’ tungah itna kip hong lak in.

¹³En in, tuikhuk gei-ah kei ka ding a, khuapi nungakte tuitawi dingin hong pai uh hi.

¹⁴Keimah in, ‘Tui ka dawn theih nadingin na beel hong nga suk in,’ ka cih ciangin, ‘Dawn in; na kalaohte zong tui ka pia ding hi,’ hong ci nu pen na nasempa Isaac a dingin na sehsa numei hisak in. Nangmah in ka topa tungah itna kip na lahna hih thu tawh ka thei ding hi,” a ci hi.

¹⁵Tua bangin a thunget a khit ma-in, Abraham’ sanggampa Nahor in a zi Milkah tawh a neih a tapa Bethuel’ tanu Rebekah a liangko tungah a tuibeel pua-in hong paikhia hi.

¹⁶Tua nu pen kuamah tawh a lumkhawm nai lo, nungak, a ngaihbaang mahmah khat ahi hi. Amah tuikhukah paisukin a beel dim a, hong paito hi.

¹⁷Tua ciangin amah a dawntuah dingin nasempa tai a, “Dawn ding tui tawmkhat na beel sung panin hong pia dih in,” a ci hi.

¹⁸Amah in, “Dawn in, ka topa,” a ci hi. Tua nu in a khut tungah a beel niamsuksakin amah a dawnsak hi.

¹⁹Amah in tua mipa tui a dawnsak khit ciangin, “Na kalaohte in a kham matengun a dawn ding zong tui kong tawisak ding hi,” a ci hi.

²⁰Tua ahih ciangin amah in a tuikuang sungah a tui bungsuk pak a, tuitawi dingin tuikhukah tai-in a kalaohte khempeuh a dingin tui a tawi hi.

²¹TOPA in ama khualzinna mavangsak ding hiam, vangsak lo ding hiam, cih a theih nadingin mipa in daptakin tua nu na en hi.

²²Kalaohte in tui a dawn khit ciangin mipa in shekel lang a gik kham nakbah khat le shekel sawm a gik kham tau nih tua nu a dingin la-in pia a,

²³“Kua’ tanu na hi hiam, hong gen in. Na pa’ inn-ah kote’ giah nading a awng ding hiam?” a ci hi.

²⁴Tua nu in ama kiangah, “Nahor le a zi Milkah’ tapa Bethuel’ tanu ka hi hi,” a ci hi.

²⁵Amah in, “Buhkung le gan-an a kicing ka nei uh a, giah nading mun zong ka nei uh hi,” ci thuah lai hi.

²⁶Mipa a lu kunin TOPA bia a,

²⁷“Ka topa’ tungah a itna kip le a thumanna a pelh lo, ka topa Abraham’ Pasian, TOPA in thupha ngah tahen. Kei ka hih leh, ka topa’ behte’ inn zuatna lampi-ah TOPA in hong paipih hi,” a ci hi.

²⁸Tua ciangin nungaknu a inn-ah tai-in hih thute khempeuh a innkuanpihte tungah a gen hi.

²⁹Rebekah in Laban min nei sanggam pasal khat nei hi. Laban zong tuikhuka mipa kiangah a tai hi.

³⁰Amah in nakbah le a sanggamnu’ khut tunga taaute a muh ciang le, “Mipa in hih bangin kei tungah hong gen,” ci-in a sanggamnu Rebekah’ kam gen a zak ciangin, mipa kiangah a pai ahi hi. Tuikhuka kalaohte kiangah amah na ding hi.

³¹Amah in, “Hong pai in, TOPA’ thupha piakpa aw; bang hangin a pua-ah ding na hi hiam? Bang hang hiam cih leh inn-ah na om nading mun ka bawl khin a, kalaohte a’ ding mun zong om hi,” a ci hi.

³²Tua ahih ciangin inn sungah mipa hong pai hi. Laban in kalaoh vante suah a, kalaohte a dingin buhkung le gan-an pia a, amah le a kikholhpih mite’ khe sil nadingin tui zong a pia hi.

³³Tua ciangin nek dingin a mai-ah an kilui hi. Ahih hangin amah in, “Ka thu ka gen khit matengin an ka ne kei ding hi,” a cih ciangin amah in, “Gen in,” a ci hi.

³⁴Tua ahih ciangin amah in, “Kei pen Abraham’ nasem ka hi hi.

³⁵TOPA in ka topa nakpitakin thupha pia a, amah a lian mahmah suak khin hi. Amah in ama tungah tuuhon, bawnghon, ngun le kham, nasem pasal le nasem numei, kalaoh le late tampi pia hi.

³⁶Ka topa’ zi Sarah in a teek khitin ka topa tawh tapa khat nei hi. Amah in a neihsa khempeuh ama tungah pia hi.

³⁷Ka topa in kei hong kiciamsak a, ‘Nangmah in amau’ gamah ka tenna Kanaan numeite lak panin ka tapa’ zi ding la kei inla,

³⁸ka pa’ innkuan mi le ka behte kiangah pai-in ka tapa a’ ding zi khat na la ding hi,’ hong ci hi.

³⁹Keimah in ka topa kiangah, ‘A numei in kei hong zui nuam kei kha leh,’ ka ci hi.

⁴⁰Ahih hangin amah in kei tungah, ‘A thu ka man’ TOPA in nang tawh a vantungmi hong sawlin na maa hong vangsak ding hi. Nang in ka behte le ka pa’ inn panin ka tapa a’ ding zi khat na la ding hi.

⁴¹Ka behte kiangah na pai ciangin amaute in nang hong piak kei leh ka thuciamna panin nang na suakta ding hi,’ hong ci hi.

⁴²“Tuni-in tuikhukah pai-in, ‘Ka topa Abraham’ Pasian, TOPA aw, tu-a ka paina ka maa nong vansak ding le,

⁴³en in, tuikhuk gei-ah kei ka ding hi. Tuitawi dinga hong paikhia nungak tungah, “Na beel panin tui dawn ding tawmkhat hong pia in,” ka cih ciangin,

⁴⁴“Dawn in, na kalaohte a’ ding zong kong tawisak ding hi,” hong ci nu pen, ka topa’ tapa a dingin TOPA in a sehsa numei hisak in,’ ka ci hi.

⁴⁵“Ka lungsim sungah thu ka nget khit ma-in, a liangko tungah a tuibeel pua-in Rebekah hong paikhia ka mu hi. Amah tuikhukah paisukin tui hong tawi hi. Keimah in ama kiangah, ‘Tui hong dawnsak in,’ ka ci hi.

⁴⁶Amah in a liangko panin a beel hong khiasuk pahin, ‘Dawn in, na kalaohte zong tui ka pia ding hi,’ hong ci hi. Tua ahih ciangin keimah in ka dawn a, amah in kalaohte zong tui a pia hi.

⁴⁷Tua ciangin, ‘Kua’ tanu na hi hiam?’ ci-in ka dong hi. Amah in, ‘Nahor le a zi Milkah’ tapa Bethuel’ tanu ka hi hi,’ hong ci hi. Tua ahih ciangin a nak tungah nakbah ka batsak a, a khut tungah taaute ka butsak hi.

⁴⁸Tua ciangin ka lu kunin TOPA ka bia a, a tapa a dingin ka topa’ behpa’ tanu a la dingin lampi manah kei a hong paipih, ka topa Abraham’ Pasian, TOPA ka phat hi.

⁴⁹Tua ahih ciangin tu-in, ka gamtat nading zia ka theih nadingin ka topa’ tungah hoihtak le thuman takin na gamtat ding uh le na gamtat loh ding uh hong gen un,” a ci hi.

⁵⁰Tua ciangin Laban le Bethuel in dawng a, “Hih thu pen TOPA’ kiang panin hong pai thu ahi hi. A sia ahi zongin a pha ahi zongin nang tungah kong gen ding dang uh om lo hi.

⁵¹En in, Rebekah na mai-ah om hi. Amah la inla pai un. TOPA’ gensa bangin na topa’ tapa’ zi hisak un,” a ci uh hi.

⁵²Abraham’ nasempa in amau’ kammalte a zak ciangin TOPA’ mai leilakah a kunsuk hi.

⁵³Nasempa in ngun le kham kizepnate le puante hong suahkhia-in Rebekah a pia hi. A sanggampa le a nu zong a manpha kizepnate a pia hi.

⁵⁴Tua ciangin amah le a nungzuite in an ne tui dawnin, tua lai-ah tua zan a giak uh hi. Amaute zingsangin a thawh uh ciangin amah in, “Ka topa’ kiangah hong ciahsakkik un,” a ci hi.

⁵⁵Ahi zongin a sanggampa le a nu in, “A tawm penin ni sawm bang, ko tawh numei hong omsak lai in; tua khit ciangin amah hong pai thei ding hi,” a ci uh hi.

⁵⁶Ahih hangin amah in amaute kiangah, “TOPA in ka maa hong vangsak khin ahih nungsang kei hong zekaisak nawn kei un. Ka topa kiangah ka ciah theih nadingin hong paisak un,” a ci hi.

⁵⁷Amaute in, “A numei samin amah i dong ding hi,” a ci uh hi.

⁵⁸Amaute in Rebekah samin ama kiangah, “Hih mipa na zui pah ding hiam?” a ci uh hi. Amah in, “Ka zui ding hi,” ci pah hi.

⁵⁹Tua ahih ciangin amaute in a sanggamnu uh Rebekah le a cingnu, Abraham’ nasempa le a nungzuite tawh ciahkhiasak uh hi.

⁶⁰Amaute in Rebekah thupha pia-in ama kiangah, “Kote’ sanggamnu aw, a tultul a thenthente’ nu hi ta in. Na suanlekhakte in amau a mudahte’ khuapite luah ta uh hen!” a ci uh hi.

⁶¹Tua ciangin Rebekah le a numeite dingin, kalaohte tungah tuangin mipa a zui uh hi. Tua bangin nasempa in Rebekah la-in a pai nading lamah a pai hi.

⁶²Tua kikalin, Isaac, Beerlahairoi panin hong pai-in Negeb gamah na teng hi.

⁶³Isaac, thu a lungngaingai dingin nitakin gamlakah a paikhia hi. Amah a khuadak le kalaohte hong pai a mu hi.

⁶⁴Rebekah in Isaac a muh ciangin, kalaoh tung panin kumin

⁶⁵nasempa kiangah, “Hua lai-a mipa, eite hong dawn dingin gamlak a hong pai kua ahi hiam?” a ci hi. Nasempa in, “Ka topa hi,” a ci hi. Tua ahih ciangin amah in a kikhuhna puan la-in a kikhuh hi.

⁶⁶Nasempa in Isaac kiangah a gamtatnasa khempeuh a gen hi.

⁶⁷Tua ciangin Isaac in a puanbuk sungah Rebekah paipih a, amah pen a zi a suak hi. Amah in tua nu a it hi. Tua ahih manin a nu’ sih khit ciangin Isaac in hehnepna a ngah hi.