Read Tedim Chin PIANCILNA 25 Bible Online

PIANCILNA 25 - Tedim Chin bible

PIANCILNA 25

¹Abraham in Keturah min nei zi dang khat la hi.

²Amah in tua nu tawh ta Zimran, Jokshan, Medan, Midian, Ishbak, le Shuah nei hi.

³Jokshan pen Sheba le Dedan’ pa ahi hi. Dedan’ tate: Asshurim, Lethusim, le Leummim ahi hi.

⁴Midian’ tate: Efah, Efer, Hanok, Abida, le Eldaah ahi hi. Hihte khempeuh, Keturah’ suanlekhakte ahi hi.

⁵Abraham in a neih khempeuh Isaac a pia hi.

⁶Ahih hangin Abraham in a zi dang tawh a tate tungah zong letsong pia a, ama nuntak lai mahin ama tapa Isaac kiang panin nisuahna lam gamah amaute a sawlkhia hi.

⁷Abraham, kum za le kum sawmsagih le nga a phak ciangin,

⁸a hu tawpna sang a, a teek, kum tampi a pha, a khanghamin si a, ama mite tawh kivui khawm hi.

⁹Ama tapa Isaac le Ishmael in, Abraham in Hit mite’ tung panin a lei, Mamre nisuahna lamah a om, Hit mi Zohar’ tapa Efron’ lo sung, Makpelah leihawm sungah amah a vui uh hi. Tua lai munah a zi Sarah kiangah Abraham kivui hi.

¹¹Abraham’ sih khit ciangin Pasian in a tapa Isaac thupha pia hi. Isaac, Beerlahairoi-ah a teng hi.

¹²Hihte pen, Abraham in Sarah’ sila numei ahi Egypt mi Hagar tawh a neih, Abraham’ tapa Ishmael’ suanlekhakte ahi hi.

¹³Hihte pen a suahna tawh kizui-in Ishmael’ tate’ min ahi hi: Ishmael’ ta upa pen Nebaioth hi a, tua ciangin Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Nafish, le Kedemah ahi hi.

¹⁶Hihte pen a khua, a phual, a behin ulian sawm le nihte ahi Ishmael’ tate le amaute’ min ahi hi.

¹⁷(Ishmael kum za le kum sawmthum le sagih a phak ciangin a hu tawpna sang-in si a, a behte tawh kivui khawm hi.)

¹⁸Amaute, Egypt nisuahna, Assiria lam Havilah panin Shur dongah teng uh a, amau’ sanggamte khempeuh panin amau tuam ten uh hi.

¹⁹Hihte pen Abraham’ tapa Isaac’ suanlekhakte ahi hi. Abraham pen Isaac’ pa hi a,

²⁰Aram mi Laban’ sanggamnu, Paddanaram gam a Aram mi Bethuel’ tanu Rebekah zi-in a lak lai-in Isaac kum sawmli pha hi.

²¹Isaac in TOPA’ tungah a zi a dingin thu ngen hi. Bang hang hiam cih leh amah ciing hi. TOPA in ama thungetna pia a, a zi Rebekah gai hi.

²²Ama sungah a naute kilaigawp hi. Amah in, “Hih bang ahihleh bang hangin nungta se ka hi hiam?” a ci hi. Tua ahih ciangin TOPA kiangah thukan dingin amah pai hi.

²³TOPA in ama kiangah, “Na gil sungah mi nam nih om a, nang’ sung pan a suak mihing nihte kikhen ding hi. Khat pen a khat sangin hat zaw ding a, a uzaw in a nauzaw’ na sem ding hi,” a ci hi.

²⁴Amah a suah hun a tun ciangin, a gil sungah tapeeng om hi.

²⁵A masa pen a sanin hong suak a, a pumpi khempeuh mul a nei puan tawh kibang hi. Tua ahih ciangin ama min dingin Esau phuak uh hi.

²⁶Tua khit ciangin a sanggampa hong suakkhia a, ama khut in Esau’ khetul len hi. Tua ahih ciangin ama min dingin Jakob kiphuak hi. Amau’ suah ciangin Isaac kum sawmguk a pha hi.

²⁷Tua naupangte a khan ciangin, Esau pen gam sung mi sabet siam khat hi a, Jakob ahihleh inn-ah om hithiatin a cingkam khat ahi hi.

²⁸Isaac in Esau’ sa matsa nene ahih manin Esau mah itzaw a, ahi zongin Rebekah in Jakob itzaw hi.

²⁹Khatvei Jakob in meh huanin a om laitakin gamlak a sa betna panin phukhong vei-in Esau hong ciah hi.

³⁰Esau in Jakob kiangah, “Gilkialin phukhong vei ka hih manin tua na meh san tawmkhat hong nesak in,” a ci hi. (Tua ahih manin ama min Edom kici hi.)

³¹Jakob in, “Na innluahza hong pia lecin ka meh kong pia ding hi,” a ci hi.

³²Esau in, “A si ding ka hita hi; kei a dingin innluahza bangin kimang ding ahi hiam?” a ci hi.

³³Jakob in, “Kei’ tungah hong kiciam masa in,” a ci hi. Tua ahih ciangin ama tungah Esau kiciam a, Jakob’ tungah a innluahza a zuak hi.

³⁴Tua ciangin Jakob in an le bemeh Esau a pia hi. Esau in zong an ne-in tui a dawn khit ciangin a pai nading a zuan hi. Tua ahih manin Esau in a innluahza tua ciang bang bekin a ngaihsun ahi hi.